NEJ / မတ်လ(၂၇) ရက်၊ ၂၀၀၉
ရန်ကုန်မြို့တော်ဝန် ဗိုလ်မှူးချုပ် အောင်သိန်းလင်း သည် အများ ပြည်သူထံမှ ကောက်ခံထား သည့် ရန်ကုန်မြို့တော် စည်ပင် သာယာရေး အဖွဲ့ပိုင် ငွေများဖြင့် ကြံ့ဖွံ့ အတွက် မဲဆွယ် စည်းရုံးမှုများ လုပ်နေကြောင်း အင်းစိန်မြို့နယ်အတွင်း နေထိုင်သူ မြို့ခံများက ပြောသည်။
မြို့ခံတဦးက “ပြီးခဲ့တဲ့အပတ်က ကျနော်တို့ မြို့နယ်ကို ရန်ကုန်မြို့တော်ဝန် ဗိုလ်မှူးချုပ်အောင်သိန်းလင်း လာတယ်။ သူလာတာက ကြံ့ဖွံ့အနေနဲ့ လာတာ။ သူနဲ့အတူ သူတို့နဲ့ စီးပွားရေး ပေါင်းလုပ်နေသူ လုပ်ငန်းရှင်တွေလည်းပါတယ်။ မြို့နယ်က ရပ်မိရပ်ဖတွေနဲ့ တွေ့တယ်။ သူက ဘာလိုသလဲ၊ ဘာလုပ်ပေးရမလဲ မေးတယ်။ ရပ်မိရပ်ဖတွေက စာသင်ကျောင်းတွေ လုပ်ပေးပါ၊ လမ်းတွေ ကောင်းအောင် လုပ်ပေးပါဆိုပြီး ပြောတယ်။ ဒါနဲ့ သူက နိုင်ငံတော်က ချမှတ်ထားတဲ့ လမ်းစဉ်မူဝါဒ (၇) ချက်အရ လာမယ့် ၂ဝ၁ဝ မှာ ရွေးကောက်ပွဲ ကျင်းပပေးမယ်။ ဒီအတွက် ပြည်သူအများကလည်း ပူးပေါင်းဆောင်ရွက်ကြပါ။ ကျနော်တို့ ကြံ့ဖွံ့ကလည်း ပြည်သူတွေကို တတ်နိုင်သလောက် အကူအညီ ပေးပါ့မယ်ဆိုပြီး တထိုင်တည်းမှာတင် မူလတန်းကျောင်းက ကျောင်းဆောင် တဆောင်ကို ပြုပြင်ပေးမယ်။ နောက် (၁ဝ) ပေသာသာကျယ်တဲ့ လမ်းသွယ်တွေကို ကွန်ကရစ် ခင်းပေးမယ် ပြောပြီး သူနဲ့ ပါလာတဲ့ လုပ်ငန်းရှင်တွေကို ဘယ်သူက ဘယ်အပိုင်း လုပ်ဆိုပြီး ချက်ချင်း အမိန့်ချတယ်။ အဓိကကတော့ လာမယ့် ၂ဝ၁ဝ ရွေးကောက်ပွဲမှာ သူတို့ ကြံ့ဖွံ့က ပါတီဖွဲ့ပြီး ဝင်ပြိုင်တဲ့အခါ ပြည်သူတွေ ထောက်ခံမဲပေးအောင် ကြိုပြီးစည်းရုံးတဲ့သဘောအဖြစ် အားလုံးက မြင်ကြတယ်” ဟု ပြောသည်။
အလားတူ အင်းစိန်မြို့နယ်အတွင်းမှ ခရစ်ယာန်အသင်းတော် သင်းအုပ်ဆရာတဦးကလည်း ပြီးခဲ့သည့် အပတ်က ဗိုလ်မှူးချုပ်အောင်သိန်းလင်း ကိုယ်တိုင်လာကြောင်း၊ အသင်းတော်အတွက် ဘာကူညီရမလဲ မေးကြောင်း၊ ၎င်းတို့က အသင်းတော်အတွက် ဘုရားကျောင်းဆောက်လုပ်ရန် မြေဝယ်ထားပြီး ဆောက်လုပ်ခွင့်ရရန် တင်ပြလျှောက်ထား သည်မှာ ကြာပြီဖြစ်ကြောင်း၊ ခွင့်ပြုမိန့်မရ၍ မဆောက်နိုင်သေးကြောင်း စသဖြင့်တင်ပြသည့်အခါ ချက်ချင်း ဘယ်နေရာမှာလည်း သွားကြည့်ရအောင် ပြောပြီး ချက်ချင်းသွားကြည့်ကြောင်း၊ နောက် ချက်ချင်း တထိုင်တည်း ဆောက်လုပ်ခွင့်ပေးပြီး သူနှင့်အတူပါလာသည့် လုပ်ငန်းရှင်များကို တတ်နိုင်သမျှလှူရန် နှိုးဆော်ကြောင်း၊ လုပ်ငန်းရှင်များကလည်း ဘိလပ်မြေ၊ အုတ် စသဖြင့် မည်မျှစီ လှူပါ့မည်ဆိုပြီး ချက်ချင်း အလှူစာရင်းကြေညာ ကြောင်း၊ ထို့နောက် ဗိုလ်မှူးချုပ်အောင်သိန်းလင်းက လာမည့် ၂ဝ၁ဝ ရွေးကောက်ပွဲ အောင်အောင်မြင်မြင် ဖြစ်မြောက်ရန် အသင်းတော်အနေဖြင့် ကူညီပါဆိုပြီး ပြောကြောင်း ရှင်းပြသည်။
ယခုကဲ့သို့ ဗိုလ်မှူးချုပ်အောင်သိန်းလင်း မဲဆွယ်စည်းရုံးမှု ပြီးသည့်နောက် စည်ပင်သာယာရေးအဖွဲ့များ လာရောက်ပြီး ကြံ့ဖွံ့ ဆိုင်းဘုတ်များ စိုက်ထူကာ လမ်းခင်းခြင်း၊ စာသင်ကျောင်းပြုပြင်ခြင်း စသည်တို့ကို လုပ်ကိုင်ခဲ့ကြောင်း၊ သို့သော် (၃-၄) ရက်မျှ ဟန်ပြ လုပ်ကိုင်ပြီးနောက် မပြီးစီးပဲ ရပ်တန့်နေသည်မှာ ယနေ့တိုင်ဖြစ်ကြောင်း မြို့ခံများက ပြောသည်။
အင်းစိန်မြို့ခံ ပြည်သူများကမူ ဗိုလ်မှူးချုပ်အောင်သိန်းလင်း၏ ယခုလုပ်ရပ်သည် ၂ဝ၁ဝ ရွေးကောက်ပွဲကာလတွင် ကြံ့ဖွံ့က ဖွဲ့စည်းယှဉ်ပြိုင်မည့် နိုင်ငံရေးပါတီနှင့် လွှတ်တော်ကိုယ်စားလှယ်လောင်းများကို မဲပေးရန် အကြိုမဲဆွယ်ပွဲ ပြုလုပ်နေခြင်းပင်ဖြစ်ကြောင်း၊ ပြည်သူများထံမှ ကောက်ခံရငွေဖြင့် ပြည်သူများကို ပြန်စည်းရုံး ငါးကြင်းဆီနှင့် ငါးကြင်းကြော်သည့်သဘောဖြစ်ကြောင်း၊ ပြည်သူအားလုံးကလည်း သိနားလည်ကြကြောင်း ပြောသည်။
ထို့အပြင် ပြည်သူများအနေဖြင့် စစ်အာဏာရှင်စနစ်၏ ရက်ရက်စက်စက် ဖိနှိပ်အုပ်ချုပ်ခဲ့မှု၊ တလွဲစီမံခန့်ခွဲမှုကြောင့် ပြည်သူများ စီးပွားရေးကျဆင်း၊ ပညာမဲ့၊ လူမှုရေး နိမ့်ပါး စသည့်အခြေအနေ ရောက်လာရသည်တို့ကို မမေ့ကြကြောင်း၊ လွတ်လပ်စွာမဲပေးခွင့်ရပါက ပြည်သူများ၏ ဆန္ဒအစစ်အမှန်ကို စစ်အာဏာပိုင်များသာမက ကမ္ဘာကြီးကလည်း တွေ့မြင်နိုင်မည်ဖြစ်ကြောင်း အင်းစိန်မြို့ခံများက ပြောဆိုနေကြသည်။
No comments:
Post a Comment