ရခိုင်ပြည်နယ် မြို့တော် စစ်တွေတွင် ရေရှားပါး၍ ရပ်ကွက် အတော်တော်များများတွင် သောက်သုံးရေ အခက်အခဲနှင့် ရင်ဆိုင်နေကြရသည်။“လေးရက်မှာ တကြိမ်နုန်းနဲ့ ရေပေးဝေနေပါတယ်။ ကန်တော်ကြီးမှာ ရေမရှိဘူးလို့ သိရပါတယ်။ နောက်တခု ပြဿနာက ရေဖြန့်ဖြူး ပေးနေတဲ့ ရေပိုက်တွေဟာ အင်္ဂလိပ်ခေတ်ကတည်းက တည်ဆောက်ထားခဲ့တာ ဖြစ်တဲ့အတွက် ရေညှိတွေ သံချေးတွေကပ်ပြီး ရေတွေ မစီးဆင်းနိုင်တော့ဘူးလို့ သိရပါတယ်။ ဒါကြောင်း စစ်တွေမှာ ရေဟာ ပုံမှန် မလာဘဲ ဖြစ်နေပါတယ်” ဟု အမည် မဖေါ်လိုသူ စစ်တွေ မြို့ခံ တဦးက ပြောသည်။
ယခုကဲ့သို့ သောက်ရေ သုံးရေ အခက်အခဲနှင့် စစ်တွေမြို့သူ မြို့သားများ ရင်ဆိုင်နေ ကြရသည်မှာ နှစ်စဉ် နွေရာသီ ရောက်တိုင်း ဖြစ် သည်။
သူက “အဆိုးဆုံး ရပ်ကွက်တွေက အုန်းတပင်၊ ရွှေပြား၊ ဆင်ကူးလမ်း၊ ဗျိုင်းဖြူရွာ၊ မင်းဂံနဲ့ စံပြရွာတွေ ဖြစ်ကြပါတယ်။ တချိ်ု့ ရပ်ကွက်တွေဆိုရင် လေးရက်ကိုထား တပတ်နေလို့တောင် ရေမလာပါဘူး” ဟု ပြောသည်။
ရေမလာသော်လည်း မြူနီစပယ်မှ ရေမီတာကောက်ရန်မှာ ပုံမှန် ရောက်ရှိနေပြီး တမီတာကို ၂၅၀ နုန်းဖြင့် ကောက်ခံနေသည်ဟု သိရသည်။
ယခုကဲ့သို့ ရေပုံမှန် မလာသဖြင့် ဗျိုင်းဖြူရွာ အပါအ၀င် တချို့ ရပ်ကွက်များတွင် ကလေးအများအပြားမှာ ၀မ်းရောဂါထိခိုက်ခံစားနေရသည်ဟု သူက ပြောသည်။
စစ်တွေ မြို့နေလူထု အနေဖြင့် သောက်ရေ သုံးရေကို ကန်တော်ကြီး တခုတည်းကိုသာ မှီခိုအားထားနေရပြီး အဆိုပါ ကန်တော်ကြီးကို အင်္ဂလိပ် အစိုးရက ၁၉၀၆ ခုနှစ်တွင် လူပေါင်း ၂၀၀၀၀ အတွက် ရည်ရွယ်ပြီး တည်ဆောက်ခဲ့သည်ဟု သိရသည်။
ယခုအခါ စစ်တွေမြို့ လူဦးရေမှာ သုံးသိန်းကျော် ရှိနေပြီဖြစ်သည်ဟု သိရသည်။
စစ်တွေရှိ လူဦးရေ အတွက် ပုံမှန်လိုအပ်နေသော ရေကို ကန်တော်ကြီးမှ ရေဖြင့် နှစ်စဉ် နှစ်တိုင်း ဖြည့်စွမ်း မပေးနိုင်သော်လည်း သက်ဆိုင်ရာမှ တစုံတရာ ကန်သစ်များ တည်ဆောက်ပေးခြင်း မရှိကြောင်း သိရသည်။
ရခိုင်ပြည်နယ်မှာ နှစ်စဉ် နှစ်တိုင်း မိုးရေချိန်လက်မ ၁၂၀ ကျော် ရွာသွန်းသော်လည်း နှစ်စဉ် နွေရာသီ ရောက်တိုင်း ရေရှားပါးမူ ဒဏ်ကို စစ်တွေသာမက တခြား မြို့ ရွာ ဒေသများ အနေဖြင့် ခံစားနေကြရသည်ဟု သိရသည်။
No comments:
Post a Comment