NEJ / ၄ မေ ၂၀၀၉
ယမန်နှစ် မေ (၂) ရက်တွင် နာဂစ် မုန်တိုင်း ကြောင့် အသက်ဆုံးရှုံး သွားသူများ အား တနှစ်ပြည့် အလှူမပြု လုပ်နိုင်သူ များပြား ကြောင်း ဘိုကလေး မြို့နယ် မလော့ ကျေးရွာခံများ က ပြောသည်။
မုန်တိုင်းကြောင့် မိသားစု (၁၀) ဦးအထက် အသက်ဆုံးရှုံးခဲ့ရသည်ကို တနှစ်ပြည့်တွင် မကျွတ်မလွတ်ဖြစ်နေပါက ရောက်ရာအရပ်က သာဓုခေါ်စေလိုသည့်အတွက် မိမိနေအိမ်က ဘုရားတွင် ဆွမ်းတင်၍ အမျှဝေလိုက်ကြောင်း ဦးထွန်းနိုင်ဆိုသူက ပြောသည်။
ဦးထွန်းနိုင်သည် နာဂစ်မုန်တိုင်းမတိုင်ခင်က ရေလုပ်ငန်းဖြင့် အသက်မွေးကြောင်းလုပ်နေသူဖြစ်ပြီး မုန်တိုင်းကြောင့် ဇနီးနှင့်သမီးအပါအ၀င် အဖေအမေ၊ မောင်နှမသားချင်းများနှင့်အတူ အိုးအိမ်ပစ္စည်းများ အကုန်ဆုံးရှုံးခဲ့သူဖြစ်သည်။
၎င်းက “အခုတော့ စီးပွားရေးအဆင်မပြေလို့ ကျန်ခဲ့တဲ့ (၁၂) နှစ်သားငယ်လေး ရှေ့ရေးအတွက်
ကျပန်း လုပ်ကိုင်စားသောက်နေရတဲ့ “ဘောက်” လုပ်သားဘ၀ကို ရောက်နေရပြီ”ဟုပြောသည်။
ဘိုကလေးမြို့နယ် ကွမ်းသီးချောင်းရွာတွင် ယောက်ျားနှင့် သမီးတဦး၊ သားတဦးဆုံးရှုံးခဲ့ရသည့် အသက် (၂၆) နှစ်အရွယ် မိချိုက ၎င်းတို့မိသားစုအတွက် အလှူပြုလုပ်ချင်သော်လည်း လတ်တလော နေစရာပင် မရှိဖြစ်နေ၍ မလုပ်နိုင်ကြောင်း ပြောသည်။
“ကျမက နာဂစ်မုန်တိုင်းတိုက်တော့ ကိုယ်ဝန်ကြီးနဲ့။ ယောက်ျား၊ သားနှင့်သမီးတို့ သေသွားခဲ့တယ်။ ရေတွေ တက်လာတော့ အားလုံးကွဲသွားကြတယ်။ ကျွဲလို့ ထင်တယ်ရှင့်။ အဲဒီအကောင်က ကျမကို ကောက်ရိုးပုံပေါ်ကို ပို့ခဲ့တယ်လို့ အမှတ်ရတယ်။ သတိရလာတော့ အ၀တ်အစားမရှိတော့ဘူး။ ဘိုကလေးမြစ်နဲ့ သကန်မြစ်ကြားကို ကျော်ပြီးတော့ သာဖြန် ဓနိတောက လမုပင်ပေါ်မှာ ရောက်နေတယ်။ ကျမကို အဲဒီသာဖြန်ရွာက ကရင်အဖိုးကြီးနှင့် အဖွားကြီးက ခေါ်ပြီး ကျမရဲ့ မိသားစုဆီပြန့်ပို့တယ်။ အခုနေတာ အဖွားအိမ်မှာပါ၊ တနှစ်သမီးလေးနဲ့ပါ” ဟု ပြောသည်။
ဘိုကလေးမြို့နယ် ဘုရားချောင်းရွာတွင် နာဂစ်မုန်တိုင်းတိုက်ခတ်စဉ်က လူပေါင်း (၁၀၀) ၀န်းကျင် သေဆုံးခဲ့ရ ကြောင်း၊ အဆိုပါ သေဆုံးသူများကို အကျွတ်အလွတ် နှစ်ပတ်လည် စုပေါင်းပြုလုပ်ရန် ငွေမတတ်နိုင်၍ အချို့က ဘုန်းကြီးကျောင်းတွင် ဆွမ်းတပွဲသွားရောက် လှူသူများရှိကြောင်း သိရသည်။
“တချို့တတ်နိုင်သူတွေကတော့ ဘုန်းကြီးရဟန်းပင့်ပြီး ကျကျနန လုပ်နိုင်ကြတယ်။ ဒါပေမယ့် ဒီလိုလုပ်နိုင်ကြတဲ့ လူတွေဟာ မြို့မှာ ဆွေမျိုးသားချင်း အထောက်အပံ့ရတဲ့ သူတွေပါ။ ဒီရွာက လူ (၉) ဦးသေသွားတဲ့ မိသားစုက သူတို့ရဲ့ အမျှအတန်းကို ဘိုကလေးမြို့ပေါ်က ဆွေမျိုးအိမ်မှာ သွားလုပ်ကြတယ်” ဟု ဘိုကလေးမြို့နယ်၊ ကပ္ပနန်းရွာ မှ မသောင်းဝေက ပြောသည်။
နာဂစ်သင့်ဒေသများဖြစ်သော ဒေးဒရဲမြို့နယ်၊ ဖျာပုံမြို့နယ်၊ ဘိုကလေးမြို့နယ်၊ ကွမ်းခြံကုန်းမြို့နယ်နှင့် ကော့မှူးမြို့နယ်တို့တွင် တနှစ်ပြည့် ဆွမ်းအလှူကိုပင် ကောင်းစွာမပြုလုပ်နိုင်သူများ ရှိနေသည်ကို ခေတ်ပြိုင်က ကွင်းဆင်းမေးမြန်းခဲ့သည်။
“ဘယ်လိုမှ စိတ်မကောင်းဘူး။ ဘုန်းဘုန်းကျောင်းမှာ ဒကာ၊ ဒကာမ တချို့က သူတို့နေအိမ်မှာ ပရိတ်လာပြီး နာပေးပါလို့ ပြောလာတယ်။ လှူစရာဆိုလို့ အချိုရည်ဘူး တဘူးပဲတဲ့။ ဘုန်းဘုန်းကလည်း အလှူ လှူစရာမလိုပါဘူးလို့ ပြောပြီးတော့ ပရိတ်တရားသွားဟောပေးခဲ့တယ်” ဟု ဒေးဒရဲမြို့နယ် ကျုံဖဲရွာ ဘုန်းကြီးက ပြောသည်။
No comments:
Post a Comment