ကွန်းဟဒေ့
ဘုရားသုံး ဆူမြို့ အတွင်း ဗုံးနှစ်လုံး ပေါက်ကွဲမှု တွင် မည်သည့် အဖွဲ့ လက်ချက်ဖြစ် သည်ကို နအဖမှ ဖော်ထုတ် နိုင်ခြင်း မရှိသေး ဘဲ မြို့အတွင်း နှင့် မြို့ အပြင် ဝင်ပေါက်များ တွင် ယနေ့ည လုံခြုံရေး များ တိုးမြှင့် ချထား သည်ဟု သိရသည်။
လွန်ခဲ့သောညက အမြှောက်ကျည်ဆံနှစ်လုံး ပေါက်ကွဲခဲ့သည်ဟု အာဏာပိုင်များ ပြောဆိုခဲ့သည်ဟု အာဏာပိုင်နှင့် နီးစပ်သော သူတစ်ဦးက ပြောပြခဲ့သည်။ ပေါက်ကွဲမှုမှာ အမြှောက်ကျည်ဆံများ မဟုတ်ပဲ ဗုံးနှစ်လုံးသာ ဖြစ်ကြောင်း ယနေ့တွင် အာဏာပိုင်များ အတည်ပြုပြောကြားခဲ့သည်။
မည်သည့်အဖွဲ့ လက်ချက်ဖြစ်သည်ကို နအဖအာဏာပိုင်များမှ ရှာဖွေဖော်ထုတ်စုံစမ်းနေဆဲပင် ဖြစ်ပြီး ယနေ့ညတွင် စစ်သားနှင့် ရဲ လုံခြုံရေးကားများ မြို့အတွင်းတွင် ကင်းလှည့်နေသည်ဟု ဒေသခံများက ပြောသည်။
“စစ်သားနဲ့ရဲတွေ ကားနဲ့ရော ဆိုင်ကယ်နဲ့ရော မြို့တွင်းမှာ လုံခြုံရေးကင်းလှည့်နေတယ်၊ မြို့အပြင်ဘက် ဝင်ပေါက်ရှိသမျှကို သူတို့လုံခြုံရေး ချထားတယ်” ဟု မျက်မြင်သက်သေတစ်ဦးက ပြောသည်။
၎င်းနှင့်ကိုက် ၁၀၀ ခန့်အကွာတွင် ဗုံးပေါက်ကွဲခဲ့သော ခလရ တပ်ရင်း အမှတ် ၃၂ အနားရှိ ပရိဘောဂဆိုင်တွင် အလုပ်လုပ်နေသော အလုပ်သမားနှစ်ဦးကို အာဏာပိုင်များက ကေအင်ယူအဖွဲ့အစည်းနှင့် ဆက်စပ်မှုရှိသည်ဆိုကာ မသင်္ကာမှုဖြင့် ဖမ်းဆီးထားသည်ဟု မျက်မြင်သက်သေ ဒေသခံတစ်ဦးက ပြောသည်။
ယခုပေါက်ကွဲမှုမှာ မည်သည့် အဖွဲ့မှမပြောသော်လည်း ၄င်းတို့နှင့်ဆန့်ကျင်သော အဖွဲ့အစည်းတခုခုမှ ဖောက်ခွဲသည်ဟု နအဖအာဏာပိုင်များက ထင်မြင်ယူဆနေသည်။ သို့သော် မြို့ခံအချို့နှင့် ၄င်းဒေသရှိ အပစ်အရပ် တိုင်းရင်းသားလက်နက်ကိုင် အရာရှိအချို့ကမူ နအဖအာဏာပိုင်များက ဒေသခံများ တိုင်းရင်းသားလက်နက်ကိုင်အဖွဲ့အစည်းများအပေါ် အမြင်မှားစေရန်နှင့် ထိုလက်နက်ကိုင်အဖွဲ့ များ၏ ဂုဏ်သိက္ခာကို ထိခိုက်စေသည့်ရည်ရွယ်ချက်ဖြင့် အာဏာပိုင်များကိုယ်တိုင်သာ လုပ်ဆောင်သည်ဟု ထင်နေကြသည်။
“ကျနော့အထင်ပြောရရင် တကယ်လို့သူတို့နဲ့ ဆန့်ကျင်တဲ့အဖွဲ့တစ်ခုတစ်ခုက လုပ်မယ်ဆိုရင် ထိအောင်လုပ်မှာပေါ့၊ အခုဟာက လူမရှိတဲ့နေရာမှာ ပေါက်တဲ့ဆိုတော့ တစ်မျိုးပဲ၊ ဥပမာ SB ရုံးကွင်းထဲမှာ ပေါက်တဲ့တစ်လုံးကလည်း မသင်္ကာစရာပဲ၊ ဘာဖြစ်လို့လဲဆိုတော့ အဲဒီရုံးရှေ့မှာ ဆီဆိုင်တစ်ဆိုင်ရှိတော့ မီးကလင်းနေရောပဲ၊ ရန်သူဘက်မှ လာပြီး ပစ်ဖို့တော့ မလွယ်ဘူး ထင်တယ်” ဟု မြို့ခံတစ်ဦးက ၄င်း၏ထင်မြင်ချက်ကို ပြောပြခဲ့သည်။
ခလရ တပ်ရင်း ၃၂ ရှေ့တွင် ပေါက်ကွဲသော ဗုံးတစ်လုံးသည်လည်း တပ်ရင်းနှင့် ကိုက် ၁၀၀ ခန့်အကွာ နအဖစစ်သားများမရှိသော နေရာတွင် ပေါက်ကွဲခဲ့သည်ဟု ၄င်းက ဆက်ပြောသည်။
No comments:
Post a Comment