ရန်ကုန် ဂျီမေးလ် အသုံးပြုသူများ အခက်ကြုံ

နန်းဒေဝီ

နယူး ဒေလီ (မဇ္ဈိမ) ။ ။ ဂူဂဲလ် google အင်တာနက်မှ အခမဲ့ ဝန်ဆောင်မှု ပေးသော ဂျီမေးလ် Gmail များ အသုံး ပြုရာ တွင် အခက် အခဲဖြစ် နေကြောင်း ရန်ကုန် မြို့ရှိ အင်တာနက် အသုံး ပြုသူ များက ပြောသည်။

ပြီးခဲ့သည့် ၄-၅ ရက်ခန့်မှ စတင်ကာ ရန်ကုန်မြို့ရှိ ဂျီမေးလ် အသုံးပြုသူများက မေးလ်လက်ခံစာများ ဖတ်ရန်၊ သို့မဟုတ် စာပို့ရာတွင် အခက်တွေ့နေရခြင်း ဖြစ်သည်။

“လိုင်းက မငြိမ်ဘူးအမ။ တက်လိုက်၊ ကျလိုက် ဖြစ်နေတော့ ဂျီမေးလ်တွေ ဖွင့်မရ ဖြစ်နေတာ။ လုံးဝ လိုင်းက ကျသွားတာလည်း မဟုတ်ဘူး” ဟု ပုဂံအင်တာနက် ဝန်ဆောင်မှုမှ အင်တာနက် သွယ်တန်းထားသော ရန်ကုန်ရှိ Power Internet Café ၏ တာဝန်ရှိသူတဦးက မဇ္စျိမကို ပြောသည်။

ရန်ကုန်တိုင်း ကျောက်တံတားမြို့ရှိ SMT Net Internet and E-mail ဆိုင်မှ တာဝန်ရှိသူတဦးကလည်း “ပြီးခဲ့တဲ့ ၂-၃ ရက်က လိုင်းက လုံးဝမကောင်းဘူး။ စကားလည်း ပြောလို့မရဘူး။ အင်တာနက်က ဂိမ်းတွေတောင် ကစားလို့ မရဘူး။ အဲလို ဖြစ်လာရင် ကျနော်တို့တော့ ဆိုင်ပိတ်လိုက်တယ်” ဟု ပြောသည်။

ဂျီမေးလ်ဖွင့်ကာ Inbox ကို နှိပ်အပြီး ၁၀ စက္ကန့်အကြာတွင် Error ဟူ၍ ပေါ်လာပြီး ပြန်ဖွင့်မရသည်မှာ ၅ ရက်ခန့် ရှိနေပြီဖြစ်ကြောင်း ဂျီမေးလ်အသုံးပြုသူ ရန်ကုန်ဒေသခံတဦး အဆိုအရ သိရသည်။

သို့သော် ရန်ကုန်တိုင်းအတွင်းရှိ တချို့မြို့နယ်များတွင်မှု ဂျီမေးလ်များကို အသုံးပြု၍ အဆင်ပြေနေပြီ ဖြစ်သည်။

ယခုလို ဂျီမေးလ်အသုံးပြုမှု ခက်ခဲချိန်သည် ပြီးခဲ့သည့် သောကြာနေ့က မြန်မာနိုင်ငံသို့ ရောက်ရှိလာသည့် ကုလ အထွေထွေ အတွင်းရေးမှူးချုပ်၏ ၂ ရက်ကြာ ခရီးစဉ်နှင့် တိုက်ဆိုင်နေသည်။

မြန်မာစစ်အစိုးရက အင်တာနက်လိုင်းများ ထိန်းချုပ်ခြင်း၊ အကန့်အသတ်မရှိ ဖြတ်တောက်ခြင်း ပြုလုပ်လေ့ရှိသည့်အပြင်၊ နိုင်ငံတကာမှ လူ့အခွင့်အရေး ကိုယ်စားလှယ်များ၊ ကုလသမဂ္ဂဆိုင်ရာ ထိပ်တန်းခေါင်းဆောင်များ မြန်မာနိုင်ငံသို့ ရောက်ရှိချိန်များ၌လည်း အင်တာနက် မြန်နှုန်းလိုင်းများ သိသာစွာ ကျဆင်းလေ့ရှိသည်။

ဂျီမေးလ် အသုံးပြုမှု ခက်ခဲလာခြင်းသည် စစ်အစိုးရအနေဖြင့် မြန်နှုန်းလိုင်းကို လျှော့ချလိုက်ခြင်းနှင့် လက်ရှိ အင်တာနက်ပေးဝေနေသည့် စနစ်များတွင် စက်မှုပိုင်းဆိုင်ရာ ပံ့ပိုးမှုများ၌ အားနည်းချက်များ ရှိနေသဖြင့် ဖြစ်နိုင်ကြောင်း ဗြိတိန်ရောက် စက်မှုပိုင်းဆိုင်ရာ ကျွမ်းကျင်သူ ကိုထိုက်က ယခုလို ပြောသည်။

“ဂျီမေးလ်ကို လုံးဝ ပိတ်လို့မရပါဘူး။ ဒါပေမယ်လို့ speed ကို တမင်သက်သက် လျှော့ချလိုက်တာမျိုး၊ မဟုတ်လည်း လက်ရှိ စက်မှုပိုင်းဆိုင်ရာ ပံ့ပိုးမှုတွေမှာ ဝန်-အား မမျှ ဖြစ်ရတာမျိုးတွေကြောင့် ဂျီမေးလ် သုံးလို့ အဆင်မပြေတာတွေ ရှိနေတာပါ” ဟု သူက ပြောသည်။

မြန်မာနိုင်ငံတွင် အင်တာနက်ဝန်ဆောင်မှုကို မြန်မာစစ်အစိုးရလက်အောက်ရှိ MPT ခေါ် မြန်မာ့ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနနှင့် ပုဂ္ဂလိကပိုင် အင်တာနက် ဝန်ဆောင်မှုလုပ်ငန်းဖြစ်သည့် မြန်မာတယ်လီပို့ (ပုဂံနက်) တို့က နိုင်ငံတဝှန်း အဓိက ဝန်ဆောင်မှု ပေးနေသည်။

ဂျီမေးလ်အသုံးပြုမှု အခြေအနေနှင့် ပတ်သက်၍ အသေးစိတ် သိရှိနိုင်ရန် ပုဂံနက်ကို ဆက်သွယ်မေးမြန်းရာ တာဝန်ကျ ဝန်ထမ်းက ပြန်လည်ဖြေကြားရန် ငြင်းဆိုခဲ့သည်။