ထိုင်းနိုင်ငံ တောင်ပိုင်း ချာ့အမ်းမြို့တွင် ကျင်းပ လျက်ရှိသော ၁၅ ကြိမ်မြောက် အာဆီယံ ထိပ်သီး ညီလာခံ၌ မြန်မာ ၀န်ကြီးချုပ် ဗိုလ်ချုပ်ကြီး သိန်းစိန်က မကြာ မီ ၂၀၁၀ ရွေးကောက်ပွဲ ဥပဒေ ထုတ်ပြန်မည် ဖြစ်ကြောင်း ယနေ့ ပြောဆို လိုက်သည်။ဗိုလ်ချုပ်ကြီး သိန်းစိန်က မြန်မာ နိုင်ငံ အမျိုးသား ပြန်လည် ရင်ကြား စေ့ရေးနှင့် ၎င်းတို့၏ လမ်းပြမြေပုံ ၇ ဆင့် လုပ်ငန်း စဉ်နှင့် သက်ပြီး ရှင်းလင်း ပြောကြား ရာတွင် ယခုကဲ့သို့ ရွေးကောက်ပွဲ ဥပဒေ ထုတ်ပြန် မည်ဟု ထည့် သွင်း ပြောကြား သွားခြင်း ဖြစ်ကြောင်း ထိုင်း ၀န်ကြီးချုပ် အဖိဆစ် ဝေ့ချာချီဝ ၏ အဆိုအရ သိရှိရသည်။
“သိပ်မကြာတော့ တဲ့အချိန်မှာ ရွေးကောက်ပွဲ ဥပဒေ ထုတ်ပြန် ကြေညာ မယ်လို့ ဗိုလ်ချုပ်ကြီး သိန်းစိန်က ပြောပါတယ်”ဟု ထိုင်းဝန်ကြီး ချုပ်က ပြောဆိုသည်။
သို့သော် ၂၀၁၀ ရွေးကောက်ပွဲ ပြုလုပ်မည့် နေ့ရက် အချိန်နှင့် အသေးစိတ်ကို ဗိုလ်ချုပ်ကြီး သိန်းစိန်က ထုတ်ဖော် ပြောဆိုခြင်း မရှိဟုလည်း ဆိုသည်။
လေ့လာသူများကမူ ယခုကဲ့သို့ ပြောဆိုသော စကားမျိုးကို ပြီးခဲ့သည့် ၂၀၁၀ ရွေးကောက်ပွဲပြုလုပ်ရန် ကြေညာသည့် ၂၀၀၈ ခုနှစ် ဖေဖော်ဝါရီလကတည်းကပင် ပြောဆိုသင့်သည်ဟု ဝေဖန်ထောက်ပြကြသည်။
မြန်မာနိုင်ငံခြားရေးဝန်ကြီး ဦးဉာဏ်ဝင်းကလည်း လာမည့်၂၀၁၀ ရွေးကောက်ပွဲသည် အားလုံးပါဝင်နိုင်ပြီး လွတ်လပ်၍ တရားမျှတသည့် ရွေးကောက်ပွဲဖြစ်ရန်ဆောင်ရွက်နေကြောင်း ယမန်နေ့ကပြောသည်ဟု ထိုင်း နိုင်ငံခြားရေး ၀န်ကြီး ကဆစ်ဖိရုမ်းက သတင်းစာရှင်းလင်းပွဲတွင် ပြောဆိုသည်။
မြန်မာ့ရေးရာ အာဆီယံ အမတ်များ(AIPMC) အဖွဲ့မှ ခရိုင်ဆတ် ချွန်နာဗန်က မြန်မာအစိုးရသည် အပြောနှင့် လက်တွေ့ တခြားစီလုပ်ဆောင်တတ်သောကြောင့် ယခုပြောဆိုချက်များသည်လည်း လက်တွေ့ ဖြစ်လာနိုင် မည် မဟုတ်ကြောင်း ပြောသည်။
ယခု ၁၅ ကြိမ်မြောက် အာဆီယံ ထိပ်သီးညီလာခံ၌ နိုင်ငံတကာအသိုင်းအ၀ိုင်း၏ မြန်မာနိုင်ငံနှင့် ပတ်သက် သည့် မူဝါဒဆိုင်ရာ သီးသန့်ဆွေးနွေးပွဲတွင် ခရိုင်ဆတ်က ဤသို့ပြောကြားခဲ့ခြင်းဖြစ်သည်။
“ကျနော်တို့မှာ မြန်မာနိုင်ငံနဲ့ပတ်သက်ပြီး အများနဲ့သက်ဆိုင်တဲ့ မူဝါဒ ရှိပါတယ်”ဟု လည်း ခရိုင်ဆတ်က အမေရိကန်၊ ဥရောပ သမဂ္ဂ(EU) ကိုယ်စားလှယ်များနှင့် အာဆီယံနိုင်ငံကိုယ်စားလှယ်များ တွေ့ဆုံပွဲတွင် ထည့်သွင်း ပြောကြားခဲ့သည်။
ယနေ့တွင် မြန်မာအစိုးရ ရွေးချယ်ထားသော လူထုအခြေပြု လူမှုအဖွဲ့အစည်း (civil society) ကိုယ်စားလှယ် များအဖြစ် စစ်အရာရှိဟောင်းနှင့် ကုလသမဂ္ဂဆိုင်ရာမြန်မာသံအမတ်ဟောင်း ဦးကျော်တင့်ဆွေ၊ ရဲ အရာရှိ ဟောင်းများဖြစ်သော ဦးဝင်းမြိုင်နှင့် ဦးစစ်အောင်တို့ ဦးဆောင်၍ အာဆီယံခေါင်းဆောင်များနှင့်တွေ့ဆုံရန် တက်ရောက် လာခဲ့သည်။
ယမန်နေ့က အာဆီယံ ခေါင်းဆောင်များ အစည်းအဝေးတွင် မြန်မာအပါအ၀င် ၅ နိုင်ငံမှ လူထု အခြေပြု လူမှုအဖွဲ့အစည်းများမှ ကိုယ်စားလှယ်များကို အစည်းအဝေးသို့ တက်ရောက်ခွင့် မပြုရန် အာဆီယံက ဆုံးဖြတ်ခဲ့သည်။
ယင်းဆုံးဖြတ်ချက်တွင် မြန်မာ့အရေးလှုပ်ရှားသူ ပြည်ပ အခြေစိုက် မခင်ဥမ္မာ အပါအ၀င်၊ ကမ္ဘောဒီးယား၊ လာအို၊ ဖိလစ်ပိုင် နှင့် စင်ကာပူနိုင်ငံ ကိုယ်စားလှယ်များ ပါဝင်သည်။
ယမန်နေ့က စတင်၍ အောက်တိုဘာ ၂၅ ရက်နေ့အထိ ၁၅ ကြိမ်မြောက် အာဆီယံ ထိပ်သီးညီလာခံကို ထိုင်းနိုင်ငံ ချာ့အမ်းမြို့တွင် ကျင်းပနေခြင်းဖြစ်သည်။
ယင်း ၁၅ ကြိမ်မြောက် အာဆီယံ ထိပ်သီး အစည်းအဝေးပွဲသို့ ၀န်ကြီးချုပ် ဗိုလ်ချုပ်ကြီး သိန်းစိန် တက်ရောက်လျက်ရှိသည်။
No comments:
Post a Comment