တရုတ်-မြန်မာနယ်စပ်ရှိ ကာစီနိုများ ရပ်နား ပန်ဝါမြို့တွင်သာ ဆက်လက်ဖွင့်လှစ်

ခိုင်လင်း / ၁ အောက်တိုဘာ ၂၀၀၉

တရုတ် - မြန်မာ နယ်စပ် တလျှောက်ရှိ အပစ်ခတ်ရပ် နယ်မြေအတွင်း တိုက်ပွဲများ ဖြစ်ပွားမည်ကို စိုးရိမ် ထိတ်လန့်ပြီး လောင်းကစား ရုံများ ရပ်နားရ သကဲ့သို့ အချို့ ရွှေ့ပြောင်းမှုများ လုပ်ကြရ သော်လည်း နယ်ခြားစောင့်တပ် အသွင်ပြောင်းရန် လက်ခံ ထားသည့် ကချင်ပြည် ဒီမိုကရေစီ သစ်တပ်မတော် (NDA-K) ဗဟိုဌာန ချုပ်ရှိရာ ပန်ဝါမြို့တွင်သာ လောင်းကစား မှုများ ဆက်လက် လုပ်နေသည်။


ဝတပ်ဖွဲ့ (UWSA) ထိန်းချုပ်ရာ နယ်မြေအတွင်းရှိ ကာစီနို လောင်းကစားရုံများမှာ တဖက် တရုတ်နိုင်ငံ အာဏာပိုင်များ၏ လူဝင်လူထွက် ကန့်သတ်မှုကြောင့်လည်းကောင်း၊ ကိုးကန့်အရေးအခင်းနောက်ပိုင်း ဒေသအတွင်း စစ်ရေးပြင်ဆင်မှုများ ကြောင့်လည်း တရုတ်နိုင်ငံဘက်မှ လာရောက်လောင်းကစားသူ မရှိသလောက် ဖြစ်သွားကာ ပိတ်ထားလိုက်ရသည်ဟု ပန်ဆန်းဒေသခံတဦးက ပြောသည်။

ယခုနှစ်အစောပိုင်းက တရုတ်နိုင်ငံသားများကို ပြန်ပေးဆွဲ၊ သတ်ဖြတ်မှုတို့ဖြင့် တရုတ်အာဏာပိုင်များ၏ ကန့်ကွက်မှုနှင့် မြောက်ပိုင်းတိုင်းစစ်ဌာနချုပ် (မပခ) ၏ တားမြစ်မှုကြောင့် (NDA-K) ဗဟိုဌာနချုပ်ရှိရာ ပန်ဝါမြို့မှ ချီဗွေမြို့အထွက် သုံးမိုင်အကွာရှိ ကာစီနိုလောင်းကစားရုံများ ပိတ်ထားခဲ့ရာမှ ယခုအခါ ပန်ဝါမြို့ရှိ ဥက္ကဋ္ဌ ဆခုံတိန့်ယိန်း၏ ဟိုတယ်တခုတွင် လောင်းကစားရုံများ ဖွင့်လှစ်ထားရသည်ဟု (NDA-K) အရာရှိတဦးက ပြောသည်။

၎င်းက “အရင်ဖွင့်ထားတဲ့ နေရာတွေက အဆောက်အဦလောက်ပဲရှိတော့တယ်။ လုပ်ခွင့်မရှိတော့ဘူး။ ကန်ပိုက်တီးက ကစားရုံတွေလည်း (၂) နှစ်လောက်ရှိပြီလေ၊ ပိတ်ထားရတာ၊ မပခက ပိတ်ခိုင်းလို့။ အခုက နေခြည်ဟိုတည်မှာပဲ ဖွင့်ရတော့တယ်။ ဦးဆခုံတိန့်ယိန်းပဲ ပိုင်တာ။ လာကစားတဲ့သူတွေကတော့ တရုတ်တွေ။ ထိန်ချုံးဘက်ကနေ လာကြတာ။ ညနေပိုင်းကိုလာ၊ မနက်ဆို ပြန်သွားကြတယ်” ဟု ပြောသည်။

ပန်ဝါမြို့တွင် ပန်ဝါ၊ နေခြည်၊ သမတနှင့် ရွှေတောင်ကြား ဆိုသည့် ဟိုတယ်လေးခုရှိပြီး အားလုံးကို (NDA-K) ဥက္ကဋ္ဌ ဦးဆခုံတိန့်ယိန်း မိသားစုများကသာ ပိုင်ဆိုင်ပြီး ယခုအခါ ပန်ဝါမြို့တွင် လောင်းကစား လာလုပ်သူများကလွဲ၍ ပြင်ပမှ လာရောက်လည်ပတ်သူမရှိ၍ မြို့မှာ စည်ကားမှုမရှိတော့ကြောင်း အဆိုပါ (NDA-K) အရာရှိက ပြောသည်။

ဗန်းမော်ခရိုင်၊ လွယ်ဂျယ်မြို့အနီးရှိ ကချင်ပြည်လွတ်လပ်ရေးအဖွဲ့ထိန်းချုပ်ရာ မိုင်ဂျာယန်ဒေသအတွင်းမှ ကာစီနိုလောင်းကစားရုံများမှာလည်း တရုတ်ဘက်မှ လျှပ်စစ်မီးဖြတ်တောက်ကာ ဖိအားပေးပိတ်ခိုင်းသဖြင့် ယခုနှစ် မတ်လကတည်းက ပိတ်ထားခဲ့ရပြီး လိုင်ဇာမြို့ရှိ လောင်းကစားရုံများမှာလည်း အလားတူ ပိတ်ထားခဲ့ရသည်ဟု ကေအိုင်အိုနှင့်နီးစပ်သူ ဒေသခံတဦးက ပြောသည်။

အလားတူ ရှမ်းပြည်နယ်၊ အရှေ့ပိုင်းအထူးဒေသ (၄) အမျိုးသားဒီမိုကရေစီမဟာမိတ်တပ်မတော် ဗဟိုဌာနချုပ်ရှိရာ မိုင်းလားမြို့ရှိ လောင်းကစားရုံများကိုလည်း တရုတ်အာဏာပိုင်များက ဖိအားပေးသောကြောင့် ၂ဝဝ၆ ခုနှစ်ကတည်းက ပိတ်ထားခဲ့ရသည်။

ထို့နောက် တရုတ်-မြန်မာနယ်စပ်နှင့် အလှမ်းဝေးသည့် မိုင်းမကျေးရွာအနီးတွင် ဖွင့်လှစ်ထားခဲ့ရာမှ ကိုးကန့်အရေးအခင်းကြောင့် လောင်းကစားရုံများကို ရပ်နားထားခဲ့ရာမှ ယခုအခါ လောနိုင်ငံနယ်စပ်ဘက်သို့ ရွှေ့ပြောင်း ဖွင့်လှစ်ထားသည်ဟု မိုင်းလားမြို့ခံ ကုန်သည်တဦးက ပြောသည်။