ပန်ဝါ နယ်ခြားစောင့်တပ်မှ နအဖစစ်သားများ ဆက်ကြေးတောင်း ငွေကောက်

ပေါက်ပေါက် / ၂၀ နိုဝင်ဘာ ၂၀၀၉

ယခင် ကချင်ပြည်ဒီမိုကရေစီသစ်တပ်မတော် (အန်ဒီအေကေ) နယ်မြေအတွင်း မကြာသေးခင်က အသစ်ဖွင့်လှစ်လိုက်သည့် အသွင်ပြောင်း နယ်ခြားစောင့်တပ်ရင်းများတွင် တာဝန်ကျသည့် နအဖစစ်သားများက ဖြတ်သန်းသွားလာနေသည့်ကားများကို ဆက်ကြေးတောင်း ငွေကြေးကောက်ခံနေကြသည်။

ပန်ဝါမှ ချီဗွေသို့ ထွက်လာသည့် ကားများကို လုပီကျေးရွာ၌ နယ်ခြားစောင့်တပ်တွင် တာဝန်ထမ်းဆောင်ရန် ရောက်ရှိနေသည့် နအဖစစ်သားများက ငွေကောက်နေသည်ဟု အဆိုပါလမ်းခရီးကို ဖြတ်သန်းခဲ့သည့် မြစ်ကြီးနားဒေသခံတဦးက ပြောသည်။

၎င်းက “လုပီက နယ်ခြားစောင့်တပ်မှာ တာဝန်ကျမယ့် စစ်သားတွေ ရောက်ရောက်ချင်းပဲ ငွေကောက်နေကြပြီ။ အန်ဒီအေကေတွေတော့ မပါဘူး။ သူတို့စစ်တပ်ကတွေချည်းပဲ။ ဝိုင်းမော်က ခလရ (၅၈) လည်း အဲဒီမှာရောက်နေတယ်။ သူတို့ဂိတ်ရဲ့ တမိုင်လောက်အကွာမှာ ဂိတ်ဖွင့်ထားတယ်။ ရွှေတွင်းတို့၊ ရေကာတာတို့ဘက်မှာ အလုပ်လုပ်တဲ့သူတွေကို ဈေးရောင်းလာတဲ့ တရုတ်ကကားတွေ ရှိတယ်၊ အဲလို ကားတွေကို ကောက်တာ။ ပါးစပ်ထဲတွေ့ရာ တောင်းတဲ့သဘောရှိတယ်။
(၅) ထောင်၊ (၁) သောင်း အဲလိုတောင်းနေတာ” ဟု ပြောသည်။

နယ်ခြားစောင့်တပ်ရင်းများတွင် တာဝန်ထမ်းဆောင်မည့် နအဖစစ်သားများသည် အင်အား (၅ဝ) ထက်မနည်း ပန်ဝါဒေသအတွင်း ရောက်ရှိနေပြီး ယခုအချိန်အထိ နယ်ခြားစောင့်တပ်ရင်းအဖြစ် စနစ်တကျဖွဲ့စည်းထားပုံမရသေးကြောင်း အဆိုပါဒေသခံက ပြောသည်။

၎င်းက “မန်တောင်ဂိတ်မှာကျတော့ အခုချိန်ထိ အန်ဒီအေကေတံဆိပ်နဲ့ တွေ့ရသေးတယ်။ မေးကြည့်တော့ ရွှေကူဇာတိသား၊ နာမည်က အုန်းမြင့်တဲ့။ သူကတော့ အန်ဒီအေကေ တံဆိပ်နဲ့ပဲ။ နယ်ခြားစောင့်တပ်ထဲမှာ ရောက်တဲ့သူတွေလည်း ရှိသလို မူလအဖွဲ့ထဲမှာပဲ နေရတဲ့သူတွေပါ ရှိတယ်လို့ သူက ပြောတယ်။ နယ်ခြားစောင့်တပ်မှာ တာဝန်ကျတာက အင်အား (၄ဝဝ) လောက်ပဲ ရှိတာတဲ့။ အဲဒါကို တပ်ရင်း (၃) ရင်းဖွဲ့တာဆိုတော့ တပ်ရင်းတခုကို (၁၀၀) ကျော်လောက်ပဲရှိတာ” ဟု မြစ်ကြီနား ဒေသခံတဦးက ပြောသည်။

အဆိုပါကိစ္စနှင့်ပတ်သက်၍ ယခင်အန်ဒီအေကေအဖွဲ့မှ တာဝန်ရှိသူများကို ဖုန်းဆက်သွယ်၍ မရရှိပါ။

အန်ဒီအေကေအဖွဲ့သည် ဗမာပြည်ကွန်မြူနစ်ပါတီမှ ၁၉၈၉ ခုနှစ်၊ ဒီဇင်ဘာလတွင် ခွဲထွက်ခဲ့ပြီး နအဖနှင့် အပစ်ခတ်ရပ်စဲရေးပြုလုပ်ကာ ယခုလ (၈) ရက်တွင် နယ်ခြားစောင့်တပ်ရင်း (၃) ခုဖြင့် အသွင်ပြောင်းဖွဲ့စည်းခဲ့သည်။

အသက် (၅ဝ) ကျော်အထက် အန်ဒီအေကေတပ်ဖွဲ့ဝင်များအား အချို့ ပင်စင်ပေးလိုက်သကဲ့သို့ အချို့က ဒေသဖွံ့ဖြိုးရေးလုပ်ငန်းများ ဆက်လက်လုပ်ရန်ရှိနေပြီး အဆိုပါအဖွဲ့ကို ယခင် အန်ဒီအေကေဥက္ကဋ္ဌဟောင်း ဆခုန်တိန့်ယိန်းက ဦးဆောင်သွားမည်ဟု အန်ဒီအေကေအဖွဲ့နှင့် နီးစပ်သူများက ပြောသည်။