Narinjara News
ကျော်နိုင် (ကော့စ်ဘဇား) မြန်မာနိုင်ငံမှ တရားမ၀င် ၀င်ရောက် နေထိုင်သော ရိုဟင်ဂျာ ဆိုသူများကို ဘင်္ဂလာမှ လိုက်ထုတ်ပြီး အဆိုပါ လစ်လပ်သွားသော နေရာများတွင် ဒေသခံ အလုပ်သမားများကို အလုပ်ပေးရန် အတွက် အိုခီးယားမြို့ (Ukhiya) တွင် ဒေသခံ ကျောင်းသားနှင့် လူငယ်များက ဆန္ဒပြခဲ့ကြသည်။
အဆိုပါ ဆန္ဒပြပွဲကို ဇန္န၀ါရီလ ၂၄ ရက်နေ့ နံနက် ၁၀ နာရီတွင် ပြုလုပ်ခဲ့သည်ဟု ဒေသခံ ကျောင်းသား တဦးက ပြောသည်။
ဆန္ဒပြပွဲတွင် အိုးခီးယားမြို့ ကျောင်းသား ခေါင်းဆောင် မူဟာမတ် ဇာဖေါရ်၊ ဇါမာလ် အူဒိန်၊ အာဘ်ဒူလ် ကောရိမ်၊ အာက်တာရ် ကာမာလ်နှင့် ဘောချိရ် အဟာမတ် ရှာဟာဇင် နှင့် တခြား ဒေသခံ လူငယ် ခေါင်းဆောင်များ တက်ရောက်ပြီး မေးခွန်း စကားများ အသီးသီး ပြောခဲ့ကြသည်ဟု သိရှိရသည်။
ဆန္ဒပြပွဲတွင် ကျောင်းသား အဖွဲ့မှ ခေါင်းဆောင် တဦးက ယခုကဲ့သို့ ပြောသည်။
“ လွန်ခဲ့တဲ့ ၁၉၉၀ မှ စပြီး မြန်မာနိုင်ငံမှ ရိုဟင်ဂျာလို့ ခေါ်တဲ့ မြန်မာနိုင်ငံသားတွေ ၀င်ရောက်ချိန်မှ စပြီး အိုခီးယားနဲ့ တက်ကနက် မြို့နယ်တွေ အတွင်းမှာ ဆန်၊ ပဲ ၊ စားဆီ၊ စက်သုံးဆီနဲ့ တခြား အိမ်သုံး ကုန်ပစ္စည်းတွေ မလုံမလောက် ဖြစ်လာပြီးတော့ ကုန်ဈေးနုန်းတွေလည်း တက်လာခဲ့တယ်။ ပီးရင် အိုခီးယား မြို့နယ် အတွင်းမှာ သူခိုး၊ ဓါးပြ အပါ အ၀င် မှောင်ခို စီးပွားရေးနဲ့ တခြား တရားမ၀င်တဲ့ အလုပ်တွေ တိုးပွားလာတာကို တွေ့ရှိလာရတယ်။ ဒါကြောင့် အခုအချိန်မှာ မြန်မာနိုင်ငံက တရားမ၀င် ၀င်ရောက် နေထိုင် သူတွေကို ဘင်္ဂလာဒေခ်ျ့က နေပြီးတော့ အမြန်ဆုံး နှင်ထုတ်ရန်အတွက် အစိုးရကို တိုက်တွန်းလိုက်ပါတယ်။”
၎င်းပြင် အဆိုပါ ဆန္ဒပြပွဲတွင် အိုခီးယာရှိ ဘွဲ့ရ ကျောင်းသားနှင့် တခြား ဒေသခံ အလုပ်သမားများကို မြန်မာ ဒုက္ခသည် စခန်းများတွင် အလုပ် လုပ်ကိုင်နေကြသော NGO နှင့် တခြား အဖွဲ့အစည်းများတွင် ရာခိုင်နုန်းပြည့် အလုပ်ခန့်အပ် ပေးရန် တောင်ဆိုသွား ကြသည်ဟုလည်း သတင်း ရရှိသည်။
No comments:
Post a Comment