ပေါက်ပေါက်/ ၁၈ ဖေဖော်ဝါရီ ၂ဝ၁ဝ
မကြာသေးမီရက်ပိုင်းက ကိုးကန့်ဒေသ၊ လောက်ကိုင်မြို့တွင် ဗုံးများ ဆက်တိုက်ပေါက်ကွဲမှုဖြစ်ပွားခဲ့ပြီး မပေါက်ကွဲသေးသော ဗုံးများ လည်း ရှာဖွေသိမ်းဆည်းမိခဲ့ရာတွင် ဖုန်ကျားရှင် ဦးဆောင်သည့် ကိုးကန့်တပ်ဖွဲ့က ဆောင်ရွက်ခဲ့ကြောင်း ယနေ့ထုတ် နအဖပိုင် သတင်း စာများက စွပ်စွဲလိုက်သည်။
မိုင်းဖောက်ခွဲမှုနှင့် ပတ်သက်၍ တရားခံတဦးကို ဖော်ထုတ်ဖမ်းဆီးရမိထားပြီးဖြစ်ကာ ပေါက်ကွဲမှုတွင် ပါဝင်ခဲ့သူများမှာ တရားခံပြေးများဖြစ်သော ဖုန်းကျားရှင်၊ ဖုန်ကျားဖု၊ ဖုန်တာ့ရွှင်၊ ဖုန်တာ့လီတို့၏ ယခင် မြန်မာပြည် အမျိုးသားဒီမိုကရေစီ မဟာမိတ်တပ်မတော် (ကိုးကန့်အဖွဲ့) မှဖြစ်ကြောင်း ယနေ့ထုတ် နအဖ သတင်းစာများတွင် ဖော်ပြထားသည်။
နအဖ သတင်းစာများက ထိုသို့ဖော်ပြသော်လည်း လောက်ကိုင်မြို့၊ တုံချိန်ရပ်ကွက်အစွန် ဈေးဟောင်းနေရာတွင် ဖေဖော်ဝါရီ (၁၆) ရက် သန်းခေါင်ကျော်က ဗုံးဆက်တိုက်ပေါက်ကွဲမှုဖြစ်ခဲ့ပြီးနောက် ယမန်နေ့ နံနက်ပိုင်းတွင် အသက် (၂ဝ) ကျော်အရွယ် ကိုးကန့်စစ်သား (၁) ဦးနှင့် တရုတ်နိုင်ငံသား (၂) ဦးအား နအဖအာဏာပိုင်များက ဖမ်းဆီးထားကြောင်း လောက်ကိုင်ဒေသခံ တဦးက ပြောသည်။
၎င်းက “စစ်သင်တန်းမတက်ချင်လို့ ထွက်ပြေးလာတဲ့ တရုတ်လူငယ် (၁) ယောက်ကို မနေ့က ဖမ်းလိုက်တယ်။ တပ်ထဲကနေ ပြေးလာတဲ့သူပေါ့။ ဦးဖုန်ကျားရှင်အဖွဲ့က မဟုတ်ဘူး။ ဦးပယ်စောက်ချိန် (ပိုင်စုံချိန်) တို့ဆီကပေါ့။ နယ်ခြားစောင့်တပ်လုပ်တော့ ထွက်ပြေးနေတဲ့သူတွေ အများကြီး။ အဲဒီထဲက (၁) ယောက် မနေ့က လောက်ကိုင်ထဲမှာ ဖမ်းမိထားတယ်၊ နောက်ထပ် တရုတ်နိုင်ငံသား (၂) ယောက်ကိုလည်း ဖမ်းထားတယ်။ အဲဒါ ဗုံးခွဲတရားခံဆိုပြီး ပြောနေကြတယ်” ဟု ပြောသည်။
ဖေဖော်ဝါရီ (၁၅) ရက် နံနက်ပိုင်း (၈) နာရီကျော်ဝန်းကျင်က ဗုံး (၂) လုံးပေါက်ကွဲခဲ့ကြောင်း၊ ဖေဖော်ဝါရီ (၁၇) ရက် နံနက် (၁) နာရီ (၂၅) မိနစ်နှင့် (၂) နာရီ (၂ဝ) မိနစ်တို့တွင်လည်း ဗုံးများပေါက်ကွဲခဲ့ကြောင်း၊ မပေါက်ကွဲသေးသည့် ဗုံးများ သိမ်းဆည်းရမိကြောင်း ဖော်ပြထားပြီး အဆိုပါ ဗုံးပေါက်ကွဲမှုတွင် တရုတ်နိုင်ငံသား (၃) ဦးအပါအဝင် (၉) ဦး ဒဏ်ရာရရှိကြောင်း နအဖပိုင်သတင်းစာများက ဖော်ပြထားသည်။
တရုတ်နှစ်သစ်ကူးကာလမျိုးတွင် ဖုန်ကျားရှင်တို့အဖွဲ့က လုပ်မည်မထင်ကြောင်းနှင့် နအဖအနေဖြင့် ဗုံးပေါက်ကွဲမှုဖြစ်တိုင်း မဟုတ်သည့်တရားခံများအား ရှာကြံစွပ်စွဲတတ်ကြောင်း တရုတ်-မြန်မာနယ်စပ် စစ်ရေးအကဲခတ် ဦးအောင်ကျော်ဇောက ပြောသည်။
၎င်းက “ဒီလို နှစ်သစ်ကူးကာလမျိုးမှာ ကိုးကန့်ဒေသခံတွေ သေကျေထိခိုက်အောင် ဖုန်တို့ကတော့ လုပ်မှာမဟုတ်ဘူး။ အခု မိုင်းဖြစ်စဉ်မှာ သုံးတဲ့ အမျိုးအစားတွေကို ကြည့်ရတာကလည်း ဖုန်အဖွဲ့က မသုံးနိုင်ဘူး။ မြန်မာပြည်ထဲမှာ ဗုံးတွေကွဲတိုင်း ဟိုစွပ်စွဲ၊ ဒီစွပ်စွဲ လုပ်နေတာပဲ။ အခု ကိုးကန့် (၁) ယောက်ကို ဖမ်းမိလည်း ဖုန်အဖွဲ့ကလို့ ပြောလည်းရသားပဲ” ဟု ပြောသည်။
No comments:
Post a Comment