ရန်ကုန်မြို့၏ မြို့လယ်ခေါင် အချက်အခြာကျသည့် ယခင် လဟာပြင်ဈေး မြေနေရာတွင် City Center အမည်ရှိ လောင်းကစားရုံ၊ နိုက်ကလပ်နှင့် ကာရာအိုကေခန်းမ ဖွင့်လှစ်ထားကြောင်း သိရသည်။ ကိုယ်တိုင် သွားရောက်ခဲ့သူတဦးက “စီးတီးစင်တာ အပေါ်ဆုံးထပ်မှာ လောင်းကစားရုံ ဖွင့်ထားတယ်။ သူက လူငယ်တွေ ဆော့တဲ့ ဂိမ်းစက်တွေနဲ့ လောင်းကစားစက်တွေ တွဲပြီး ဖွင့်ထားတာ။ အဓိက အကြွေစေ့နဲ့ထည့်ပြီး လောင်းကစားလုပ်လို့ရတဲ့ စက်တွေမှာ လူပိုစည်တယ်။ တချို့ (၁) ရက်တည်း ငွေသောင်းနဲ့ချီ ရှုံးတာတွေတောင် တွေ့ရတယ်” ဟု ပြောသည်။
၎င်း၏ ပြောပြချက်အရ (၃၆) ကောင် ဂျင်ဝိုင်းဆန်ဆန် တိရစ္ဆာန် အရုပ်လေးများကို လောင်းကြေးထပ်သည့် လောင်းကစားကို ကစားသူများကြောင်း သိရသည်။
၎င်းက “ကစားချင်တဲ့သူဟာ ပထမ အကြွေစေ့တွေကို အရင်လဲရတယ်။ ကျပ် (၁,ဝဝဝ) ကို အကြွေစေ့ (၁ဝ) စေ့ရတယ်။ ထိုးတဲ့သူတွေက တယောက်ကို တကြိမ်မှာ အကြွေစေ့ (၃ဝ-၄ဝ) ထိုးတယ်။ သူက ကိုယ်ထိုးထားတာ ပေါက်ရင် (၄-၅-၆) ဆ ကနေ အဆ (၂ဝ) အထိ စက်ကနေ အလျော်အစား လုပ်သွားပေးတယ်။ ရှုံးတယ်ဆို ကောင်တာမှာ အကြွေစေ့သွားဝယ်၊ ပြန်မယ်ဆိုရင် အကြွေစေ့တွေနဲ့ ငွေစက္ကူကို ပြန်လဲပေးတယ်။ တချို့ အကြွေစေ့ ရာနဲ့ချီ ကိုင်ပြီး လောင်းကစားလုပ်နေကြတာ တွေ့ရတယ်” ဟု ရှင်းပြသည်။
အဆိုပါ စီးတီးစင်တာသည် (၃) ထပ် အဆောက်အဦကြီးဖြစ်ပြီး မြေညီထပ်တွင် စတိုးဆိုင်နှင့် ဖက်ရှင်ဆိုင်များကို ဟန်ပြသဘော ဖွင့်လှစ်ထားကာ ပထမထပ်၌ Generation-X အမည်ရ နိုက်ကလပ်ဖွင့်ထားပြီး အပေါ်ဆုံးထပ်တွင်မူ လောင်းကစားရုံ ဖွင့်လှစ်ထားသည်။
လောင်းကစားရုံ အဝင်ဝတွင် ကျောင်းသူကျောင်းသားများ ကျောင်းချိန်အတွင်း ကျောင်းဝတ်စုံ ဝတ်ပြီး မဝင်ရ ဆိုသည့် စာတန်း ရေးထိုးထားသော်လည်း ကျောင်းသူကျောင်းသားများ ဝင်ထွက်နေကြကြောင်း မျက်မြင်များက ပြောသည်။
အဆိုပါ လောင်းကစားရုံ ဖွင့်လှစ်လုပ်ကိုင်သူများက ၎င်းတို့၏ ကုမ္ပဏီအမည်ကို ထုတ်ဖော်ကြေညာခြင်း မပြုသော်လည်း မန်နေဂျင်းဒါရိုက်တာမှာ ဒေါက်တာသိန်းမြင့်ဖြစ်ကြောင်း သိရသည်။
နအဖစစ်အစိုးရသည် စီးပွားရေးအရ အချက်အခြာကျသည့် မြေနေရာ အဆောက်အဦတို့ကို ၎င်းတို့နှင့် နီးစပ်သူများအား စီးပွားရေးလုပ်ငန်း လုပ်ကိုင်ခွင့် ပေးနေခဲ့ရာမှ ယခု စီးပွားရေးသမားများ မျက်စိအလွန်ကျသည့် မြို့လယ်ခေါင် လေဟာပြင်ဈေး မြေနေရာကို လောင်းကစားရုံနှင့် နိုက်ကလပ် ဖွင့်ခွင့်ပြုခဲ့ခြင်းဖြစ်သည်။
လောင်းကစားရုံတွင် ယခင်က မန်နေဂျာ လုပ်ခဲ့ဖူးပြီး ထောင်တနှစ်ကျခဲ့ဖူးသူတဦးက ယခု စီးတီးစင်တာတွင် လောင်းကစား လုပ်နေသည့် စက်များသည် စက်သစ်များ မဟုတ်ဘဲ ပြည်ထဲရေးဝန်ကြီးဌာနက ဖမ်းဆီးသိမ်းယူထားသည့်စက်များ ဖြစ်သည်ဟု ကြားသိရကြောင်း ပြောသည်။
No comments:
Post a Comment