ဂျိုင်းတံတားသစ်တွင် တံတားကြေးပိုကောက်ကုန်သည်များ ဒုက္ခရောက်

ရဲရင့်/ ၂၁ ဧပြီ ၂ဝ၁ဝ

ထိုင်း-မြန်မာ နယ်စပ်ကုန်သွယ်ရေး မဲဆောက်-မြ၀တီ ကုန်သွယ်မှုလမ်းကြောတွင် တည်ရှိသည့် ဂျိုင်းမြစ်ကူး ဗောတံတားအသစ်မှ ဖြတ်သန်းသည့် ကုန်တင်ယာဉ်များကို အာဏာပိုင်များက တံတားကြေး ပိုမိုကောက်ခံနေသည့်အတွက် သာမန်ကုန်သည်များ ဆုံရှုံးနစ်နာမှုများနှင့် ကြုံတွေ့နေရသည်။

ရန်ကုန်မြို့မှ မြန်မာကုန်သည်တဦးက “အခု ဒီတံတားသစ်ထိုးလိုက်တော့ အရင်လို ကုန်တွေ ကဲ့စရာမလိုတော့ပေမယ့် အာဏာပိုင်တွေက စစ်တပ်နဲ့ပတ်သက်တဲ့ ကုမ္ပဏီကားတွေ၊ တံတားဖြတ်ကြေးငွေ ပိုပေးနိုင်တဲ့လူတွေကို ဦးစားပေးကြတော့ အရင်ရောက်တဲ့ကားတွေက နောက်မှထွက်ရတာတွေကြောင့် အချိန်ကုန် ခရီးနှောင့်နှေးပြီး လုပ်ငန်း ထိခိုက်နစ်နာတာတွေ ပိုများလာတယ်” ဟု ပြောသည်။

လွန်ခဲ့သည့် (၁၅) နှစ်ခန့်က ဆောက်လုပ်ခဲ့သည့် ဂျိုင်းမြစ်ကူး သံမဏိကြိုးဆိုင်း တံတားမှာ ယမန်နှစ် စက်တင်ဘာလက တံတားခံနိုင်ရည်အား ကျဆင်းလာသဖြင့် တန်ချိန် (၃၀) ကျော် ကုန်တင်ယာဉ်များ ဖြတ်သန်းမှုကို ပိတ်ပင်လိုက်ပြီး ကုန်စည်များကို ကားငယ်များဖြင့်သာ ကဲ့ယူကြရသည့်အတွက် ထိုင်း-မြန်မာကုန်သွယ်ရာတွင် ပိုမိုနစ်နာကြရသည်ဟုလည်း ၎င်းက ပြောသည်။

ဗောတံတားသစ်အတွက် ဖြတ်သန်းခမှာ ကားကြီးတစီးလျှင် ကျပ် (၄) သောင်း ကောက်ခံသော်လည်း တံတားဖြတ်သန်းခ နှစ်ဆခန့် ပိုပေးနိုင်သည့် ကုန်ကားများကို ဦးစားပေးထွက်ခွာစေခြင်းကြောင့် အရင်ရောက်ပြီး ငွေပိုမပေးနိုင်သည့်ကားများမှ ကုန်သည်များမှာ အချိန်ကြန့်ကြာစွာ စောင့်ဆိုင်းကြရကြောင်း အဆိုပါကုန်သည်က ပြောသည်။

“နေ့စဉ် ဖြတ်သန်းတဲ့ ကုန်ကားကြီးတွေ (၁၅၀) လောက်ထဲမှာ ပါတဲ့ နေပြည်တော်ဆောက်လုပ်ရေး စီမံကိန်းအတွက် ထိုင်းဘက်က ပစ္စည်းတွေ တင်လာတဲ့ ဦးပိုင်လီမိတက်က ကားတွေကို ဦးစားပေးထွက်စေပြီး အလှည့်ကျစနစ်ဆိုတာ မရှိတော့ဘူး” ဟု ၎င်းက ပြောသည်။

ယခင် သံမဏိကြိုးဆိုင်းတံတားဟောင်းအနီးတွင် ယခုနှစ် ဖေဖော်ဝါရီလလယ်တွင် မြန်မာ့သစ်တောက်ငှက်ကုမ္ပဏီက တန်ချိန် (၃၀) ကျော် ဖြတ်သန်းနိုင်သည့် Pontoon Bridge အမျိုးအစား တံတားသစ်ကို အခကြေးငွေယူကာ ဖွင့်လှစ်ခဲ့ခြင်းဖြစ်သည်။

ကရင်ပြည်နယ် လမ်းတံတား ဆောက်လုပ်ရေးဌာနမှ အငြိမ်းစား အင်ဂျင်နီယာတဦးက “မြန်မာပြည်မှာဆောက်တဲ့ တံတားတွေက မြန်မာ့နည်းမြန်မာ့ဟန်တွေနဲ့ ဆောက်တာများတယ်။ နိုင်ငံတကာ စံချိန်စံညွှန်းတွေနဲ့အညီတော့ မဖြစ်ဘူး။ ကျနော်တို့လက်ထက်ကလည်း ဒီလိုပါပဲ။ အခုကြည့် ဂျိုင်းတံတား၊ ရန်ကုန်က ဘုရင့်နောင်တံတား ပြဿနာစတက်ပြီ။ ဒီတံတားတွေ ဆောက်တာ (၁၀) နှစ်ကျော်ပဲရှိသေးတယ်။ အစိုးရက ရေပါတာပဲ လိုချင်တယ်၊ ရေဘူးပေါက်တာ မလိုချင်ဘူး ဆိုတော့ ဒီအစိုးရလက်ထက်မှာ ထိုးတဲ့တံတားအကြီးက အစင်း (၁၀၀) ကျော်ရှိတယ်။ ဒီ တံတားပြဿနာက ဆက်တိုက်လာတော့မယ်” ဟု ပြောသည်။

ဂျိုင်းမြစ်ကူး ယာယီဗောတံတားအသစ်မှာ ရေတက်ရေကျကို ချိန်၍ သံဗောကြီးများကို အသုံးပြုပြီး သံဗောများပေါ်တွင် သစ်သားများခင်းကာ ကုန်တင်ကားကြီးများ တစီးချင်း ဖြတ်သန်းရသည့် Pontoon Bridge အမျိုးအစားဖြစ်သည်။