ဒီနေ့မြန်မာ့နိုင်ငံရေးကို စိတ်ဝင်စားသူအားလုံး အာရုံစိုက်နားစွင့်နေကြပြီး ဒီမိုကရေစီရေး လူ့အခွင့်အရေးနဲ့ စစ်မှန်တဲ့ ငြိမ်းချမ်းရေးနဲ့ ဖွံ့ဖြိုးတိုးတက်ရေးကို လိုလားကြသူအားလုံး ရင်တထိတ်ထိတ်စောင့်ကြည့်နေကြတဲ့ ကိစ္စကတော့ နအဖရဲ့ ရွေးကောက်ပွဲကော်မရှင်မှာ အန်အယ်လ်ဒီမှတ်ပုံတင်မလား မတင်ဘူးလားဆိုတဲ့ ကိစ္စဖြစ်တယ်။
အစောပိုင်းကတော့ အများက အန်အယ်လ်ဒီမှာ ရွှေဂုံတိုင်ကြေညာချက်စာတမ်းဆိုတဲ့ အခြေခံမူရှိပြီးသားဖြစ်တယ်။ အဲဒီအခြေခံမူနဲ့ နအဖ အခုထုတ်ပြန်လိုက်တဲ့ ရွေးကောက်ပွဲဥပဒေတွေဟာ ဖြောင့်ဖြောင့်ကြီးဆန့်ကျင်နေတာမို့ အန်အယ်လ်ဒီအနေနဲ့ အဲဒီရွေးကောက်ပွဲဥပဒေတွေနဲ့သွားပြီး ပတ်သက်စရာ ဘာအကြောင်းမှမရှိဘူး။ ဒါကြောင့် နအဖရွေးကောက်ပွဲ ကော်မရှင်ဆီမှာ မှတ်ပုံသွားတင်မှာ မဟုတ်ဘူးလို့ အစောပိုင်းကတော့ အများက ယုံကြည်ထားခဲ့ကြတယ်။ ကျန်းမာရေးမကောင်းလို့ဆိုပြီး အိမ်မှာ အနားယူနေတဲ့ ပါတီဥက္ကဋ္ဌဦးအောင်ရွှေ အဲဒီရွေးကောက်ပွဲဥပဒေတွေ စတင်ထုတ်ပြန်ကြေညာခဲ့ပြီးနောက် ပထမဆုံးကျင်းပတဲ့ ပါတီဗဟိုအလုပ်အမှုဆောင်အစည်းအဝေးကို မမျှော်လင့်ဘဲ ရုတ်တရက်ရောက်ရှိလာပြီး ပါတီမှတ်ပုံတင်ရေး အဆိုပြုချက်တင်သွင်းခဲ့တယ်ဆိုတဲ့ သတင်းတွေ ထွက်ပေါ်လာခဲ့တာတောင်မှ အဲဒီရွေးကောက်ပွဲဥပဒေတွေဟာ လုံးဝကို တရားမျှတမှုမရှိတဲ့ ဥပဒေတွေဖြစ်တယ်ဆိုတဲ့ အချက်အပေါ်မှာတော့ ပါတီခေါင်းဆောင်အားလုံးက သဘောညီကြတယ်ဆိုတဲ့ တဆက်တည်းထွက်ပေါ်လာတဲ့ သတင်းကြောင့် ဒီလိုမတရားမှန်း သိနေတဲ့ ဥပဒေတွေအောက်ကို ပြည်သူ့အရေးတော်ပုံပါတီတရပ်ဟာ ဘယ်တော့မှ ခေါင်းလျှိုဝင်မှာမဟုတ်ဘူး။ တကယ်လို့ ခေါင်းလျှိုဝင်ချင်တဲ့သူတွေရှိရင်လည်း အဲဒီလူတွေဟာ မဲခွဲဆုံးဖြတ်ရင် ရှုံးမှာပဲဆိုပြီး ပြည်သူတွေ အတန်အသင့် စိတ်အေးခဲ့ကြတယ်။
အခုတော့ ဆွေငြိမ်းညွန့်အုပ်စုဟာ “ငပြူးကပြဲ” ဆိုသလိုဖြစ်နေပြီ။ သူတို့ဟာ ပထမ ပါတီက ဆွေးနွေးစရာတောင်မလိုတဲ့ ကိစ္စကို ဆွေးနွေးလာအောင် ပါတီဗဟိုအလုပ်အမှုဆောင်ကော်မတီဝင်တွေဆိုတဲ့ ရာထူးအရှိန်အ၀ါကို အသုံးချပြီး လုပ်ဆောင်ခြင်းကြောင့် ပါတီပြိုကွဲပျက်စီးရေးအတွက် ပထမဆုံး သင်းခွဲဂိုဏ်းခွဲ ရာဇ၀တ်မှုကို ကျူးလွန်ခဲ့တယ်။ ဒုတိယအဆင့်မှာ မဲခွဲဆုံးဖြတ်လို့ အခြေအနေ မဟန်နိုင်မှန်းသိလာတဲ့အခါ အခြေခံမူကို ဆုပ်ကိုင်ထားသူတွေကို ပါတီက ထုတ်ပယ်နိုင်ဖို့ လှုံ့ဆော်ကြိုးပမ်းလာခြင်းဖြင့် ဒုတိယမြောက်ရာဇ၀တ်မှုကို ထပ်မံကျူးလွန်ခဲ့ပြန်တယ်။ အဲဒီတော့ သူတို့ဟာ နိုင်ငံရေးပါတီများဆိုင်ရာ ပါရာဇိကံထိုက်တဲ့ ပြစ်မှုတွေကို ကျူးလွန်ခဲ့သူဖြစ်တယ်လို့ ဆိုရတော့မယ်။Mandate ရထားတဲ့ သူနှစ်ဦးကပဲ မှတ်ပုံတင်ရေး မတင်ရေးကိစ္စကို ဆုံးဖြတ်မယ်ဆိုတဲ့ စကားကလည်း မရှက်လို့ပြောတာ ဖြစ်တယ်လို့သာ ပြောရတော့မယ်။ အဲဒီတုန်းက အဆင့်ဆင့်သော ပါတီခေါင်းဆောင်တွေနဲ့ ပြည်သူ့လွှတ်တော် ကိုယ်စားလှယ်တွေက အင်မတန်ကျပ်တည်းတဲ့ အခြေအနေတရပ်အောက်မှာ ဒေါ်စုနဲ့ ဦးအောင်ရွှေကို ဘာအတွက် Mandate ပေးခဲ့ကြတာလဲ။ ၉၀ ရွေးကောက်ပွဲရလဒ် အကောင်အထည်ဖော်ရေးနဲ့ ပြည်သူ့လွှတ်တော်ပေါ်ပေါက်ရေးအတွက်သာဖြစ်တယ်။ အခု နအဖရဲ့ တရားမျှတမှု နည်းနည်းလေးမှမရှိတဲ့ ရွေးကောက်ပွဲဥပဒေတွေအောက်မှာ ပါတီကို မှတ်ပုံသွားတင်ရေးကိစ္စနဲ့ အဲဒီ Mandate က ပေးထားတဲ့တာဝန်တွေဟာ အနှစ်သာရအရ အဖြူနဲ့ အမည်းဖြစ်တယ်ဆိုတာ မြန်မာ့နိုင်ငံရေးကို ကကြီး၊ ခကွေး အဆင့်လောက် နားမလည်သူတောင် သဘောပေါက်နိုင်တဲ့ ကိစ္စဖြစ်တာကြောင့် ဆွေငြိမ်းညွန့်အုပ်စု နားမလည်တာတော့ မဖြစ်နိုင်ဘူး။ ဂယောင်ချောက်ချား ဆွဲမိဆွဲရာ ဆွဲထုတ်လာတာပဲ ဖြစ်နိုင်တယ်။
နောက်ပြီး ဆွေငြိမ်းညွန့်အုပ်စုနဲ့ နအဖအကြား အံ့သြစရာမကောင်းတဲ့ အံ့သြစရာအပြောအဆို တိုက်ဆိုင်မှုတခုရှိနေတာကို အခုတလောမှာ ပိုပြီးထင်ထင်ရှားရှားတွေ့လာနေရတယ်။ အဲဒါကတော့ ဒေါ်အောင်ဆန်းစုကြည်ကိစ္စကို ပုဂ္ဂိုလ်ရေး ကိစ္စတခုအဖြစ် အုပ်စုနှစ်ခုစလုံးက ပြောဆိုနေကြတာဖြစ်တယ်။
ဒေါ်အောင်ဆန်းစုကြည်ဟာ သာမန်အညတရတယောက်မဟုတ်ဘူး။ ဒီမိုကရေစီလိုလားတောင်းဆို ရုန်းကန်တိုက်ပွဲဝင်နေကြတဲ့ မြန်မာ့ပြည်သူ ကမ္ဘာ့ပြည်သူတရပ်လုံးရဲ့ သင်္ကေတဖြစ်တယ်ဆိုတာကို မြန်မာ့ပြည်သူ၊ ကမ္ဘာ့ပြည်သူအားလုံးက သိကြသလို နအဖကလည်း ကောင်းကောင်းသိတယ်။ ဒါပေမယ့် အဲဒီအသိကို လက်ခံပုံချင်းတော့ မတူဘူး။ ပြည်သူတွေက ချစ်ခင်လေးစားကြည်ညိုအားကျစိတ်နဲ့ လက်ခံကြပြီး နအဖက စက်ဆုပ်ရွံရှာ မနာလိုဝန်တိုစိတ်နဲ့ လက်ခံတာဖြစ်တယ်။
ဒေါ်စုဟာ ဒီမိုကရေစီလိုလားတဲ့ မြန်မာ့ပြည်သူ၊ ကမ္ဘာ့ပြည်သူတွေရဲ့ သင်္ကေတဖြစ်တာကြောင့်လည်း ဒီမိုကရေစီနဲ့ ဆန့်ကျင်ဘက်ဖြစ်တဲ့ စစ်အာဏာရှင်စနစ်ကို ရာသက်ပန်တည်ရှိသွားစေလိုတဲ့ နအဖက ဒေါ်စုကို သူတို့သမိုင်းတလျှောက် နည်းလမ်းပေါင်းစုံသုံးပြီး ဖျောက်ဖျက်ချေမှုန်းဖို့ ကြိုးစားခဲ့ ကြိုးစားနေတာဖြစ်တယ်။ ဒါဟာ နအဖက ဒေါ်အောင်ဆန်းစုကြည်ဆိုတဲ့ ကလေးနှစ်ယောက်မိခင် မုဆိုးမ သာမန်အမျိုးသမီးတဦးကို တိုက်ခိုက်နေတာ မဟုတ်ဘူး။ စစ်ပွဲတပွဲမှာ ရန်သူ့အလံကို ဆွဲချပြီး မိမိအလံကိုလွှင့်ထူနိုင်ဖို့ စစ်သည်ပေါင်းများစွာရဲ့ အသက်ကိုရင်းနှီးတာဟာ သာမန်အ၀တ်စတစအတွက် ရူးသွပ်မိုက်မဲကြတာမဟုတ်ဘူး။ အရေးအကြီးဆုံး သင်္ကေတတခုအတွက် လူ့အသက်တွေနဲ့ လောင်းကြေးထပ်ကြတာဖြစ်တယ်။ ဒေါ်အောင်ဆန်းစုကြည် ကိစ္စဟာလည်း ဒီအတိုင်းဖြစ်တယ်။
နအဖက ဒါကိုကောင်းကောင်းသိပေမယ့် ဒေါ်စုကို သာမန်ပုဂ္ဂိုလ်တဦးအဖြစ် ပြောဆိုနေတာက ရိုးသားဖြောင့်မှန်မှုမရှိတဲ့ အတ္တ၀ါဒီသူတို့အုပ်စုရဲ့ အကျိုးစီးပွားအတွက် သက်သက်ကြောင့်သာဖြစ်တယ်။ ဒါက သိပ်ရှင်းတယ်။ ဒါပေမယ့် ဘ၀ရဲ့ အချိန်ကာလအတော်များများကို ထောင်ထဲမှာပေးဆပ်ခဲ့ကြရတဲ့ ဆွေငြိမ်းအုပ်စုက နအဖရဲ့ အဲဒီစကားကို သံယောင်လိုက်နေတာကတော့ အံ့သြစရာလား၊ သနားစရာလား မသိနိုင်တော့ဘူး။
အခုတော့ ကမ္ဘာ့ဒီမိုကရေစီလှုပ်ရှားရုန်းကန်မှုကြီးရဲ့ အထင်ရှားဆုံး သင်္ကေတဖြစ်တဲ့ လူထုခေါင်းဆောင် ဒေါ်အောင်ဆန်းစုကြည်ကလည်း သူ့သဘောထားကို ရှင်းရှင်းလင်းလင်း ပြောဆိုလိုက်ပြီဖြစ်တယ်။ ဒီအခြေအနေမှာ ဆွေငြိမ်းညွန့်အုပ်စုအနေနဲ့ မိမိတို့ရဲ့ အတွေးအခေါ်မှား၊ အယူအဆမှားကြီးကို စွန့်လွှတ်ပြီး နအဖဘက်ကို ပြတ်ပြတ်သားသား ကျောခိုင်းကာ ပြည်သူဘက်ကို ပြန်လည်မျက်နှာမူဖို့ သိပ်ကိုအရေးကြီးနေပြီ။ ဒီမိုကရေစီရေးအတွက် အစဉ်တစိုက် ပေးဆပ်ရင်းနှီး လုပ်ဆောင်လာခဲ့သူများအဖြစ် သူတို့ကို ပြည်သူတွေက အခုအထိတော့ အသိအမှတ်ပြု ကျေးဇူးတင်နေကြဆဲ ဖြစ်တယ်။ ဒါပေမယ့် နအဖနဲ့အတူ အသူတရာနက်တဲ့ချောက်ထဲ ခုန်ချသွားကြပြီဆိုရင်လည်း သူတို့အတွက် ပြည်သူတွေက ၀မ်းနည်းပူဆွေးနေကြမှာတော့ မဟုတ်ဘူး။ အကြောင်းကတော့ သွေးဆိုးပြည်ပုပ်မှန်ရင် ခန္ဒာကိုယ်ထဲမှာ မရှိတာက ပိုကောင်းတယ်ဆိုတာကို သမိုင်းအတွေ့အကြုံတွေအရ မြန်မာပြည်သူတွေက သိထားကြပြီး ဖြစ်လို့ပဲ။
No comments:
Post a Comment