ထိုင်းဘက်မှမြန်မာဘက်သို့ ပြန်ပို့ရန် နောက်ဆုံးအသုတ်အဖြစ် ကျန်ရှိနေသည့် ကရင်စစ်ပြေးဒုက္ခသည် (၆၅၃) ဦးကို ယမန်နေ့က မြန်မာဘက်ခြမ်းသို့ ပြန်ပို့လိုက်သည်။
ထိုင်းနိုင်ငံ တာ့ခ်ခရိုင် ထာ့ဆောင်ရန်းမြို့နယ်ရှိ ယာယီဒုက္ခသည်စခန်းများဖြစ်သည့် နောင်ဘိုးရွာမှ (၁၀၃) ဦးနှင့် မဲ့အူးစူရွာမှ (၅၅၀) ဦးတို့ကို ထိုင်းအာဏာပိုင်များနှင့် အစိုးရမဟုတ်သောအဖွဲ့များ၏ စီစဉ်ပေးမှုဖြင့် ပြန်ပို့ခဲ့ခြင်းဖြစ်သည်။
နေရပ်ပြန်သည့်ဒုက္ခသည်များ မြန်မာဘက်ခြမ်းတွင် စားသောက်ရန်အတွက် ထိုင်း-မြန်မာနယ်စပ်တလျှောက် ကူညီစောင့်ရှောက်ရေးညွန့်ပေါင်းအသင်း (တီဘီဘီစီ) အဖွဲ့က (၃) လစာ စားနပ်ရိက္ခာများ ကူညီထောက်ပံ့ပေးပြီး ကျန်အလှူရှင်အဖွဲ့များက အိုးခွက်ပန်းကန်၊ စောင်၊ ခြင်ထောင်နှင့် ဖျာများ ပေးဝေကြသည်။
နေရပ်ပြန်သည့် ဒုက္ခသည် စောဖားသူးက “အမှန်အတိုင်းပြောရရင် ဟိုမှာပြန်နေတာက ဘာကိုမှ စိတ်ချလက်ချနေလို့ မရသေးဘူး။ တောထဲတောင်ထဲမှာ မိုင်းအန္တရာယ်ကလည်း ရှိသေးတယ်။ ဒီကေဘီအေနဲ့ ဗမာစစ်တပ်ရန်က ရှိသေးတယ်။ ဒီလို ဒုက္ခတွေ မကြုံဖူးတော့ ဘယ်သူမှ ကိုယ်ချင်းစာတတ်မှာမဟုတ်ဘူး။ ငါတို့မပြန်ချင်ပေမယ့် အခြေအနေက မပြန်လို့ မဖြစ်တော့ဘူး” ဟု ပြောသည်။
ပြန်ပို့မှုကို ဦးဆောင်ခဲ့သည့် ထိုင်းရိန်းဂျားတပ်ဖွဲ့ (ထပ်ဟန်ဖန်း) မှ ဗိုလ်မှူးကြီးနုပ်ဖဒွန် ၀ချီရကျစ်ဘာဝန်က “သူတို့အားလုံး သူတို့ဆန္ဒအရ ပြန်သွားကြတာဖြစ်တယ်။ အစိုးရမဟုတ်တဲ့ အဖွဲ့တွေကလည်း စားနပ်ရိက္ခာတွေ စီစဉ်ပေးပါတယ်။ ကျနော်တို့ကတော့ ပြန်နိုင်ဖို့နဲ့ လုံခြုံရေးအတွက် စီစဉ်ပေးပါတယ်” ဟု သတင်းထောက်များကို ပြောသည်။
ယခု ပြန်ပို့ခံရသူများသည် ယမန်နှစ်ဇွန်လက ထိုင်း-မြန်မာနယ်စပ်အနီး ဒီကေဘီအေ၊ နအဖပူးပေါင်းတပ်များနှင့် ကရင်အမျိုးသားလွတ်မြောက်ရေးတပ်မတော် တပ်မဟာ (၇) တို့ တိုက်ပွဲရက်ရှည်ဖြစ်ပွားခဲ့ခြင်းကြောင့် ထိုင်းနိုင်ငံဘက်သို့ ထွက်ပြေးလာကြသည့် ကရင်ပြည်နယ် လှိုင်းဘွဲ့မြို့နယ်အတွင်းမှ ရွာသားများဖြစ်သည်။
တိုက်ပွဲများဖြစ်ပွားစဉ်က ထွက်ပြေးလာသည့် စစ်ပြေးဒုက္ခသည်များမှာ (၄,၀၀၀) ခန့်ရှိပြီး တိုက်ပွဲများပြီးဆုံး၍ တလခန့်တွင် စစ်ပြေးဒုက္ခသည် (၁,၈၀၀) ခန့်မှာ ၎င်းတို့ဆန္ဒအရ နေရပ်ပြန်သွားကြသည်ဟု ထိုင်းဘက်က ပြောသည်။
ကျန်လူများမှာ ၎င်းတို့ဆန္ဒအရ အုပ်စုလိုက် အလီလီနေရပ်ပြန်နေကြသဖြင့် ယမန်နေ့က နေရပ်ပြန်ကြသူများမှာ နောက်ဆုံးအသုတ်ဖြစ်ပြီး လက်ရှိ ထိုင်းနယ်စပ်တွင် စစ်ပြေးဒုက္ခသည်များ မရှိတော့ဟု ထိုင်းလုံခြုံရေးအဖွဲ့က ပြောသည်။
မြန်မာနိုင်ငံတွင်းမှ တိုက်ပွဲများကြောင့် ထွက်ပြေးလာသော စစ်ပြေးဒုက္ခသည်များကို ထိုင်းနိုင်ငံအနေဖြင့် နယ်စပ်ဖြတ်ကျော်ခွင့်နှင့် ယာယီခိုလှုံခွင့်များ ပေးထားသော်လည်း တိုက်ပွဲများ ပြီးဆုံးသွားချိန်တွင် ဒုက္ခသည်များကို မြန်မာနိုင်ငံဘက်သို့ ပြန်ပို့လေ့ရှိသည်။
No comments:
Post a Comment