မြတ်ခိုင်ဦး / ၂၀ မေလ ၂၀၁၀
ထိုင်းနိုင်ငံတွင် အလုပ်လုပ်၍ ပြန်လာသူများအား မြဝတီအထွက် ရဲစစ်ဆေးရေးဂိတ်မှ ရဲမေများကိုယ်တိုင် အတင်းအဓမ္မ ငွေညှစ် တောင်းခံနေကြောင်း သိရသည်။
မြဝတီမြို့မှ ကော့ကရိတ်သို့ သွားရာလမ်းရှိ မြဝတီမြို့အထွက် တောင်ပေါ်အတက်တွင် ရှိနေသော ရဲစစ်ဆေးရေးဂိတ်မှ ရဲမေများကိုယ်တိုင် အကြောင်းအမျိုးမျိုးပြ၍ ငွေတောင်းနေကြောင်း ငွေအတောင်းခံခဲ့ရသူတဦးက ခေတ်ပြိုင်သို့ပြောသည်။
ပြီးခဲ့သည့် မေ (၁၆) ရက် မြဝတီမှ ကော့ကရိတ်သို့သွားသည့် လူငယ်စုံတွဲအား ထိုင်းနိုင်ငံမှ အလုပ်လုပ်ပြန်လာသည်ဟုဆိုကာ ဂိတ်ထိုင်စစ်ဆေးနေသော ရဲမေက ငွေကျပ် (၃,၀၀၀) အတင်းအကျပ်တောင်းယူကြောင်း ကိုယ်တွေ့ခံစားခဲ့ရသူ မနီလာက ပြောသည်။
၎င်းက “ကျမတို့မြဝတီက ထွက်လာတော့ အဲဒီတောင်အတက်ဂိတ်မှာ ရဲမေ (၂) ဦးက ကျမကို စစ်တယ်။ မှတ်ပုံတင်ပါလား ဘာလားပေါ့၊ လက်ဝတ်လက်စားတွေလည်း ချွတ်ခိုင်းတယ်။ အဲဒါပြီးတော့ လက်ပတ်နာရီကို ချွတ်ခိုင်းရော။ အဲဒီမှာ ကျမက အချိန်ကို မပြောင်းထားမိဘူး။ အဲဒါသူတို့က ပြောတယ်။ ညည်းထိုင်းက ပြန်လာတာ ပတ်စပို့စ်လာလုပ်တာ ငါတို့သိတယ်။ နာရီက နာရီဝက်ကွာနေတယ်လို့ သူတို့ အဲလိုပြောတယ်” ဟု ဆိုသည်။
ထို့နောက် မနီလာထံမှ ငွေကျပ် (၃,၀၀၀) တောင်းသဖြင့် မနီလာ၏အမျိုးသား ကိုစောဦးက ကြားဝင်ညှိနှိုင်းပေးခဲ့သဖြင့် ကျပ် (၂,၀၀၀) နှင့် အဆင်ပြေသွားခဲ့သည်ဟု သိရသည်။
ကိုစောဦးက “ကျနော့်ကိုတော့ ယောက်ျားရဲစစ်တာ။ ပြီးတော့ သူ့ဆီသွားတော့ သူ့ကို ဟိုဟာပြော ဒီဟာပြောလုပ်ပြီး ရစ်နေတာ။ ပြီးတော့ ငွေ (၃,၀၀၀) ပေးရမယ်လို့ပြောတယ်။ အဲဒါနဲ့ ကျနော်က ငွေ (၁,၀၀၀) တော့ ယူပါ ပြောတယ်။ ဒါကိုမရဘူး၊ နောက်ဆုံးကြတော့ (၂,၀၀၀) နဲ့ အဆင်ပြေသွားရော” ဟု ပြောသည်။
အဆိုပါဂိတ်သည် ရဲစစ်ဆေးရေးဂိတ်ဖြစ်ပြီး ရဲမေ (၂) ဦးက လူပုံသဏ္ဌာန် အနေအထားပေါ် မူတည်ပြီး ငွေညှစ်လေ့ရှိကြောင်း ကိုစောဦးက ပြောသည်။
ထိုနေ့သည် မြဝတီသို့ ကားအတက်ဖြစ်သဖြင့် မိမိတို့သွားလိုရာခရီးသို့ အငှားဆိုင်ကယ်ဖြင့်သာ သွားရကြောင်း၊ နေရာဒေသအပေါ်လိုက်၍ ဈေးအမျိုးမျိုးရှိကြောင်း၊ လမ်းတွင်လည်း ဂိတ်အကြီး (၃) ခုအပါအ၀င် ဂိတ်အသေးလေးများ အများအပြားရှိသည်ဟု ၎င်းက ပြောသည်။
မြဝတီနှင့်ကော့ကရိတ်သည် တရက်ခြားတခါ အတက်အဆင်းဖြင့် ကုန်သည်များ၊ ခရီးသွားများ သွားလာရလေ့ရှိပြီး ထိုင်းနိုင်ငံမှ အလုပ်လုပ်ကိုင်နေသော ရွှေ့ပြောင်းအလုပ်သမားများသည် မိမိတို့ သာရေးနာရေးအတွက် အရေးပေါ်သွားလာရလျှင် ကားတန်းမရှိသောနေ့ဖြစ်ပါက ယခုကဲ့သို့ အငှားဆိုင်ကယ်ဖြင့် သွားလာရလေ့ရှိပြီး မြဝတီမှ ကော့ကရိတ်သို့ (၅,၀၀၀) ကျပ် ပေးရသည်။
မြန်မာစစ်ဆေးရေးဂိတ် တာဝန်ကျများက အချိန်နာရီ အပြောင်းအလဲ မလုပ်မိသည့် အသေးအမွှားကိစ္စလေးမှအစ စစ်ဆေးကာ ယခုကဲ့သို့ မတရား ငွေညှစ်တောင်းခံမှုများရှိနေသဖြင့် ရွှေ့ပြောင်းအလုပ်သမားများအနေဖြင့် ခရီးသွားလာရာတွင် အထူးသတိထားရန်လိုအပ်ကြောင်း အလုပ်သမားအရေး ဆောင်ရွက်နေသူတို့က သတိပေးပြောဆိုသည်။
No comments:
Post a Comment