မြန်မာ နိုင်ငံသည် နိုင်ငံ တကာတွင် လူကုန်ကူးမှု တိုက်ဖျက်ရေး အဆိုးဆုံး အဆင့် ၃ တွင် ရှိနေကြောင်း အမေရိကန် နိုင်ငံခြားရေး ဌာန၏ ၁၀ နှစ်မြောက် အစီရင် ခံစာတွင် ထုတ်ပြန် လိုက်သည့် အတွက် ဗိုလ်မှူးချုပ် ရဲချုပ်ခင်ရီက မကျေမနပ် ဖြစ်နေကြောင်း နေပြည်တော် စစ်တပ် အသိုင်းအ၀န်းနှင့် နီးစပ်သူများထံမှ သိရသည်။“လူကုန်ကူးမှု တားဆီး ကာကွယ်တဲ့ သင်တန်းတွေ ဖွင့်တာ၊ ရဲတပ်ဖွဲ့ အောက်မှာ ရှိတဲ့ နိုင်ငံဖြတ်ကျော် မှုခင်းဌာနက လူကုန် ကူးမှု တားဆီး ကာကွယ်ရေး ဌာနတွေနဲ့ ပေါင်းပြီး လှုပ်ရှား တာတွေ လုပ်နေရဲ့ သားနဲ့ စစ်အစိုးရက အရေးယူ ကိုင်တွယ် တာတွေ လျော့ရဲ နေတယ် ဆိုတော့ ရဲချုပ်က အရမ်းကို ဒေါသထွက် နေတယ်” ဟု နေပြည်တော် မြန်မာနိုင်ငံ ရဲတပ်ဖွဲ့မှ ရဲ အရာရှိ တဦးက ပြောသည်။
အဆိုပါ ထုတ်ပြန်ချက်ကို မကျေနပ်သဖြင့် ရဲချုပ်ခင်ရီက သတင်းစာ ရှင်းလင်းပွဲ ပြုလုပ်သွားမည် ဖြစ်ကြောင်းလည်း နေပြည်တော် သတင်း ရပ်ကွက်တွင် ပြောဆိုနေ ကြသည်။
ယင်းကဲ့သို့ ပြောဆိုချက်များရှိသော်လည်း အာဏာပိုင်များက အမေရိကန်နိုင်ငံခြားရေးဌာနသို့ စာပို့၍ တုန့်ပြန်ခြင်း မရှိသေးသကဲ့သို့ စစ်အစိုးရပိုင် သတင်းစာများတွင် ယခုအချိန်အထိ တရားဝင် ဖြေရှင်းခြင်း မရှိသေးပေ။
ဇွန်လ ၁၄ ရက်နေ့က ထုတ်ပြန်ခဲ့သော လူကုန်ကူးမှု တိုက်ဖျက်ရေး အစီရင်ခံစာတွင် နိုင်ငံတကာ စံနှုန်း သတ်မှတ်ချက်ကို လိုက်နာခြင်း မရှိသည့် ၁၃ နိုင်ငံ၌ အီရန်၊ မြောက်ကိုရီးယား၊ မြန်မာနှင့် ကျူးဘားနိုင်ငံများပါဝင်ပြီး အမေရိကန် ပြည်ထောင်စု၏ ဒဏ်ခတ် အရေးယူမှုနှင့် ရင်ဆိုင်ရဖွယ်ရှိသည်ဟု ဖော်ပြထားသည်။
မြန်မာနိုင်ငံသားများသည် ၎င်းတို့ ရင်ဆိုင်နေရသော နိုင်ငံရေးနှင့် စီးပွားရေး ပြဿနာများကြောင့် အိမ်နီးချင်းနိုင်ငံများတွင် တရားဝင် နည်းလမ်းများ၊ တရားမ၀င် နည်းလမ်းများဖြင့် အလုပ်ရှာဖွေလုပ်ကိုင်ရင်း တချို့မှာ လူကုန်ကူးသူ များ၏ သားကောင်ဖြစ်ကာ ပြည့်တန်ဆာ ဖြစ်သွားရသည့် အမှုများကို အထက်ပါ အစီရင်ခံစာတွင် ဖော်ပြထားသည်။
ထို့ကြောင့် မြန်မာစစ်အစိုးရသည် နိုင်ငံရေးနှင့် စီးပွားရေးပြဿနာများကို စနစ်တကျ ကိုင်တွယ်ဖြေရှင်းရန် လိုအပ်ကြောင်း အစီရင်ခံစာက ဆိုထားသည်။
“နယ်စပ်ဒေသတွေမှာက ဖမ်းတယ်၊ လွတ်လာတော့ ပြန်လုပ်တယ်။ ဒီလို ဖမ်းပြီး လူကုန်ကူးမှုကို လျော့ကျအောင် လုပ်တာက နည်းလမ်းမှန် မဟုတ်သေးဘူးလို့ မြင်မိတယ်။ ကိုယ့်နိုင်ငံတွင်းမှာပဲ စားဝတ်နေရေးအတွက် လောက်ငတဲ့ စီးပွားရေး အခြေအနေတွေကို ဖန်တီးပေးနိုင်မယ်ဆိုရင် ဒီလိုပြဿနာတွေ လျော့နိုင်သွားနိုင်မယ်” ဟု လူမှုဝန်ထမ်း ကယ်ဆယ်ရေးနှင့် ပြန်လည် နေရာချထားရေးဌာနမှ အရာရှိတဦးက ပြောသည်။
မလေးရှားနိုင်ငံနှင့် ထိုင်ဝမ်နိုင်ငံတို့သည် လူကုန်ကူးမှုတိုက်ဖျက်ရေးနှင့် ပတ်သက်၍ တိုးတက်မှုရှိလာကြောင်း၊ အစီရင် ခံစာအရ အဆင့် ၂ မှ အမြင့်ဆုံး အဆင့် ၁ သို့ တိုးမြှင့်ပေး ခံခဲ့ရကြောင်း ယင်းအစီရင်ခံစာတွင် ဖော်ပြထားသည်။
အစီရင်ခံစာအရ မြန်မာနိုင်ငံ လူကုန်ကူးခံရမှုများနှင့် ပတ်သက်၍ ထိုင်းနိုင်ငံနှင့် စင်ကာပူနိုင်ငံတို့အား အမေရိကန်နိုင်ငံ၏ စောင့်ကြည့်ခြင်း ခံရသော နိုင်ငံများအဖြစ် ထည့်သွင်းထားကြောင်းလည်း သိရသည်။
ထိုင်းနိုင်ငံခြားရေး ၀န်ကြီးဌာနက ၎င်းနိုင်ငံကို လူမှောင်ခိုကူးသည့် စောင့်ကြည့်နိုင်ငံ စာရင်းတွင် ထည့်သွင်းခံရခြင်းကြောင့် စိတ်ပျက် မိကြောင်း ထုတ်ဖော်ပြောကြားထားသည်။
ထိုင်းနိုင်ငံခြားရေးဝန်ကြီးဌာန ဒုတိယပြောရေးဆိုခွင့်ရှိသူ Thani Thongphakdi က “လူမှောင်ခို ကူးတဲ့ ကိစ္စတွေနဲ့ ပတ်သက်ပြီး ထိုင်းနိုင်ငံအနေနဲ့ တိုးမြှင့်ဆောင်ရွက်နေတာတွေ၊ ကြိုးပမ်းဆောင်ရွက်နေတာတွေကို အမေရိကန်နိုင်ငံအနေနဲ့ ထည့်သွင်း စဉ်းစားတာတွေမရှိဘူး။ အမေရိကန်နိုင်ငံက ထိုင်းနိုင်ငံကို ဘယ်အဆင့်မှာပဲ သတ်မှတ် သတ်မှတ် ထိုင်းနိုင်ငံ အနေနဲ့ ဒီကိစ္စတွေကို ဆက်လက်ကိုင်တွယ်ဖြေရှင်းသွားဖို့ရှိပါတယ်” ဟု ပြောကြားခဲ့သည်။
စင်ကာပူအစိုးရကလည်း ၎င်း နိုင်ငံကို စောင့်ကြည့်စာရင်းတွင် ထည့်သွင်းထားခြင်း အပေါ် အလားတူ မေးခွန်းထုတ်ခဲ့သည်။
စင်ကာပူ နိုင်ငံခြားရေးဝန်ကြီးဌာနက ယင်းသို့ ထည့်သွင်းထားခြင်းအား စိတ်ရှုပ်ထွေးမိကြောင်း၊ နောက်ရက်များတွင် အစီရင်ခံစာနှင့် ပတ်သက်၍ သင့်လျော်သော နည်းလမ်းများဖြင့် အသေးစိတ် တုန့်ပြန်သွားရန်ရှိကြောင်း၊ ယင်း အစီရင်ခံစာသည် လေ့လာသုံးသပ်ချက် တခုဆိုသည်ထက် အမေရိကန်နိုင်ငံ၏ လုပ်ရိုးလုပ်စဉ် နိုင်ငံရေး လုပ်ဆောင်ချက် တရပ်အဖြစ် မြင်မိကြောင်း ပြောခဲ့သည်။
No comments:
Post a Comment