ခင်ဦးသာ Thursday, 25 November 2010
ရွေးကောက်ပွဲတွင် နေရာအနည်းငယ်သာ အနိုင်ရခဲ့သော တိုင်းရင်းသားပါတီ ခေါင်းဆောင်များက ပေါ်ပေါက်လာမည့် လွှတ်တော်အတွင်း ရသလောက် အခြေအနေတွင် ဝင်ရောက် ပြောဆို ဆွေးနွေးမည်ဖြစ်ပြီး ရွေးကောက်ပွဲ မဲ မသမာမှုများ အပေါ်လည်း ဥပဒေကြောင်းအရ ဆက်လက် ဆောင်ရွက်သွားမည် ဖြစ်ကြောင်း ပြောဆိုသည်။
“ကျနော်တို့ပါတီ အနေနဲ့ ရွေးကောက်ပွဲရလဒ်တွေ တရားမမျှတတာတွေကိုလည်းပဲ ဥပဒေကြောင်းအရ ဆောင်ရွက်သွားမှာ ဖြစ်သလို လွှတ်တော်ထဲမှာလည်း ပြုပြင်ရမယ့် ဥပဒေ တွေကို ဆွေးနွေး ပြောဆိုသွားမယ်။ တိုင်းရင်းသားတွေ တန်းတူ အခွင့်အရေး ရဖို့နဲ့ ကိုယ်ပိုင်ပြဌာန်းခွင့် ရရှိဖို့တွေကို ပြောဆိုသွားမယ်” ဟု ရခိုင်တိုင်းရင်သားများ တိုးတက်ရေးပါတီ (RNDP) ဥက္ကဋ္ဌ ဒေါက်တာအေးမောင်က ပြောသည်။
မကြာမီပေါ်ပေါက်လာမည့် လွှတ်တော်၌ စစ်အစိုးရ ကိုယ်စားပြုထားသည့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) ၏ ကိုယ်စားလှယ်များက အမတ်နေရာ အများစုကို ယူထားသည့်အပြင် တပ်မတော်သား အမတ်က ၂၅ ရာခိုင်နှုန်း နေရာ ရရှိနေမည်ဖြစ်ကြောင်း၊ လွှတ်တော်တခုလုံး၌ စစ်အစိုးရ ကိုယ်စားလှယ် များက ဦးဆောင်သွားမည် ဖြစ်သော ကြောင့် တိုင်းရင်းသား ကိုယ်စားလှယ်များက ညီညွတ်ရန် အရေးကြီးကြောင်း တိုင်းရင်းသား ခေါင်းဆောင်များက ဆိုသည်။
“၈၀ ရာခိုင်နှုန်းလောက်ကို ကြံ့ဖွံ့က အနိုင်ယူထားတော့ ကျနော်တို့တိုင်းရင်းသား ကိုယ်စားလှယ်တွေ အတွက် ပြောဆို ဆွေးနွေးပိုင်ခွင့် အပြည့်မရတာ သေချာပါတယ်” ဟု ချင်းတိုးတက်ရေးပါတီ (CPP) ၏ ဥက္ကဋ္ဌ ဦးလုံစီက ဧရာဝတီကို ပြောသည်။
CPP ပါတီသည် လွှတ်တော် ၃ ရပ်၌ ၃၈ နေရာ ၀င်ပြိုင်ရာတွင် ၁၂ နေရာ အနိုင်ရကြောင်း ၎င်းကဆိုသည်။
ရရှိသည့် အခြေအနေပေါ် မူတည်၍ ချင်း တိုင်းရင်းသားများ၏ အခွင့်အရေးကို ပြောဆိုသွားမည် ဖြစ်ကြောင်း၊ ချင်းအမျိုး
သား ပါတီအပြင် တခြား တိုင်းရင်းသားပါတီ များနှင့် ပူးပေါင်းကာ တိုင်းရင်းသားများ အရေးကိုပါ ပြောဆိုသွားမည်ဖြစ်ကြောင်း ဦးလုံစီက ဆက်ပြောသည်။
၂၀၀၈ ဖွဲ့စည်းပုံအရ ပြောဆိုဆွေးနွေးခွင့် အပြည့်မရသော်လည်း အတိုင်းအတာတခုအထိ ရမည်ဟု မျှော်လင့်ကြောင်း ဒေါက်တာ အေးမောင်က ဆိုသည်။
လွှတ်တော်ထဲတွင် ရခိုင်ပြည်နယ်အတွက် လျှပ်စစ်ကဏ္ဍကို ပထမ ဦးစားပေး ပြောဆိုသွားမည်ဟု ဒေါက်တာ အေးမောင်က ဆိုသော်လည်း လျှပ်စစ်ကဏ္ဍ၏ အဓိက အရေးပါသော လုပ်ပိုင်ခွင့်ကို ၂၀၀၈ ဖွဲ့စည်းပုံအရ ဗဟိုမှ ချုပ်ကိုင်ထားကြောင်း တွေ့ရသည်။
RNDPပါတီသည် လွှတ်တော် ၃ ရပ်၌ ၄၄ နေရာဝင်ပြိုင်ရာ ၃၅ နေရာ အနိုင်ရရှိခဲ့သည်။
၂၀၀၈ ဖွဲ့စည်းပုံနှင့်ရွေးကောက်ပွဲ ရလဒ်အရ လာမည့်လွှတ်တော်၌ စစ်သားကိုယ်စားလှယ်နှင့် ကြံ့ဖွံ့ကိုယ်စားလှယ် အရေအတွက်သည် ပြည်သူ့လွှတ်တော်တွင် ၈၅ ရာခိုင်နှုန်းနီးပါး၊ အမျိုးသားလွှတ်တော်တွင် ၈၂ ဒသမ ၅၈ နှင့် တိုင်းဒေသကြီးနှင့် ပြည်နယ်လွှတ်တော်တွင် ၈၀ ရာခိုင်နှုန်းကျော် နေရာရရှိမည်ဖြစ်သောကြောင့် လွှတ်တော် ၃ ရပ်စလုံး၌ ကြံ့ဖွံ့နှင့် စစ်တပ် ကိုယ်စားလှယ်များသည် ၈၂ ရာခိုင်နှုန်းခန့် လွှမ်းမိုးထားမည် ဖြစ်သည်။
“ရွေးကောက်ပွဲရလဒ်က မတရားဘူးဆိုတာ သိပေမယ့် အချိန်ကုန်၊ ငွေကုန်ခံပြီး မလုပ်တော့ဘူး။ လွှတ်တော်ထဲ ရောက်မှ ပြောစရာရှိတာ ပြောမယ်။ အဓိက တိုင်းရင်းသားတန်းတူ အခွင့်အရေးနဲ့ ရှမ်းတိုင်းရင်းသား အရေးတွေကို ပြောဆို သွားမယ်”ဟု ရှမ်းတိုင်းရင်းသားများ ဒီမိုကရက်တစ်ပါတီ (SNDP) ခေါ် ကျားဖြူပါတီ၏ ဥက္ကဋ္ဌ ဦးစိုင်းအိုက်ပေါင်း က ပြောသည်။
ကျားဖြူ ပါတီသည် လွှတ်တော် ၃ ရပ်စလုံး၌ ၁၅၇ နေရာ ၀င်ရောက်ယှဉ်ပြိုင်ခဲ့ရာတွင် ၅၇ နေရာ အနိုင်ရခဲ့သည်။
“ဖွဲ့စည်းပုံအရ ပြောဆိုခွင့်နည်းပေမယ့် ရသလောက်ပြောဆိုသွားမယ်။ အဓိက ရှမ်းတိုင်းရင်းသား တိုးတက်ရေးအတွက် လုပ်သွားမယ်” ဟုလည်း ဦးစိုင်းအိုက်ပေါင်းက ဆိုသည်။
မွန်ဒေသလုံးဆိုင်ရာ ဒီမိုကရေစီပါတီ၏ ဥက္ကဋ္ဌ ဦးနိုင်ငွေသိန်းကလည်း “ ရွေးကောက်ပွဲ ရလဒ်က ဘာမှ မတရားဘူး။ တဘက်က လက်ခံထားကြသလို တဘက်ကလည်းပဲ မတရားမှုတွေကို ဖော်ထုတ်ပေးဖို့ လိုတယ်။ သပိတ်မှောက်ကြမယ် ဆိုလည်း မှောက်ကြတာပေါ့” ဟု ပြောသည်။
လွှတ်တော်၌ ကြံ့ဖွံ့နှင့် စစ်တပ်က ဦးစီးနေရာ ယူထား၍ တိုင်းရင်းသားများအတွက် ပြောဆိုဆွေးနွေးရန် လွတ်လပ်မှု မရှိသည်မှာ သေချာကြောင်းလည်း ၎င်းက ဆက်ပြောသည်။ ထို့ကြောင့် တိုင်းရင်းသား ကိုယ်စားလှယ်များနှင့် ဒီမိုကရက်တစ် အင်အားစုများ စည်းလုံး ညီညွတ်စွာ ပြောဆို ဆွေနွေးရန် အရေးပါကြောင်းလည်း ဦးနိုင်ငွေသိန်းက ဆိုသည်။
မွန်ဒေသလုံးဆိုင်ရာ ဒီမိုကရေစီပါတီသည် လွှတ်တော် ၃ ရပ်၌ အမတ်နေရာ ၃၄ နေရာ ပြိုင်ခဲ့ရာတွင် ၁၆ နေရာ အနိုင်ရခဲ့သည်။
မိမိတို့ဒေသများတွင် အနိုင်ရထားသော တိုင်းရင်းသားပါတီများမှ ကိုယ်စားလှယ်များနှင့် ဒီမိုကရက်တစ်ပါတီများမှ ကိုယ်စားလှယ် စုစုပေါင်းသည် ၂၀ ရာခိုင်နှုန်း ၀န်းကျင်သာရှိ၍ ပြောဆိုခွင့် အလွန်နည်းမည်ဟုလည်း ပါတီခေါင်းဆောင်များက ဆိုသည်။
တိုင်းရင်းသား ခေါင်းဆောင်များသည် လွှတ်တော်ထဲ၌ တိုင်းရင်းသားအရေး၊ မြန်မာပြည်သူများ အားလုံး ဒီမိုကရေစီရရှိရေး တို့ကို ပြောဆိုသွားမည့် အပြင် ဒုတိယ ပင်လုံညီလာခံ ပေါ်ပေါက်ရေးကိုလည်း အလေးထား လုပ်ဆောင် သွားကြ မည်ဖြစ်ပြီး မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်နှင့် ပူးပေါင်း၍ အမျိုးသား ရင်ကြားစေ့ရေးကို လုပ်ဆောင်သွားကြမည် ဟု ဆိုကြသည်။
အကျဉ်းထောင် အသီးသီး၌ ကျန်ရှိနေသေးသော တိုင်းရင်းသားခေါင်းဆောင်များ၊ နိုင်ငံရေး အကျဉ်းသားများအားလုံး လွတ်မြောက်ရေးကိုလည်း လုပ်ဆောင်သွားမည်ဟု အဆိုပါ တိုင်းရင်းသား ခေါင်းဆောင်များက ပြောသည်။
ရွေးကောက်ပွဲ၌စစ်အစိုးရ၏ ကြံ့ဖွံ့ပါတီသည် နည်းလမ်းစုံဖြင့် အနိုင်ယူခဲ့ခြင်းကို ပါတီတချို့က ကော်မရှင်အဆင့်ဆင့်သို့ တင်ပြ ထားသော်လည်း တစုံတရာ ဆောင်ရွက်ပေးခြင်း မရှိသည့် အပြင် ပုဒ်မ ၆၄ ဖြင့် အရေးယူမည်ဟုသာ ကော်မရှင်က စစ်အစိုးရ မီဒီယာများ၌ ပြန်လည်ရေးသား သတိပေး ထားသည်။ ရွေးကောက်ပွဲ ရလဒ်အား နိုင်ငံတကာ အစိုးရများကလည်း အသိအမှတ် မပြုဟု ပြောဆိုနေကြသည်။
No comments:
Post a Comment