မသင်္ကာသည့် အရပ်သားများအား KIO ဌာနချုပ် လိုင်ဇာမြို့မှ ပြန်ခိုင်းနေ

ဇော်ကြီး။

ကချင်ပြည်လွတ်မြောက်ရေးအဖွဲ့ KIO ဌာနချုပ်အခြေစိုက်ရာ လိုင်ဇာမြို့ပေါ်ရှိ စစ်အစိုးရနှင့် ပတ်သက်ဆက်နွယ် မှုရှိသည်ဟု ယူဆခံထားရသည့် အရပ်သားများကို KIO က နေရပ်သို့ ပြန်ခိုင်း နေသည်ဟု သတင်းရရှိသည်။

နယ်ခြားစောင့်တပ်ဖွဲ့စည်းရေးကိုလက်မခံငြင်းဆန်ခဲ့ပြီးနောက်ပိုင်း နှစ်ဖက်ဆက်ဆံရေးတင်းမာလာခဲ့ရာမှ တရုတ် မြန်မာ နယ်စပ်လိုင်ဇာမြို့တွင် လာရောက်အလုပ်လုပ်ကိုင်နေသည့် သင်္ကာ မကင်းသူများကို နေရပ်သို့ပြန်ရန် KIO က သတိပေးပြောဆိုခဲ့သည်ဟု မြို့ခံတစ်ဦးက ယခုလို ပြောသည်။

“လောလောဆယ်တော့ ပညာပေးစကားပြော အခြေအနေကိုရှင်းပြပြီးတော့ ပြန်ကြလို့ အဲလိုပဲပြော တာ။ နောက်ဟိုဖက်ကအလုပ်တွေ မလုပ်ဖို့။ ဒီမှာလာပြီးမှ မရှုပ်ထွေးဖို့ပေ့ါလေ။ ရှုပ်ထွေးမှုမဖြစ်အောင် ပေ့ါ။”

၎င်းတို့မှာ KIO မှစောင့်ကြည့်ခံထားရသူများဖြစ်ပြီး ဆက်လက်နေထိုင်ပါက ဖမ်းဆီးခံရနိုင်သည်ဟု ဆက်ပြော သည်။

“သူတို့စောင့်ကြည့်ထားတာကြာပြီ။ အဲဒီထဲမှာ ခြေလှမ်းမမှန်တဲ့၊ မူမမှန်တဲ့ ပုဂ္ဂိုလ်တွေပေ့ါ။ အဲတာက တော့ လူမျိုးဘာသာ မခွဲပါဘူး။ သူတို့ ကြည့်ပြီးမှ ဖယ်ရှားသွားမယ်ပေ့ါ။ ပထမအဆင့်၊ ဒုတိယ အဆင့်ဆိုပြီး လုပ်လို့မှ ဒီကောင်တွေ မပြန်တတ်ဖူးဆိုရင်တော့ ဖမ်းတော့မှာ။”

လိုင်ဇာမြို့ပေါ်တွင် ဗမာများကို ပြန်ခိုင်းနေသည်ဟု သတင်းများထွက်ပေါ်နေသော်လည်း လူမျိုးရေးအရ ခွဲခြား ပြောဆိုခြင်းမဟုတ်ဟု “ဒါပေမယ့် ဗမာတွေ ပြန်ပါဆိုတဲ့ ပုံစံမျိုးမဟုတ်ပါဘူး။ လူမျိုးခွဲပြီးလုပ်တာမ ဟုတ်ဖူး။ လူကိုကြည့်ပြီးလုပ်တာ။ ကချင်လည်းပါချင်ပါမယ်၊ ရှမ်းလည်းပါချင် ပါမယ်ပေ့ါ။” ဟု ဆက် ပြောသည်။

ယင်းကိစ္စမှန်ကန်ကြောင်းနှင့် လွန်ခဲ့တဲ့ နှစ်ရက်ခန့်မှစ၍ ပြန်ခိုင်းနေခြင်းဖြစ်သည်ဟု အမည်မဖော် လိုသည့် KIA အရာရှိတစ်ဦးက ယခုလိုအတည်ပြုပြောဆိုသည်။

“မသင်္ကာတဲ့လူတွေပါ။ သတင်းပေးမှာစိုးလို့၊ သုံးဘီးမောင်းတဲ့သူ ကုန်တင်ကုန်ချလုပ်တဲ့ မသင်္ကာစရာ ရှိတဲ့လူတွေကို အကုန်လုံးပြန်မောင်းထုတ် လိုက်တာပေ့ါ။”

KIO အနေနှင့် နယ်ခြားစောင့်တပ်ဖွဲ့စည်းရေးကို လက်မခံငြင်းဆန်ခဲ့သည့်အပေါ် နှစ်ဖက် ဆက်ဆံရေး တင်းမာ လာခဲ့ပြီး လွန်ခဲ့သည့် နိုဝင်ဘာလကုန်ပိုင်းက KIO ၏မြို့ပေါ် ဆက်ဆံရေး ရုံးများပြန်လည်ရုတ်သိမ်းခဲ့သလို ဒေသတွင်း နှစ်ဖက်စစ်ရေးပြင်ဆင်မှုများ ရှိခဲ့သည်။

ထို့အပြင် KIO ဌာနချုပ် အခြေစိုက်ရာလိုင်ဇာမြို့မှတဆင့် ဗန်းမော်နှင့် မြစ်ကြီးနားမြို့များသို့ တင်သွင်းသည့် ကုန် ပစ္စည်းများကိုလည်း ၀င်ခွင့်မပေးဘဲ ပိတ်ပင်ထားခဲ့သည်။

လွန်ခဲ့သည့်ရက်ပိုင်းအတွင်းက တပ်မတော်ကြည်းရေလေ ညှိနိုင်းကွပ်ကဲရေးမှူး ဒု- ဗိုလ်ချုပ်ကြီး မင်းအောင်လှိုင် ဦးဆောင်၍ စစ်ဆင်ရေးအထူးအဖွဲ့မှူးများ၊ စစ်ဖက်ရေးရာလုံခြုံရေးအရာရှိများနှင့် ကချင်ပြည်နယ် တိုင်းမှူး ဟောင်းဗိုလ်ချုပ်စိုးဝင်းတို့ ကချင်ပြည်နယ်အတွင်းရောက်ရှိနေသည့်အပေါ် KIO အား ထိုးစစ်ဆင်လာနိုင်သည်ဟု သတင်းများထွက်ပေါ်ခဲ့သည်။

ယင်းကိစ္စနှင့်ပတ်သက်၍ မည်သည့်အတွက်ကြောင့် ရောက်လာသည်ကို မသိရသေးသော်လည်း အပိုင်းနှစ်ပိုင်း ဖြစ်နိုင်သည်ဟု ကချင်ပြည်နယ်အရေး စောင့်ကြည့်လေ့လာနေသူ ဦးအောင်ဝါက ယခုလိုခန့်မှန်းပြောဆိုသည်။

“သူတို့ ceasefire ကိုယူထားတဲ့အပိုင်းတွေလည်း အခုထိ တရားဝင်ဖျက်သိမ်းတဲ့အပိုင်း စာရွက် စာ တမ်းနဲ့ အခုထိမရှိသေးဘူး။ ဒီဟာကိုလည်း ဆက်လက်ပြီးတော့မှ လုပ်ဆောင်သွားနိုင်တယ်။ နောက် တခုက သူတို့(စစ်အစိုးရ) တကယ်လို့များစစ်ဆင်ရေးလုပ်ခဲ့ရင် သက်ဆိုင်ရာ တပ်မှူးတွေ ဗိုလ်ချုပ်တွေ အကုန်လုံးညှိနိုင်းဆောင်ရွက်ပြီးတော့မှ လုပ်သွားရင်လည်း လုပ်သွားနိုင်တာပေ့ါနော်။”

လတ်တလောအခြေအနေအရ မြစ်ကြီးနားမှလိုင်ဇာသို့သွားရာ လမ်းကြောင်းတလျောက်တွင် စစ်အစိုးရတပ်က လုံခြုံရေးတိုးမြှင့်ချထားသလို လိုင်ဇာမြို့ပေါ်တွင် KIO အနေနှင့် ယခင်ကထက် လုံခြုံရေးပိုမိုတင်းကြပ်ထား ကြောင်း သိရသည်။