၂၂၆ နှစ်မြောက် ရခိုင်ပြည် အချုပ်အချာအာဏာကျဆုံးနေ့တွင် ရခိုင်အမျိုးသားများက နယူးယောက် ကုလသမဂ္ဂရုံးရှေ့သို့ သွားရောက်ပြီး ရခိုင်ပြည်မှာ ဗမာကိုလိုနီ လက်အောက်သို့ ကျရောက် နေသဖြင့် ကိုလိုနီ စနစ်ကို အပြီးအတိုင် ဖျက်သိမ်းပေးရန် တောင်းဆို ဆန္ဒပြခဲ့ကြသည်ဟု သတင်း ရရှိသည်။ဆန္ဒပြပွဲကို စီစဉ်ရာတွင် ဦးဆောင် ပါဝင်သူ တစ်ဦး ဖြစ်သည့် ကိုလှဌေးမှ ဆန္ဒပြပွဲတွင် တောင်းဆို ခဲ့သည် တောင်းဆိုချက်ကို ယခုသို့ ပြောကြားသည်။ " အဓိက ကျွန်တော်တို့ UN ရုံးရှေ့ကို သွားရောက်ပြီ ရခိုင်ပြည်မှာ ကိုလိုနီ စနစ်ကို အပြီးအတိုင် ဖျက်သိမ်းပေးဖို့ တောင်းဆိုခဲ့ပါတယ်" ဟု ပြောသည်။
၎င်းပြင်သူက ရခိုင်ပြည်တွင် ကိုလိုနီစနစ်ကို ဖျက်သိမ်းပေးရန် တောင်ဆိုရသည့် အကြောင်းအရင်း ကိုလည်း ယခုကဲ့သို့ ပြောသည်။ "ကျွန်တော်တို့ ဘာကြောင့် ရခိုင်ပြည်မှာ ကိုလိုနီ စနစ်ကို ဖျက်သိမ်းဖို့တောင်းဆိုရသလဲ ဆိုရင် ရခိုင်ပြည်ဟာ လွတ်လပ်တဲ့ တိုင်းပြည် တပြည်ဖြစ်ပြီး ၁၇၈၄ ခုနှစ်မှာ ဗမာ ဘုရင် ဘိုးတော် မောင်ဝိုင်းက ကျူးကျော် ၀င်ရောက် သိမ်းပိုက်တဲ့ အတွက် ကိုလိုနီ လက်အောက်ခံ အဖြစ် ကျရောက် ခဲ့ကြရပါတယ်။ အဲဒီ အချိန်က စပြီး ကျွန်တော်တို့မှာ ကိုယ့်ကံကြမ္မာကိုယ် ဖန်တီးပိုင်ခွင့် မရှိဘူး။ ကိုယ့်သမိုင်းကို ဖေါ်ထုတ် ပိုင်ခွင့်မရှိ။ ကျွန်တော်တို့မှာ ကိုယ့်စာပေကို ကိုယ်သင်ပိုင်ခွင့် မရှိဘူး။ ကိုယ့်ရိုးရာ ကိုယ်ယဉ်ကျေးမူကို ထိန်းသိမ်း စောင့်ရှောက်ပိုင်ခွင့် မရှိဘူး။ ကျနော်တို့ဟာ လူမျိုး တစ်မျိုးရဲ့ အခြေခံကျတဲ့ အခွင့်အရေးတွေကို အကြီးအကျယ် အကုန်လုံး ရှုံးဆုံးနေရပါတယ်။ ကျနော်တို့မှာ ခုချိန်မှာလူသား တစ်ဦးရဲ့ အခွင့်အရေး၊ လူမျိုးတစ်မျိုးရဲ့ အခွင့်အရေး ဆိုတာ လုံးဝ တစ်ခုလည်း မရှိပါ။ ခုလို ဖြစ်နေတာဟာ ရခိုင်ပြည်ကို ကိုလိုနီ ကျွန်ပြုထားတဲ့ အတွက်ကြောင့် ဖြစ်ပါတယ်။ ဒါကြောင့် ရခိုင်ပြည်က ဗမာ ကိုလိုနီ စနစ်ကို ဖျက်သိမ်းပေးဖို့ တောင်းဆိုရတာ ဖြစ်ပါတယ်။"
ဆန္ဒြုပပွဲကို ၀မ်းနည်း အထိမ်းအမှတ် အနေဖြင့် ပြုလုပ်ခဲ့ပြီး အခမ်းအနားသို့ လူပေါင်း ၃၀ ခန့်တက်ရောက်ခဲ့ပြီး ရခိုင်အမျိုးသားထဲမှ ခေါင်းဆောင် တစ်ဦးဖြစ်သူ ဒေါက်တာအေးကျော်လည်း တက်ရောက်ကာ အဖွင့် မ်ိန်းခွန်းပြောကြားခဲ့သည်ဟု သိရသည်။ အခမ်းအနားအပြီးတွင် ကုလသမဂ္ဂ အထွေထွေ အတွင်းရေးမှူး အပါအ၀င် အမေရိကန် အစိုးရနှင့် အီယူးနိုင်ငံများ၊ တခြားနိုင်ငံ အသီးသီးရှိ ကိုလိုနီဖျက်သိမ်းရေး ရုံးများသို့လည်း ရခိုင်ပြည်တွင် တည်ရှိနေသော ကိုလိုနီ စနစ်ကို ဖျက်သိမ်း ပေးရန် တောင်းဆိုခဲ့ကြသည်။ စာထဲတွင် ရေးသားထားသော အကြောင်းအရာ များကိုလည်း ကိုလှဌေးက ယခုကဲ့သို့ ပြောသည်။
" စာထဲမှာ ပါတဲ့ အဓိက အချက်လက်တွေကတော့ အထက်မှာ ပြောခဲ့သလိုပါဘဲ။ ရခိုင်ပြည်ဟာ လူ့အခွင့်အရေး ချိုးဖေါက်မူကို နည်းမျိုးစုံနဲ့ ခံနေရပါတယ်။ ခေတ်အဆက်ဆက်မှာလည်း ခံခဲ့ရတယ်။ စစ်အစိုးရ တက်လာတဲ့ အချိန်မှာလည်း ဗမာတွေနဲ့ မတူတဲ့ လူ့အခွင့်အရေး ချိုးဖေါက်မူတွေကို ခံနေကြရတယ်။ လူမျိုး တစ်မျိုးရဲ့ လုပ်ပိုင်ခွင့်၊ ပြောပိုင်ခွင့်၊ ဆိုပိုင်ခွင့် ဘာမှ မရှိဘူး။ ဒါတွေကိ်ု ထောက်ပြပါတယ်။ ၁၉၆၀ ဒီဇင်္ဘာ ၁၄ ရက်နေ့မှာ ကမ္ဘာ ကုသမဂ္ဂကနေပြီး ကိုလိုနီ ကျွန်ပြုခံ လွတ်မြောက်သင့်တယ်။ လွတ်မြောက်ရမယ်ဆိုပီး ထုတ်ပြန်ကျေညာချက်တွေ ရှိပါတယ်။ ဒါတွေကို ထောက်ပြပြီး ကိုလိုနီ စနစ်ကို ဖျက်သိမ်းပေးဖို့ တောင်းဆိုထားပါတယ်" ဟု ပြောသည်။
၎င်းပြင် ဦးဆောင်သူ ခေါင်းဆောင် တစ်ဦးဖြစ်သည့် ဦးခိုင်အောင်ကျော်မှလည်း မည်သည့် အတွက်ကြောင့် ယခုကဲ့သို့ ယူအန်ရုံးရှေ့တွင် ရခိုင်သားများ စုရုံး ဆန္ဒပြရသည်ကို ယခုကဲ့သို့ ပြောသည်။
" ရခိုင်ဆိုတာ ကိုယ့်ထီး ကိုယ့်ချင်း ကိုယ့်ထီးနန်းနဲ့ နေထိုင်လာခဲ့တဲ့ လူမျိုး ဖြစ်ပါတယ်။ ကိုယ့်ထီး ကိုယ့်ချင်း ကိုယ့်ထီးနန်းနဲ့ နေထိုင်လာခဲ့တဲ့ ရခိုင်နိုင်ငံတော်ဟာ ၁၇၈၄ ခုနှစ် ဒီဇင်္ဘာလ ၃၁ ရက်နေ့မှာ ဗမာ ဘုရင် ဘိုးတော်မောင်ဝိုင်းက ကျူးကျော် နယ်ချဲ့ ၀င်ရောက် သိမ်းပိုက်တဲ့ အတွက် ရခိုင်နိုင်ငံတော် ကျဆုံးခဲ့ရတယ်။ အခု ကျဆုံးခဲ့တာ နှစ်ပေါင်း ၂၂၆ နှစ် ရှိနေပြီ ဖြစ်တယ်။ နယ်ချဲ့ သိမ်းပိုက်ခံရတဲ့ အချိန်မှာ ရခိုင်လူမျိုး နှစ်သိန်းကျော် သေဆုံးခဲ့ရတယ်။ ကျန်တဲ့ လူတွေလည်း အိန္ဒိယကိုထွက်ပြေးပြီး တချို့ကလည်း အခု ဘင်္ဂလာဒေခ်ျ့ဖြစ်တဲ့ နိုင်ငံကို ထွက်ပြေးခဲ့ကြရတယ်။ မသေဘဲ ကျန်နေလိုက်တဲ့ ရခိုင်အမျိုးသားထဲက မျိုးဆက်သစ် ၅ ဆက်မြောက် ဖြစ်တဲ့ ကျွန်တော်တို့ဟာ ရခိုင်လူမျိုး အဖြစ် ရပ်တည်ပြီး ရှိနေတယ်။ ရခိုင်လူမျိုး အဖြစ် ရပ်တည် နေထိုင်လာတဲ့ ကျွန်တော်တို့ဟာ ရခိုင်ပြည်ရဲ့ အချုပ်အချာအာဏာကို ပြန်လိုချင်တဲ့ အတွက် ကုလသမဂ္ဂရုံးရှေ့ကို လာပြီး ကိုလိုနီ စနစ်ကို ဖျက်သိမ်းဖို့ တောင်းဆိုရတာ ဖြစ်ပါတယ်။ ဒါဟာ တရားတယ်။ မှန်ကန်တယ်။"
နောက်ထပ် တက်ရောက်လာသူ ကိုကျော်မင်းကလည်း ယခုပြုလုပ်ရသည်မှာ နယူးယောက်မှာ ပထမဆုံး အကြိမ်ဖြစ်ပါတယ်။ ကုလသမဂ္ဂ အထွေထွေ အတွင်းရေးမှူးဆီကို တိုက်ရိုက် စာရေးသား ပေးပို့ရတဲ့ အတွက်လည်း ကျွန်တော်ကတော့ တော်တော် ၀မ်းသာပါတယ်။ နောက်ထပ်ပီးလည်း လူပ်ရှားမူတွေ ဆက်ပြုလုပ်သွားဖို့ အစီအစဉ်ရှိကြောင်း ပြောဆိုသည်။
ဦးဆောင်ရာတွင် ပါဝင်သူ ရခိုင်လူငယ် တစ်ဦးဖြစ်သူ ကိုဘခင်မှလည်း အောင်မြင်မူ ၇၅ ရာခိုင်နုန်း ရရှိသည်ဟု ပြောကြားပြီး မိမိတို့မှာ ရခိုင်ပြည်မှ မိုင်ပေါင်း ၅၀၀၀ ကျော်ဝေးကွာနေသော နေရာတွင် ရောက်ရှိနေသော်လည်း ရခိုင်ပြည်သူတွေ အနီးဆုံးနေရာမှာ ရှိနေကြောင်း ပြောဆိုသည်။ ပြည်ပတွင်ရောက်ရှိနေသော ရခိုင်အမျိုးသားများအားလည်း သူတို့နှင့် အတူ လက်တွဲ ဆောင်ရွက်သွားကြရန် သူက ပြောကြားသည်။
အခမ်းအနားကို နေ့လည် ၁၂ နာရီတွင် စတင်ခဲ့ပြီး ၂ နာရီတွင် အဆုံးသတ်ခဲ့ကြောင်း သိရသည်။
No comments:
Post a Comment