ထွန်းထွန်း
အိန္ဒိယနယ်စပ် ချင်းပြည်နယ် ပလက်ဝမြို့နယ်တွင် မြန်မာ တပ်မတော်မှ ၀ါးအ၀ယ်ဒိုင်ဖွင့်လှစ်ပြီး ဒေသ ၀ါးလုပ်ငန်းတွင် လက်ဝါးကြီးအုပ် လုပ်ကိုင်နေသဖြင့် ၀ါးဈေးများမြှင့်တက်ကာ ဒေသခံ ၀ါးလုပ်ငန်း လုပ်သူများ အခက်ကြုံတွေ့နေကြရကြောင်း သတင်း ရရှိသည်။
ချင်းပြည်နယ်တွင် လွန်ခဲ့သောနှစ်က ၀ါးသီးများ သီးပြီး ၀ါးတောများ ပြုန်းတီးကာ ၀ါးများ ရှားပါးမူကို အခွင့်ကောင်းယူပြီး စစ်တပ်က ၀ါးအ၀ယ်ဒိုင်ဖွင့်၍ စီးပွားရှာဖွေနေခြင်း ဖြစ်သည်။
ဝါးကုန်သည် တစ်ဦးက “ အခု ၀ါးအ၀ယ်ဒိုင်ဖွင့်ပြီး ၀ါးတွေကို အတင်း မရောင်းမနေရ ၀ယ်ယူနေတဲ့ တပ်ရင်းက ပလက်ဝ အခြေစိုက် ၂၈၉ တပ်ရင်း ဖြစ်ပါတယ်။ ခုနှစ် ဇန္န၀ါရီလက စတင်ပြီး ပလက်ဝမြို့နယ် မီးဝကျေးရွာမှာ ၀ါးဒိုင် ဖွင့်ပြီး ၀ါးတွေကို ၀ယ်ယူနေတာ ဖြစ်ပါတယ်” ဟု ပြောသည်။
အဆိုပါ ၀ါးများကို အိန္ဒိယနယ်စပ် အနီးရှိ ချင်းလက်ချောင်း၊ ကလက်ချောင်းများ မှ ထုတ်ယူသော ၀ါများ ဖြစ်ပြီး အဆိုပါ ၀ါးများကို ခမရ ၂၈၉ က သူတို့ ၀ါးဒိုင်တွင် မရောင်းမနေရ စနစ်ဖြင့် ၀ယ်ယူနေခြင်း ဖြစ်သည်။
“ ကုလားတန် အထက်ပိုင်းက ယူလာတဲ့ ၀ါးတွေကို မီးဝရွာ အထိဘဲ ယူလို့ ရပါတယ်။ စစ်တပ် ၀ါးအ၀ယ်ဒိုင်က အဲဒီရွာမှာ ဖွင့်ထားတော့ ကျော်ပြီး ယူလို့ မရတော့ပါဘူး။ စစ်တပ်ဒိုင်က ၀ယ်တဲ့ နေရာမှာလည်း ၀ါးအလုံး ၁၀၀ ကို အပြင် ပေါက်ဈေး ၂၀၀၀၀ ကျပ် ပတ်ဝန်းကျင်မှာ ဈေးရှိပေမယ့် စစ်တပ်က ကျပ် ၉၀၀၀ နှုန်းနဲ့ ရောင်းရပါတယ်။ ပီးရင် ၀ါး ၁၀၀ ကနေ ကျပ် ၁၀၀၀ စီ အခွန်ခဆိုပြီး ထပ်ကောက်ပါ တယ် “ဟု သူက ပြောသည်။
ယခုကဲ့သို့ စစ်တပ် ၀ါးအ၀ယ်ဒိုင်မှ ပလက်ဝမြို့ မြောက်ပိုင်းတွင်တည်ရှိသော မီးဝကျေးရွာမှ နေပြီး ၀ါးများကို တန်ရာ တန်ကြေး မပေးဘဲ ၀ယ်ယူနေသဖြင့် ၀ါးလုပ်ငန်း လုပ်ကိုင်သူ စီးပွားရေး သမားများနှင့် ၀ါးထုတ်လုပ်သူ ကျေးရွာသားများမှာ အထူး အခက်အခဲကြုံနေရကြောင်း သိရသည်။
ယခင်နှစ်များက ၀ါးစီးပွားရေး သမားများ အနေဖြင့် ပုဂ္ဂလိက ၀ါးအ၀ယ်ဒိုင်သို့ တိုက်ရိုက် ရောင်းချခွင့် ရရှိကြသော်လည်း ယခု နှစ်ဇန်န၀ါရီလ ကစပြီး စစ်တပ်မှ ၀ါးအ၀ယ်ဒိုင် ဖွင့်လှစ်ကာ ၀ါးလုပ်ငန်းကို တိုက်ရိုက်ကိုင်တွယ်လာခြင်း ဖြစ်ကြောင်း သိရသည်။
တခြား ကျေးရွာသား တစ်ဦးကလည်း “စစ်တပ်ကို မရောင်းလို့ကို မရဘူး။ သူတို့ကို မရောင်းလို့ရှိရင် ၀ါးခုတ်ခွင့်၊ ၀ါးသယ်ယူခွင့် မရဘူးပေါ့နော်။ တဘက်ကကြည့်မယ်ဆိုလို့ရှိရင် ဒီလောက်လူတွေဟာ မရှိဆင်းရဲလို့ ၀ါးခုတ်ပြီးရောင်းစားနေတာကိုမှ လွတ်လပ်စွာ ရောင်းပိုင်ခွင့် မရှိဘူး။ စစ်တပ်ဆီ ရောင်းရတယ်။ စစ်တပ်က လူထုတွေဆီက ခေါင်းပုံ ဖြတ်နေတယ်“ ဟု ပြောသည်။
ချင်းပြည်နယ် တောင်ပိုင်းနှင့် ရခိုင်ပြည်နယ်တွင် တပ်စွဲထားသော စစ်တပ် တပ်ရင်းများသည် ဒေသအတွင်းက လူထုများ လုပ်ကိုင် နိုင်သည့် တနိုင် တပိုင် စီးပွားရေး လုပ်ငန်းများ ဖြစ်ကြသည့် သစ်လုပ်ငန်း၊ ငါးလုပ်ငန်း၊ ကုန်စည် ပို့ဆောင်ရေး လုပ်ငန်း၊ ၀ါးလုပ်ငန်း၊ အုတ်ဖုတ် လုပ်ငန်းများတွင် ပါဝင်ပတ်သက်ပြီး စီးပွားရှာနေကြသဖြင့် ဒေသခံ လူထုမှာ အထူး ဒုက္ခရောက်နေကြရကြောင်း သတင်း ရရှိသည်။
No comments:
Post a Comment