အခြေခံပညာ မူလတန်း ကျောင်းသူ ကျောင်းသားများအတွက် ကျောင်းသုံး စာအုပ်များကို အခမဲ့ ဖြန့်ဝေပေးမည်ဟု ပညာရေးဝန်ကြီးဌာန ပြည်ထောင်စု ၀န်ကြီးက ပြောသော်လည်း လက်တွေ့တွင် အခြားနည်းလမ်းများဖြင့် အခကြေးငွေ တောင်းခံခြင်းများ ရှိသည်ဟု ကယားပြည်နယ်ရှိ ကျောင်းဆရာ ဆရာမများက ထုတ်ဖော်ပြောဆိုကြသည်။ လွိုင်ကော်မြို့နယ်မှ မူလတန်း ကျောင်းဆရာ တစ်ဦးက ကျောင်းသုံးစာအုပ် အခမဲ့ ပေးဝေသည်မှာ မှန်သော်လည်း “စာအုပ် သယ်ခနဲ့ စာအုပ် ထုတ်ပိုးစားရိတ် ဆိုပြီး ငွေကြေး ကောက်ခံလာကြောင်း” ပြောပြသည်။ သူက “ဘာမှ အလကား မရဘူး။ အဲဒါနဲ့ ကျောင်းသားမိဘတွေဆီကနေ ပိုက်ဆံ ပြန်ကောက်ရတာပါပဲ။ အဲဒီလို မကောက်ရင်လည်း ကိုယ့်လစာထဲက စိုက်ပြီး ပေးရမှာ ဆိုတော့ မလွယ်ဘူး” ဟု ပြောသည်။
ထို့အပြင် ကျောင်းသုံး စာအုပ်များကို မတ်လပိုင်း ၂၇ ရက်နေ့တွင် ပညာရေးမှူးရုံး၌ ထုတ်ယူခဲ့ကြသော်လည်း စာရင်းပါ ကျောင်းသားဦးရေအတိုင်း အပြည့်အ၀ မရရှိခဲ့ကြောင်း စာအုပ် သွားရောက်ထုတ်ယူခဲ့သည့် ဆရာတစ်ဦးက ပြောပြသည်။ အမှန်တကယ် ရှိသည့် ကျောင်းသူကျောင်းသား အရေအတွက်နှင့်အညီ ကျောင်းသုံးစာအုပ်များ “လုံလုံလောက်လောက် မရကြောင်း” ပြောသည်။
အစိုးရက အခမဲ့ ပညာသင်ကြားနိုင်သည်ဟု ကြေညာထားသော်လည်း လိုအပ်သည့် ထောက်ပံ့မှုများ မရှိသည့်အတွက် ကျောင်းသုံးပစ္စည်းများ၊ သင်ထောက်ကူပစ္စည်းများ၊ နေ့စဉ်မှတ်တမ်းစာအုပ်များ ၀ယ်ယူရန် ကျောင်းသားမိဘများထံမှ ငွေကြေး ကောက်ခံနေရဆဲဖြစ်သည်ဟု ကယားပြည်နယ် ဒီးမော့ဆိုမြို့နယ်မှ ကျောင်းဆရာမတစ်ဦးက ပြောသည်။
“ဒီမှာကတော့ ကျောင်းဝင်ကြေးအနေနဲ့ ကျောင်းသားတစ်ယောက်ကို နှစ်ထောင် ကောက်ပါတယ်။ အဲဒီ ငွေတွေအားလုံးကို ကျေးရွာဥက္ကဌကို အပ်နှံထားတယ်။ လိုအပ်တာရှိရင် သူနဲ့ တိုင်ပင်ပြီး ကျောင်းအတွက် သုံးရတယ်။”
ကယားပြည်နယ်တွင် အခြေခံပညာမူလတန်းကျောင်း ၃၄၁ ကျောင်းရှိသော်လည်း ကျောင်းဆရာ/ဆရာမများ လုံလုံလောက်လောက် ခန့်ထားခြင်း မရှိသေးကြောင်းလည်း ဆရာ၊ ဆရာမ အသိုင်းအ၀ိုင်းက ပြောပြသည်။
မြန်မာနိုင်ငံ လူ့အခွင့်အရေးဆိုင်ရာ အထူး ကိုယ်စားလှယ် သောမတ်စ်အိုဟေး ကင်တာနား ကလည်း မြန်မာအစိုးရ အနေဖြင့် ပညာရေး အသုံးစားရိတ်ကို ယခုထက် သိသိသာသာ တိုးမြှင့်သုံးစွဲရန်နှင့် အမှန်တကယ် “အခမဲ့” ဖြစ်သည့် မသင်မနေရ ပညာရေး ဖြစ်စေရန် အကြံပြု တိုက်တွန်းထားပါသည်။
No comments:
Post a Comment