မွန်ပြည် နယ်တွင် နေလှမ်း ဆားကြမ်း ဈေးနှုန်း များနိမ့်ကျ နေပြီး မိုးများလည်း ဆက်တိုက် ရွာသွန်း နေသောကြောင့် ဆားကွင်း များကို မပြုပြင် နိုင်သေး သဖြင့် ယခုနှစ် ဆားထုတ် လုပ်မှု ကျဆင်း ထိခိုက် နိုင်ကြောင်း ဆားလုပ် ငန်းရှင်က ပြောသည်။“ခါတိုင်း နှစ်တွေ ဆိုရင် ခုလို တော်သလင်း လမှာ ဆားကွင်း တွေလုပ်ငန်း စတင် နေပါပြီ၊ အခု ကတော့ ဘယ်သူမှ လုပ်ငန်း မစရ သေးဘူး၊ မိုးတွေ ဆက်တိုက် ရွာနေ တုန်းပဲ၊ ဒီနှစ်ဆား အထွက် နောက်ကျပြီး အထွက်နှုန်း လည်းနည်း ပါလိမ့်မယ်” ဟု သံဖြူ ဇရပ်မြို့နယ်၊ ပငရွာမှ ဆားလုပ် ငန်းရှင် နိုင်တင်အောင်က ပြောသည်။
မွန်ပြည်နယ်ဆားထွက်ရာဒေသများတွင် ပုံမှန်အားဖြင့် စက်တင်ဘာလတွင် မိုးရာသီကြောင့် ပျက်နေသောဆားကွင်းများကို ပြန်လည်ပြင် ဆင်လေ့ရှိပြီး ဒီဇင်ဘာလတွင် နေလှမ်းဆားကြမ်းများစတင်ထွက်ရှိသည်ဟု သိရသည်။
“လက်ရှိဒီကဆားကြမ်းဈေးကလည်း တစ်ပိဿာ ၆၅ ကျပ်ပဲရှိတော့တယ်၊ ထုတ်လုပ်မှုစရိတ်ကလည်း တစ်ပိဿာအတွက် ၆၀ ကျပ်နီးပါးကုန်နေတယ်၊ ကြားမှာအချိန်အခါမဟုတ်တဲ့မိုးတွေရွာလာရင် ဆုံးရှုံးမှုတွေ ထပ်ရှိလာနိုင်တယ်၊ ဒါကြောင့် ဒီနှစ်ဆားလုပ်ငန်းရှင်တော်တော်များ အကြပ်ရိုက်နေတယ်” ဟု နိုင်တင်အောင်က ပြောသည်။
ဆားဖိုပိုင်ရှင်တစ်ဦးအနေဖြင့် လက်ဝယ်တွင်ငွေကျပ်သိန်းတစ်ရာမရှိပါက ယခုအချိန်တွင် ဆားလုပ်ငန်းကို လုပ်ကိုင်နိုင်မည်မဟုတ်ကြောင်း၊ အစိုးရထံမှအတိုးနှုန်းသက်သာစွာရရှိရန် ပြည်နယ်ဆားလုပ်ငန်းရှင်များအသင်းမှ ကြိုးပမ်းနေကြောင်း သူက ဆက်ပြောသည်။
ထို့အပြင် နာဂစ်ကာလအပြီးတွင် မွန်ပြည်နယ်မှဆားကြမ်းများကို တနင်္သာရီတိုင်းနှင့် စစ်တောင်းစက္ကူစက်ရုံတို့မှ ဝယ်ယူခြင်းမရှိသည့်အပြင် ကျိုက်ထိုမြို့အထိ ရန်ကုန်ဆားများ ဝင်ရောက်ခြင်း၊ ထိုင်းနိုင်ငံဆားများလည်း ဝင်ရောက်နေသည့်အတွက် တစ်နှစ်ထွက်ဆားများထက်ဝက်ခန့်သာ ရောင်းချနိုင်သည့်အနေအထားရှိသဖြင့် ယခုအတိုင်းဆက်သွားပါက မွန်ပြည်နယ် ဆားလုပ်ငန်းပျောက်ကွယ်နိုင်ကြောင်း စက်တင်ဘာလ ၁၆ ရက်နေ့တွင် မော်လမြိုင်မြို၌ ပြုလုပ်ခဲ့သော ပြည်နယ်ဆားလုပ်ငန်းရှင်များအသင်းအစည်းအဝေးတွင် အမှုဆောင်တစ်ဦး တင်ပြဆွေးနွေးခဲ့သည်ကို ယနေ့ထုတ် Bi Weekly Eleven ဂျာနယ်က ဖေါ်ပြသည်။
မွန်ပြည်နယ်တွင် နေလှမ်းဆားထုတ်လုပ်သည့်ဧက ၃၀၀၀ ကျော်ရှိရာ ယမန်နှစ်တွင်နေလှမ်းဆား မက်ထရစ်တန်ချိန် ၂၇၈၀၀ ခန့်ထုတ်လုပ်နိုင်ခဲ့သည်ဟု အထက်ပါဂျာနယ်ဖေါ်ပြချက်အရ သိရသည်။
မွန်ပြည်နယ်တွင် သံဖြူဇရပ်မြို့နယ်တွင် ဆားအများဆုံးထွက်ရှိပြီး စက်စဲနှင့်ပငကျေးရွာများတွင် သတ္တုတွင်းဝန်ကြီးဌာနလက်အောက်ခံ ဆားလုပ်ငန်းဦးစီးဌာနများရှိသည့်အပြင် ပုဂ္ဂလိကဆားကွင်းဆားဖိုများလည်းရှိသည်။ ထို့အပြင် ဝဲဂလောင်း၊ အံခဲရွာများနှင့် ရေးမြို့နယ်နှစ်ကရင်ကျေးရွာနှင့် ပလိုင်ကီးကျေးရွာများတွင်လည်း ပုဂ္ဂလိကနေလှမ်းများ ထုတ်လုပ်ခဲ့ကြသည်။
No comments:
Post a Comment