ဟန်ပြ လူ့အခွင့်အရေး ကော်မရှင်လား

ဧရာဝတီ

သမ္မတ ဦးသိန်းစိန် အစိုးရ၏ ပြုပြင်ပြောင်းလဲရေး ခြေလှမ်းသစ်အဖြစ် “မြန်မာနိုင်ငံ အမျိုးသား လူ့အခွင့်အရေး ကော်မရှင်” ကို ပြီးခဲ့သည့် သီတင်းပတ်တွင် ထပ်မံ ဖွဲ့စည်းလိုက်သည်။ သို့သော် ယင်းအဖွဲ့၏ လွတ်လပ်ထိရောက်စွာ ဆောင်ရွက်နိုင်မှုကိုမူ သံသယဖြစ်စရာ ရှိသည်။

ဖွဲ့စည်းပုံအခြေခံဥပဒေပါ နိုင်ငံသားတို့၏ မူလအခွင့်အရေးများကို မြှင့်တင်ရေးနှင့် ကာကွယ်ရေး ဆောင်ရွက်ရန် ဖွဲ့စည်းသည်ဆိုသည့် အဖွဲ့ဝင် ၁၅ ဦးပါ ယင်းအဖွဲ့တွင် နိုင်ငံတကာမျက်နှာစာ၌ ယခင်စစ်အစိုးရ၏ လူ့အခွင့်အရေး ချိုးဖောက်မှုများကို ခုခံကာကွယ် ပြောဆိုခဲ့သော ဦးဝင်းမြ၊ ဦးကျော်တင့်ဆွေ စသည့် အငြိမ်းစားသံအမတ်ကြီးများ ဦးဆောင်ထားသောကြောင့် ဖြစ်သည်။

ဤအချက်ကိုကြည့်လျှင် လူအများ လေးစားယုံကြည်လောက်သော ပုဂ္ဂိုလ်များနှင့် ဖွဲ့စည်းထားသလော၊ အာဏာပိုင်များ စိတ်ကြိုက် စိစစ်ရွေးချယ်ထားသလော ဆိုသည်မှာ သိသာလျက်ရှိသည်။

ကျင်းပနေဆဲ ပြည်သူ့လွှတ်တော်တွင်လည်း ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ အထွေထွေ အတွင်းရေးမှူး ဦးဌေးဦးက ဥက္ကဋ္ဌ တာဝန်ယူပြီး အမတ် ၁၅ ဦးနှင့် ဖွဲ့စည်းထားသည့် “နိုင်ငံသားများ၏ မူလအခွင့်အရေး၊ ဒီမိုကရေစီ အရေးနှင့် လူ့အခွင့်အရေးဆိုင်ရာ ကော်မတီ” လည်း ရှိနေသည်။

လွန်ခဲ့သည့် ၁၀ နှစ်ကျော်ကာလ နအဖ စစ်အစိုးရ လက်ထက် ၂၀၀၀ ပြည့်နှစ်အတွင်းကလည်း ပြည်ထဲရေးဝန်ကြီး ဗိုလ်ချုပ် မောင်ဦး ခေါင်းဆောင်၍ လူ့အခွင့်အရေးအဖွဲ့ ဖွဲ့စည်းခဲ့သေးသည်။

ထို့ကဲ့သို့ လူ့အခွင့်အရေး အမည်ခံအဖွဲ့များ ဖွဲ့ခဲ့သော်လည်း မြန်မာနိုင်ငံတွင် လူ့အခွင့်အရေး ချိုးဖောက်မှုများ လျှော့ပါးသွားခြင်း မရှိခဲ့ပေ။ မြန်မာနိုင်ငံတွင် လူ့အခွင့်အရေး အခြေအနေများ တိုးတက်မှု မရှိကြောင်း၊ မြန်မာစစ်အစိုးရ၏ လူ့အခွင့်အရေးဆိုင်ရာ ဆောင်ရွက်ချက်များ ထိရောက်မှုမရှိကြောင်း ကုလသမဂ္ဂနှင့် နိုင်ငံတကာ လူ့အခွင့်အရေး စောင့်ကြည့်လေ့လာရေး အဖွဲ့များက ထောက်ပြဝေဖန်ခဲ့ကြသည်။

ယခု သမ္မတ ဦးသိန်းစိန် အစိုးရလက်ထက်တွင်လည်း ယခင် စစ်အစိုးရနည်းတူ နိုင်ငံရေး အကျဉ်းသားဆိုသည်မှာ မရှိပါဟု ငြင်းဆိုနေဆဲနှင့် နိုင်ငံတကာနှင့် အတိုက်အခံများ တောင်းဆိုထားသည့် ၂၀၀၀ ၀န်းကျင်ရှိ နိုင်ငံရေးအကျဉ်းသားများ လွှတ်ပေးရေးကို လျစ်လျူရှုထားဆဲရှိခြင်းတို့ကြောင့် လူ့အခွင့်အရေး ကော်မရှင်ထပ်ဖွဲ့ခြင်းမှာလည်း များစွာ အဓိပ္ပာယ် မရှိလှပေ။

ထို့ကြောင့် လူ့အခွင့်အရေးချိုးဖောက်မှု၊ တိုင်းရင်းသားလက်နက်ကိုင် တပ်ဖွဲ့များကို စစ်ဆင်ရာတွင် ကျူးလွန်သည့် ရာဇဝတ်မှုများကြောင့် ကမ္ဘာ့ လူ့အခွင့်အရေး အဆိုးဆုံး စာရင်းဝင်နေသည့် မြန်မာပြည်၏ ပြဿနာများကို လူ့အခွင့်အရေး ကော်မရှင်သစ်အနေဖြင့် ကိုင်တွယ်နိုင်ခြင်း ရှိ မရှိကို သံသယရှိခြင်း ဖြစ်သည်။

အထူးသဖြင့် စစ်ရေးပဋိပက္ခများ ဖြစ်နေသည့် ကချင်၊ ကရင်၊ ရှမ်း စသည့် တိုင်းရင်းသား ဒေသများတွင် အစိုးရစစ်တပ်က ဒေသခံ အမျိုးသမီးများကို အဓမ္မပြုကျင့်ခြင်း၊ အမျိုးသားများကို ပေါ်တာ အထမ်းသမားအဖြစ် ခိုင်းစေခြင်း၊ နေအိမ် ရပ်ရွာများကို အဓမ္မ ရွှေ့ပြောင်းခိုင်းခြင်း၊ မြေယာ သိမ်းယူခြင်းများ ကျူးလွန်နေဆဲဖြစ်သည်။ ထို့အပြင် ထောင်နှင့်ချီသည့် စစ်ပြေး ဒုက္ခသည်များလည်း အိုးအိမ် စွန့်ခွာ ထွက်ပြေးနေကြရဆဲပင်။

လူ့အခွင့်အရေးကော်မရှင်သစ်သည် ယခင်ကျူးလွန်ထားခဲ့သည့် လူ့အခွင့်အရေးချိုးဖောက်မှုများကို မှေးမှိန်စေရန်နှင့် နိုင်ငံတကာကို မျက်စိမှောက်စေရန် ဆောင်ရွက်မည့် အဖွဲ့သာ ဖြစ်လိမ့်မည်ဟု သုံးသပ်ရသည်။

အမျိုးသား ဒီမိုကရေစီအဖွဲ့ချုပ် (NLD) အပါအ၀င် တခြား နိုင်ငံရေးပါတီများကလည်း ယခုဖွဲ့စည်းလိုက်သည့် လူ့အခွင့်အရေးကော်မရှင်ကို ကြိုဆိုလိုက်သော်လည်း ဤအဖွဲ့အနေနှင့် မည်သည့်အတိုင်းအတာအထိ လွတ်လွတ်လပ်လပ် ဆောင်ရွက်နိုင်မည် ဆိုသည်ကို သတိထား စောင့်ကြည့်ရန် လိုကြောင်း ပြောဆိုခဲ့သည်။

သြဂုတ်လ ၅ ရက်နေ့တွင် ရန်ကုန်ရှိ ကုလသမဂ္ဂရုံးက ထုတ်ပြန်သည့် ကုလအထွေထွေ အတွင်းရေးမှူးချုပ် မစ္စတာ ဘန်ကီမွန်း၏ အစီရင်ခံစာတွင် အစိုးရသစ်၏ ပြုပြင်ပြောင်းလဲရေး ဆောင်ရွက်မှုများကို ကြိုဆိုကြောင်း၊ သို့သော် နိုင်ငံရေးအကျဉ်းသားများ လွှတ်မပေးသေးခြင်းက ယုံကြည်မှုကို ပျက်ပြယ်စေကြောင်း ဖော်ပြခဲ့သည်။

အခု လကုန်ပိုင်းတွင် ကျင်းပမည့် ၆၆ ကြိမ်မြောက် ကုလသမဂ္ဂ အထွေထွေ ညီလာခံ၌ မြန်မာနိုင်ငံ၏ လူ့အခွင့်အရေး အခြေအနေနှင့် ပတ်သက်ပြီး ကုလသမဂ္ဂ အထူးကိုယ်စားလှယ် မစ္စတာ ကင်တားနားက တင်ပြမည်ဟု သိရသည်။

မစ္စတာ ကင်တားနားသည် မြန်မာစစ်အာဏာရှင်များ လူသားမျိုးနွယ်အပေါ် ကျူးလွန်သည့် ရာဇဝတ်မှုနှင့် စစ်ရာဝတ်မှုများအတွက် ကုလသမဂ္ဂ စုံစမ်းစစ်ဆေးရေး ကော်မရှင် (CoI) ဖွဲ့ရေး တောင်းဆိုထားပြီး အမေရိကန် အပါအ၀င် နိုင်ငံပေါင်း ၁၆ နိုင်ငံခန့်ကလည်း ထောက်ခံထားသည်။။

ယမန်နှစ် ဒေါ်အောင်ဆန်းစုကြည် လွတ်မြောက်စဉ် မစ္စတာ ဘန်ကီမွန်းက တိုးတက်မှုပြလာခြင်းဖြစ်သည်ဟု ပြောခဲ့ပြီး ပြုပြင်ပြောင်းလဲရေးကို အချိန်ကိုက် အကောင်အထည်ဖော်ရန် တိုက်တွန်းခဲ့သည်။ သို့သော် လူ့အခွင့်အရေး၊ နိုင်ငံရေး၊ စီးပွားရေးတို့တွင် ပြဿနာများ ရှိနေဆဲ ဖြစ်ကြောင်းလည်း မီးမောင်းထိုးပြခဲ့သည်။

အသစ်ဖွဲ့လိုက်သည့် လူ့အခွင့်အရေးကော်မရှင်အနေဖြင့် ဆယ်စုနှစ် ၅ ခုစာ စစ်အစိုးရအုပ်ချုပ်မှု သက်တမ်းတလျှောက် မြန်မာပြည်သူများအပေါ် ကျူးလွန်သည့် လူ့အခွင့်အရေး ချိုးဖောက်သည့် လက်သည်အပေါင်းအပါများနှင့် ပတ်သက်၍ ထုတ်ဖော်ဝန်ခံရန် လိုသည်။

လူ့အခွင့်အရေးကော်မရှင်သစ်သည် အနောက်နိုင်ငံများနှင့် ဒေသတွင်း အစိုးရများ တောင်းဆိုသည့်အတိုင်း အမှန်တရားကို ဖော်ထုတ်ရန် လွတ်လပ်သည့် အဖွဲ့အစည်းဖြစ်သင့်သည်။ ယင်းသို့ ဖော်ထုတ်ရန် အကောင်းဆုံးနည်းလမ်းမှာ အတိုက်အခံများ တောင်းဆိုသည့်အတိုင်း စုံစမ်းစစ်ဆေးရေး ကော်မရှင် (CoI) ကို ထောက်ခံအားပေးရန်ပင် ဖြစ်ပေသည်။