ဂျောက်ဂျက် လိမ်မာနေပြီလား
လွန်ခဲ့တဲ့ ၁၀ စုနှစ် တခုကျော်ကာလက ဟဲဗီးရော့ခ်သံစဉ်တွေနဲ့ လွှမ်းမိုးနေတဲ့ မြန်မာခေတ်ပေါ် ဂီတလောကထဲ ဟစ်ပ်ဟော့ပ် ဆိုတဲ့ ဂီတအမျိုးအစားတမျိုး ဝင်ရောက်လာပါတယ်။
ခေတ်တိုင်းမှာ လူငယ်တိုင်းဟာ သူတို့ရဲ့ ခံစားချက်တွေကို အနုပညာပုံစံ တမျိုးစီနဲ့ ဖော်ပြခဲ့ကြသလိုပဲ ဟစ်ပ်ဟော့ပ် ဂီတဟာလည်း လူငယ်တွေရဲ့ ခံစားချက်တွေ ဖောက်ချနိုင်တဲ့ အနုပညာ ပုံစံတမျိုးဖြစ်ခဲ့ပါတယ်။ ဂစ်တာတွေ သုံးပြီး ခံစားချက်တွေကို စာသားနဲ့ သံစဉ်အဖြစ် ပြောင်းပြောတဲ့ ယဉ်ကျေးမှုကနေ အီလက်ထရွန်းနစ် Beat တွေ၊ ကာရန်တွေ စကားပြောတွေသုံးပြီး လူငယ်တွေရဲ့ ခံစားချက်တွေ၊ အမြင်တွေကို လူတွေကို ချပြတဲ့ ယဉ်ကျေးမှု ထွန်းကားခဲ့ပါတယ်။
အနဂ္ဂ၊ ဇေယျာသော်၊ ရန်ရန်ချန်း စတဲ့လူငယ်တွေဟာ ဟစ်ပ်ဟော့ဂီတကို မြန်မာပရိသတ်နဲ့ မစိမ်းရအောင် စတင် မိတ်ဆက် ပေးခဲ့သူတွေလို့ ပြောလို့ရပါတယ်။
ဟစ်ပ်ဟော့ပ်မှာ တွဲလျက်လိုက်လာတာကတော့ Underground ပါ။ နိုင်ငံရေးစာသားတွေ၊ ညစ်ညမ်း စာသားတွေ၊ ဆင်ဆာမဲ့ စကားလုံးတွေ ထည့်သွင်းရေးဖွဲ့ချင်သူတွေက လွတ်လွတ်လပ်လပ် စမ်းသပ်ရာကနေ စတင်လာတော့ တာပါပဲ။
မြန်မာပြည်ရဲ့ Underground ဂီတလောကမှာ ထူးထူးကဲကဲ နာမည်ထွက်လာသူကတော့ ဂျောက်ဂျက် ဖြစ်ပါတယ်။
ဂျောက်ဂျက်က သူကျွမ်းကျင်ရာ Underground ဟစ်ပ်ဟော့ပ် ဂီတကို အသုံးပြုပြီး ခေတ်မိန်းကလေးတွေရဲ့ အနေအထိုင်၊ အပြုအမူတွေကို နှိုက်နှိုက်ချွတ်ချွတ် ရေးဖွဲ့သီဆိုခဲ့သူအဖြစ် နာမည်ကြီးပါတယ်။
လွန်ခဲ့တဲ့ ၂ နှစ်နီးပါး လောက်ကတော့ Underground သီချင်းတွေ၊ ညစ်ညမ်းစာသားတွေ သီဆိုမှု၊ ညစ်ညမ်းပုံတွေ နဲ့အတူ ဗီစီဒီထွက်ရှိမှုတွေနဲ့ ပတ်သက်ပြီး ဂျောက်ဂျက်ကို show သီဆိုခွင့်၊ စီးရီးထုတ်ခွင့်တွေ ခေတ္တရပ်ဆိုင်းခဲ့ ပါတယ်။ အဲဒီကိစ္စတွေနဲ့ ပတ်သက်လို့ သူဟာ မြန်မာနိုင်ငံဂီတ အစည်းအရုံးမှာလည်း ခံဝန်ကတိ လက်မှတ်ထိုးခဲ့ရ ဖူးပါတယ်။
ဒါပေမယ့် သူ့ရဲ့ လွတ်လွတ်လပ်လပ် ရေးသား တင်ဆက်မှုတွေကို ကြိုက်နှစ်သက်ပြီး လက်ခံအားပေးတဲ့ လူငယ် ပရိသတ်တွေ အများကြီးရှိနေဆဲ ဖြစ်သလို တချို့ကလည်း သူ့အရေးအသား တင်ဆက်ပုံတွေကို မိုက်ရိုင်းတယ်ဆိုပြီး ဝေဖန်ပြစ်တင်ကြပါတယ်။ အထူးသဖြင့်တော့ မိန်းကလေးပရိသတ်က ဂျောက်ဂျက်ကို တော်တော်လေး စိတ်ဆိုးဒေါသ ထွက်ကြပါတယ်။
မကြာသေးခင်ကတော့ ပြည်တွင်းထုတ် ပေါ်ပြူလာဂျာနယ်မှာ ဂျောက်ဂျက်က လူငယ်တွေ အတုခိုး မမှားရလေအောင် သူ့အနေနဲ့ ဆင်ဆင်ခြင်ခြင် နေထိုင်ရတယ်ဆိုတဲ့ အကြောင်းကို ပြောထားတာ တွေ့ရပါတယ်။
ဒီလို အနေအထိုင်ဆင်ချင်ရာကနေ မိုက်ကရိုဖုန်းကိုင်တဲ့အခါ သူ့ပါးစပ်ကပါ ဆင်ခြင်လာဖို့ကို မိန်းကလေး ပရိသတ်က မျှော်လင့်နေတယ် ဆိုတဲ့အကြောင်း သိရပါတယ်။
ရွှေမင်းသမီးနဲ့ စာနယ်ဇင်း
သရုပ်ဆောင် အကယ်ဒမီ ထက်ထက်မိုးဦးနဲ့ သတင်းသမားတွေ အကြား ပြဿနာတခု မရှင်းသေးခင်မှာပဲ သူတို့လင်မယားနဲ့ စာနယ်ဇင်းလောက ဆက်ဆံရေးအခြေအနေ ဆက်လက် တင်းမာဖို့ ဖြစ်ရပ်တခု ထပ်ဖြစ်လာပါတယ်။
လွန်ခဲ့တဲ့ တနှစ်ကျော်လောက်က 7days news ဂျာနယ်မှ သတင်းထောက် အေးသူစံကို ထက်ထက်မိုးဦးက ကိုယ်ထိ လက်ရောက် ကျူးလွန်မှုနဲ့ ပတ်သက်ပြီး တရားရင်ဆိုင်နေရတုန်း အတောအတွင်းမှာပဲ သူ့ရဲ့ခင်ပွန်းဖြစ်သူ သရုပ်ဆောင် ဇူးမြတ်ထက်ဟာ အောက်တို ဘာ ၁၈ ရက်နေ့က ရန်ကုန်တိုင်း ဒေသကြီး စုပေါင်းခရိုင် တရားရုံးရှေ့မှာ သတင်းထောက် တဦးကို ဆဲရေးတိုင်းထွာပြီး ခြေနဲ့ ပြေးကန် ခဲ့တယ် ဆိုတဲ့ သတင်း ထွက်ပေါ်လာပါတယ်။
အဲ့ဒီိကိစ္စက facebook စာမျက်နှာတွေမှာ ပျံ့နှံ့ခဲ့ပြီး ဖတ်လိုက်ရတဲ့ ပရိသတ်တွေကလည်း အမျိုးမျိုး ဝေဖန်ချက်တွေ ပေးကြပါတယ်။
အဲဒီဝေဖန်ချက်တွေထဲမှာ ဇူးမြတ်ထက်က သတင်းထောက်ကို ခြေနဲ့ကန်တယ် ဆိုတဲ့အကြောင်းသာပါရှိပြီး ဘာကြောင့် ကန်ရတာ လဲဆိုတဲ့ အကြောင်းရင်း မပါဝင် တဲ့အတွက် ပုဂ္ဂိုလ်ရေး အရ ထိခိုက်တယ်၊ သတင်း ဌာန တွေဘက်က အရေး အသားနဲ့ ပတ်သက်လို့ ရိုးသား စေချင်တယ် ဆိုတာမျိုး တွေလည်း တွေ့ရ ပါတယ်။
ထက်ထက်မိုးဦးနဲ့ အေးသူစံတို့ရဲ့ အမှု မပြီးပြတ်သေးခင်မှာပဲ ထက်ထက်မိုးဦး သမီးဦးလေးမွေးဖွားပါတယ်။ သူ့မိသားစု အကြောင်း ကောလာဟလ တချို့ဖြန့်တဲ့သူတွေကြောင့် စိတ်အနှောင့်အယှက်ဖြစ်ရတယ် လို့ အနုပညာအသားပေး ဂျာနယ်တွေမှာ မင်းသမီးက ဖွင့်ချခဲ့ပါတယ်။
ဟောလိဝုဒ်မှာ မင်းသမီးနဲ့ ပါပါရာဇီတွေရဲ့ ဆက်ဆံရေး အခြေအနေလို မြန်မာပြည်မှာ ဖြစ်နေတာ ဂုဏ်ယူစရာလို့ ပြောရမှာလား။
ကိုရီးယား စီးကြောင်းထဲမှာ
မြန်မာနိုင်ငံမှာ ၆ ကြိမ်မြောက် ကိုရီးယားရုပ်ရှင်ပွဲတော်ကို ကျင်းပဖို့အတွက် ကိုရီးယားနိုင်ငံက သရုပ်ဆောင် Choi Soo Jong နဲ့ So Yi Hyun တို့အဖွဲ့ဟာ အောက်တိုဘာ ၂၀ ရက်နေ့က ရောက်ရှိလာပါတယ်။
လွန်ခဲ့တဲ့ ၁၀ နှစ်ကျော် လောက်ကကစပြီး ကိုရီးယားရုပ်ရှင် ဇာတ်လမ်းတွဲတွေကို မြန်မာပရိသတ် ကြိုက်နှစ်သက်ရုံတင် မကဘဲ သူတို့ရဲ့ ဖက်ရှင်တွေ၊ စားသောက်နေထိုင်ပုံတွေပါ လူငယ်တွေကြား လွှမ်းမိုးလာခဲ့တာပါ။
ကောင်မလေးတွေကြားမှာ “အိုပါ့” “အန်ညောဆေးရော” စတဲ့ ကိုရီးယား စကားတွေကိုလည်း တွင်တွင်သုံးနေတာ တွေ့လာရပါတယ်။ မုန့်ဟင်းခါးအစား ကိုရီးယား ပဲခေါက်ဆွဲကို စားပြီး စတိုင်ထုတ်ရတာလည်း အရသာတမျိုး ဖြစ်နေပုံ ရပါတယ်။ ဒါ့အပြင် မိန်းကလေးက ရည်းစားစကား စပြောတာတို့၊ မိန်းကလေးတွေ အရက်၊ ဘီယာကို ကောင်လေးတွေနဲ့ အပြိုင် သောက်တတ်လာတာတို့လည်း ကိုရီးယားယဉ်ကျေးမှုက ဆင်းသက်လာတယ် ဆိုရမလား မပြောတတ်ပါ။
ဒါပေမယ့် မြန်မာအိမ်ရှင်မတွေရဲ့ နေ့စဉ် အိမ်မှုကိစ္စ၊ စားဝတ်နေရေး ပြဿနာတွေနဲ့ လုံးချာလိုက်နေတဲ့ ဘဝတွေထဲမှာ အပန်းဖြေစရာ၊ အမောတွေ ဖြေဖျောက်စရာ ကဏ္ဍတခုအနေနဲ့ ကိုးရီးယားဇာတ်လမ်းတွဲတွေက နေရာယူနေဆဲ ဆိုတာကိုတော့ မငြင်းနိုင်ပါဘူး။
မြန်မာ့ရုပ်မြင်သံကြားနဲ့ မြဝတီရုပ်မြင်သံကြားတွေမှာ ကိုရီးယား ဇာတ်လမ်းတွဲတွေ မပြသခင်က တရုတ်နဲ့ ဂျပန် ဇာတ်လမ်းတွဲတွေ နေရာနည်းနည်း ယူခဲ့ပေမယ့် နောက်ပိုင်းမှာတော့ ကိုရီးယားက နှစ်အတန်ကြာ အနိုင်ရ လွှမ်းမိုး သွားနိုင်တယ်လို့ပဲ ဆိုရမှာပါ။
အခု ကိုရီးယား သရုပ်ဆောင်တွေကို အရှင်လတ်လတ် အပြင်မှာ မြင်ကြရတဲ့အချိန် မြန်မာပရိသတ်ရဲ့ တုန့်ပြန်မှုကို မြင်လိုက်ရတော့ မြန်မာတွေရဲ့ ကိုရီးယား ရောဂါက မသေသေးဘူး ဆိုတာ သက်သေ ပြလိုက်သလိုပါပဲ။
မြန်မာနိုင်ငံကို ရောက်လာတဲ့ ကိုရီးယားသရုပ်ဆောင်တွေကို လေဆိပ်အ၀င်မှာ မြင်လိုက်ရတဲ့ ပရိသတ်တွေထဲက အစောဆုံး မြင်ရတာကတော့ လေဆိပ်ဝန်ထမ်းတွေပေ့ါ။
သူတို့ရဲ့ ဖုန်းကင်မရာတွေနဲ့ အလုအယက် ဓာတ်ပုံတွေ ရိုက်ကြတဲ့ မြင်ကွင်းတွေက facebook စာမျက်နှာတွေပေါ်မှာ ရောက်နေပါပြီ။
အားလုံးပဲ “အန်ညောဆေးရော” ပါ။
No comments:
Post a Comment