သျှမ်းပြည် (မြောက်ပိုင်း) သိန္နီမြို့ - မူစယ်မြို့အသွား ပြည်ထောင်စုလမ်းမပေါ်ရှိ တံတားကြီးတစင်း နှင့် သိန္နီ - ကွန်လုံ အသွား တံတား တစ်စင်း ဗုံးများ ဆက်တိုက် ပေါက်ကွဲခဲ့ကြောင်း ဒေသတွင်းလာသည့် သတင်းများအရ သိရသည်။
ယမန်နေ့ညပိုင်းက သိန္နီ- ကွန်လုံလမ်း နမ့်မိန်တံတားတွင် ဗုံးတစ်လုံးပေါက်ကွဲခဲ့ပြီး ယနေ့နံနက် ၄ နာရီခန့်တွင် သိန္နီ- မူစယ်လမ်း နမ္မတူ မြစ်ကူးတံတား၌ နောက်ထပ်တစ်ကြိမ် ဗုံးပေါက်ကွဲခဲ့ကြောင်း သိရသည်။
အဆိုပါ ဗုံးကွဲမှု များကြောင့် တံတားများ အနည်း ငယ်စီ ပျက်စီးမှု ရှိပြီး လူထိခိုက် သေဆုံးမှု မရှိကြောင်း ကားများ သွားလာ နေဆဲဖြစ် ကြောင်း သိန္နီ ဒေသခံတစ်ဦးက သျှမ်းသံတော်ဆင့်သို့ ပြောသည်။
“ကွန်လုံဘက်သွားတဲ့လမ်းပေါ့ အေးရှားဝေါလ်ဂိတ်ကနေ ချိုးသွားရင် သိန္နီ နဲ့ ၅ မိုင်လောက်ဝေးတယ်၊ နမ့်မိန်တံတား မှာကွဲ တယ်၊ အသံ ကတော့ အကျယ်ကြီးပဲ မြေတောင်တုန်သွားတာပဲ တံတားထောင့်နားမှာ နည်းနည်းပျက်သွားတယ်လို့ သိရတယ်”- ဟု သူက ဆိုသည်။
အလားတူ နမ္မတူမြစ်ကူးတံတားလည်း ဗုံးကွဲမှုကြောင့် အုဋ်များအက်ကွဲသွားကြောင်း အဆိုပါတံတားနှစ်စင်း စလုံးတွင် ယာဉ်များ သွား လာနေဆဲဖြစ်သော်လည်း ခရီးသွားများနှင့် ကားများအား ရဲ၊ စစ်တပ်တို့က အထူးစစ်ဆေးမေးမြန်း နေ ကြောင်း ခရီးသွား တဦးက ပြော ပါသည်။
ထို့အတူ ပြီးခဲ့သည့် ၂၃ ရက်၊ ၂၅ ရက် ညနေပိုင်း နှင့် ၂၆ ရက်နေ့ မနက်ပိုင်းကလည်း သျှမ်းပြည်တပ်မတော် မြောက် ပိုင်း တပ်ဖွဲ့ ခေါ် SSPP/SSA အခြေချ တပ်စခန်းအား အစိုးရတပ်က လက်နက်ကြီးများဖြင့် ဆက်တိုက် တိုက်ခိုက်သည့် အပြင်၊ လှုပ်ရှားသွား လာနေသည့် သျှမ်းတပ်စစ်ကြောင်းအား တောနင်းရှာဖွေနေဆဲဖြစ်ခဲ့သည်။
No comments:
Post a Comment