သျှမ်းသံတော်ဆင့်
ကချင်ပြည်နယ် ဗန်းမော်မြို့နယ် နမ့်ခုတ်ရွာသား လူ ၃၀ ကျော်ခန့် စီးနင်းလိုက်ပါသော တုန်ဖုန်းကား တစ်စီး စီငန်းရွာ မင်္ဂလာဆောင်မှ အပြန် ယခုလ ၂၂ ရက်နေ့ ညနေပိုင်းက တိမ်းမှောက်ခဲ့ရာ လူ ၄ ဦးသေ ဆုံးပြီး ၁၅ ဦး အပြင်းအထန် ဒဏ်ရာရရှိခဲ့ကြောင်း သိရသည် ။
အဆိုပါ ဒဏ်ရာရရှိသူ ၁၅ ဦးကို ဗန်းမော်ဆေးရုံသို့ ပို့ဆောင်ကာ အတွင်းလူနာအဖြစ် ဆေးကုသမှုခံယူ နေကြောင်း လူနာများအား ကိုယ်တိုင် တွေ့ခဲ့ရသူ ဗန်းမော်မြို့ခံက သျှမ်းသံတော်ဆင့်သို့ ပြောသည် ။
“မင်္ဂလာဆောင်တာက စီငန်းရွာမှာပေါ့။ စင်းခန်းရွာအရှေ့က နမ့်ခုတ်ရွာကနေ ကားနဲ့သွားကြတာ ။ အဲဒီကားမှာ လူ ၃၀ ကျော်လောက်ပါတယ် ၊ မင်္ဂလာဆောင်ကအပြန် စီငန်းရွာနားက တံတားကူးတဲ့နေရာမှာ မှောက်တယ် ” ဟု ၄င်းမြို့ခံက ပြောသည် ။
သေဆုံးသွားသူများအထဲတွင် ယာဉ်မောင်း အပါအဝင် အမျိုးသား ၂ ဦး ၊ အမျိုးသမီးတစ်ဦးနှင့် ကလေးတစ်ဦးတို့ ဖြစ်ကြောင်း သိရသည် ။
“ဒဏ်ရာရတာတော့ အများကြီး။ အတွင်းလူနာအနေနဲ့ ဆေးရုံ တက်နေတာက ၁၅ ယောက်လောက် ရှိတယ်။ အလောင်းတွေကို ဟိုကနေယူ လာပြီး ဒီမနက် (၂၃ ရက်နေ့) ဗန်းမော်ဆေးရုံကနေ ပြန်သယ် သွားပြီ။ ၄ လောင်းပေါ့။ ခေါင်းတွေမှာ ဒဏ်ရာရတာများတယ် ” ဟု ပြောသည် ။
အဆိုပါကားမှောက်ရသည့် အကြောင်းအရင်းကို ကာယကံရှင်ရွာသားများကိုယ်တိုင် အတိအကျ ပြောပြနိုင်ခြင်း မရှိ ကြောင်း သူက ဆက်ပြော သည် ။
No comments:
Post a Comment