မနေ့က ထုတ်ပြန်တဲ့ ပဋိပက္ခစုံစမ်းစစ်ဆေးရေး အစီရင်ခံစာ သတင်းစာရှင်းပွဲမှာ ဒေသထဲမှာလည်း ပဋိပက္ခတွေ ထပ်ပြီးမဖြစ်ပွားဖို့အတွက် စစ်တပ်အင်အား ပိုမိုချထားဖို့လိုတယ်လို့လည်း ဆိုပါတယ်။
ပြီးခဲ့တဲ့နှစ် ဇွန်လမှာ ဖြစ်ခဲ့တဲ့ ပဋိပက္ခတွေကြောင့် လူပေါင်း နှစ်ရာကျော်သေဆုံးခဲ့ရပြီး တသိန်းလေးသောင်းလောက် အိုးအိမ်မဲ့ဖြစ်ခဲ့ရပါတယ်။
အစိုးရက ဖွဲ့စည်းထားတဲ့ စုံစမ်းစစ်ဆေးရေးကော်မရှင်ရဲ့ အစီရင်ခံစာထဲမှာ လက်ရှိအခြေအနေမှာတော့ ဗုဒ္ဓဘာသာဝင် ရခိုင်လူမျိုးတွေနဲ့ အစ္စလမ်ဘာသာဝင် မွတ်ဆလင် လူမျိုးတွေကို ယာယီခွဲခြားထားရဦးမှာ ဖြစ်တဲ့အကြောင်းလည်း ပြောပါတယ်။
အသိုင်းအ၀ိုင်းနှစ်ခုကို ခွဲခြားထားတာဟာ ရေရှည်အတွက် အဖြေတော့မဟုတ်ဘူး ဆိုပေမယ့် နှစ်ဖက်စလုံးက စိတ်ခံစားမှုပြင်းထန်နေမှုတွေ လျော့ကျသွားတဲ့အထိတော့ ခွဲခြားထားရမှာဖြစ်တယ်လို့ စုံစမ်းစစ်ဆေးရေး ကော်မရှင်အဖွဲ့ကပြောပါတယ်။
ပြီးခဲ့တဲ့တပတ်ကပဲ လူ့အခွင့်အရေးစောင့်ကြည့်လေ့လာရေးအဖွဲ့ကလည်း မြန်မာနိုင်ငံမှာဖြစ်ခဲ့ပဋိပက္ခတွေနဲ့ပတ်သက်ပြီး အစီရင်ခံစာတစောင်ထုတ်ပြန်ခဲ့ပါတယ်။
အစီရင်ခံစာထဲမှာ ဖြစ်ခဲ့တဲ့ပဋိပက္ခတွေဟာ လူမျိုးတုန်းသတ်ဖြတ်မှုစွပ်စွဲထားပါတယ်။ ဒါပေမယ့် အခုလို စွပ်စွဲချက်ကို မြန်မာအစိုးရက ငြင်းဆိုထားပြီးတော့ မြန်မာနိုင်ငံရေးလေ့လာသူတချို့ကလည်း စွပ်စွဲချက်ဟာ တရားမျှတမှုမရှိဘူးလို့လည်း သုံးသပ်ထားကြပါတယ်။
ရခိုင်ပြည်နယ်ပဋိပက္ခအစီရင်ခံစာသတင်းအပြည့်အစုံ
ရခိုင်ပြည်နယ်ထဲမှာ ဖြစ်ပွားခဲ့တဲ့ပဋိပက္ခတွေကြောင့် အိုးအိမ်မဲ့ဒုက္ခရောက်ခဲ့ရသူတွေကို စားနပ်ရိက္ခာနဲ့ နေရာအမိုးအကာရရှိဖို့ ပိုမိုဦးစားပေးလုပ်ဆောင်ပေးရမယ်လို့ ရခိုင်ပဋိပက္ခ စုံစမ်းစစ်ဆေးရေး ကော်မတီရဲ့ အစီရင်ခံစာထဲမှာ ဖော်ပြထားပါတယ်။
အိုးအိမ်မဲ့ဖြစ်နေတဲ့ သူတွေကို အရေးပေါ်အကူအညီတွေချက်ချင်းပေးဖို့လိုတဲ့အကြောင်း၊ မကြာခင်မှာ မိုးတွင်းရောက်လာတော့မှာဖြစ်တဲ့အတွက် ဒုက္ခသည်တွေအဖို့ လုံခြုံရေးနဲ့ ရာယာယီတဲအမိုးအကာတွေပေးဖို့လိုကြောင်း၊ အဲ့ဒါအပြင် ဒုက္ခသည်တွေအတွက် စားနပ်ရိက္ခာ တဆယ့်ငါးရာခိုင်နှုံးလိုအပ်နေသေးသလို နေအိမ် ကိုးဆယ်ရာခိုင်းနှုံး လိုအပ်သေးတယ်လို့လည်း အစီရင်ခံစာထဲမှာ ဖော်ပြထားပါတယ်။
အဲ့ဒါအပြင် နိုင်ငံသားဖြစ်နိုင်ရေးနဲ့ ဖြစ်ပြီးသားလူတွေအတွက် အခွင့်အရေးအာမခံချက်ရရှိဖို့ အတွက်လည်း အစီရင်ခံစာထဲမှာ အကြံပြုဖော်ပြထားပါတယ်။
စုံစမ်းစစ်ဆေးရေးကော်မရှင်ရဲ့အစီရင်ခံစာထဲမှာ ပဋိပက္ခတွေကြောင့် အိုးအိမ်မဲ့ဖြစ်ခဲ့ရတဲ့ ဒုက္ခသည်တွေရဲ့အရေးကို ဦးစားပေးဖော်ပြထားတဲ့အကြောင်းကို အစီရင်ခံစာ ကော်မတီအဖွဲ့ဝင်တဦးဖြစ်တဲ့ ဦးကိုကိုကြီးက အခုလိုရှင်းပြပါတယ်။
“ပဋိပက္ခ စုံစမ်းစစ်ဆေးရေးကော်မရှင်အနေနဲ့ အပြီးသတ်အစီရင်ခံစာသတင်းစာရှင်းလင်းပွဲလုပ်တာပါ၊ အခန်း ၁၂ခန်းရှိတဲ့အထဲမှာ ဒုက္ခသည်များနဲ့ ပတ်သက်တာကို ဒီအမိုးအကာရရှိဖို့ ၊ စားနပ်ရိက္ခာထောက်ပံ့ဖို့ဆိုတာတွေကို နံပါတ် ၁ဦးစားပေးအနေနဲ့ ကျနော်တို့ ဖော်ပြထားပါတယ်၊ နောက် ပညာရေး၊ စီးပွားရေး၊ လူမှုရေး ၊ ကျန်းမာရေး စတဲ့အခန်းကဏ္ဍတွေ ၊ နိုင်ငံသားဖြစ်မှုနဲ့ ပတ်သက်ပြီးတော့ ကျနော်တို့စနစ်တကျစီစစ်ကောက်ယူဖို့ နိုင်ငံသားဖြစ်ပြီးသား သူတွေကို နိုင်ငံသားအခွင့်အရေး အာမခံချက်ရှိဖို့ အဲဒါတွေကို ကျနော်တို့ အကြံပြုထား တာရှိပါတယ်။”
ပြီးခဲ့တဲ့ ဇွန်လနဲ့ အောက်တိုဘာလတွေမှာ ဖြစ်ပွားခဲ့တဲ့ ပဋိပက္ခတွေကြောင့် ရခိုင်ပြည်နယ်မှာ ဗုဒ္ဓဘာသာဝင် ရခိုင်လူမျိုးတွေနဲ့ အစ္စလမ်ဘာသာဝင် မွတ်စဆင်လူမျိုးတွေကြား အခြေအနေက တင်းမာနေဆဲဖြစ်ပါတယ်။
ဘင်္ဂလားဒေ့ရ်ှဖက်က တရားမ၀င်ခိုးဝင်လာတဲ့ ရိုဟင်ဂျာဦးရေ ရှစ်သိန်းလောက်ရှိတယ်လို့ မြန်မာနိုင်ငံဖက်ကအမြင်ရှိပါတယ်။ တရားမ၀င်ဝင်ရောက်လာတဲ့သူတွေနဲ့ နိုင်ငံသားတွေကို စီစစ်ဖို့ကိစ္စကို ကြိုစားလုပ်ဆောင်ဖို့လိုတယ် ဆိုတဲ့အကြောင်းကိုလည်း ဦးကိုကိုကြီးက အခုလိုဆက်ပြောပါတယ်။
“တရားမ၀င်ဝင်ရောက်လာတဲ့သူတွေနဲ့ ကိုယ့်မှာရှိပြီးသားနိုင်ငံသားတွေနဲ့ အဲဒါတွေကို စီစစ်ဖို့ကိစ္စပေါ့လေ၊ အဲဒါ လည်း တော်တော်လေးကြိုးစားရမဲ့ကိစ္စပါ၊ ဒေသမှာရှိတဲ့ တရားမ၀င်ဝင်ရောက်လာတဲ့သူတွေကို အကြောင်း ပြုပြီးတော့ ဖြစ်တဲ့ကိစ္စမှာ နောက်ပိုင်းကျတော့ ဘာသာရေးပုံစံပြောင်းလာတာမျိုးကို ကျနော်တို့ကိုယ်နိုက်က ဒါလက်ခံလို့ မရဘူး၊ ကျနော်တို့က လူမျိုးစုကိစ္စကို သီးခြားဖြေရှင်းနိုင်ဖို့အတွက် ကြိုးစားရမှာ ဘာသာရေးပုံစံမျိုး ဖန်တီးတဲ့ကိစ္စမျိုးကို ကျနော်တို့ လက်ခံလို့ မရပါဘူး။”
ပဋိပက္ခကြောင့် ဇွန်လကနေစပြီး ထောင်နဲ့ချီတဲ့ ရိုဟင်ဂျာတွေ မြန်မာနိုင်ငံကနေ အိမ်နီးချင်းနိုင်ငံတွေဆီကို လှေတွေနဲ့ ထွက်ပြေးကြပါတယ်။ ဘင်္ဂလားဒေ့ရ်ှနိုင်ငံက ထွက်ပြေးလာတဲ့လှေတွေကို လက်မခံတဲ့အတွက် များသောအားဖြင့် မလေးရှားနိုင်ငံ ထွက်ပြေးသွားကြပါတယ်။
ပြီးခဲ့တဲ့တပတ်ကထုတ်ပြန်ထားတဲ့ လူ့အခွင့်အရေးစောင့်ကြည့်လေ့လာရေးအဖွဲ့ရဲ့ အစီရင်ခံစာထဲမှာ ရခိုင်ပြည်နယ်ကပဋိပက္ခကနေလှုံ့ဆော်မှုတွေဟာ မိထ္ထီလာအထိ ကူးဆက်ခဲ့ပါတယ်။ မိထ္ထီလာပဋိပက္ခမှာ လူပေါင်း လေးဆယ်ကျော်သေဆုံးခဲ့ရပါတယ်။
စံစမ်းစစ်ဆေးရေးကော်မရှင်အဖွဲ့ကတော့ ရခိုင်ပြည်နယ်ကပဋိပက္ခတွေကို ပြည်တွင်းပြည်ပ အဖွဲ့အစည်းတွေအနေနဲ့ ချည်းကပ်လေ့လာတဲ့ နေရာမှာ လူ့အခွင့်အရေးရှု့ဒေါင့်၊ နိုင်ငံသားအခွင့်အရေးရှု့ဒေါင့်၊ နိုင်ငံတော်လုံခြုံရေးရှု့ဒေါင့်တွေကနေ ချည်းကပ်ဖို့လိုပြီး စိတ်ခံစားမှုတွေ၊ ၀ါဒဖြန့်ချီမှုတွေနဲ့ လုပ်ဆောင်မယ်ဆိုရင် ပြဿနာဖြေရှင်းတဲ့ နေရာမှာ အခက်အခဲတွေရှိလာနိုင် တယ်လို့ ဆိုပါတယ်။
မနေ့ကထုတ်ပြန်တဲ့ အစိုးရရဲ့ အစီရင်ခံစာထဲမှာ ဒေသထဲမှာ စစ်သားနဲ့ရဲတပ်ဖွဲ့တွေအနေနဲ့ ဥပဒေချိုးဖောက်မှုတွေရှိတယ်ဆိုရင် ထိုက်တန်တဲ့ ပစ်ဒဏ်ပေးဖို့လိုသလို နောက်ထပ် အကြမ်းဖက်မှုတွေမဖြစ်အောင် ထိန်းသိမ်းနိုင်ဖို့အတွက်အတွက်လည်း လုံခြုံရေးအင်အား နှစ်ဆတိုးမြှင့်ချထားဖို့လိုတယ်လို့လည်း ပါရှိတဲ့အကြောင်း ရေဒီယိုသြစတြေးလျသတင်းထောက် မြတ်မိုးက သတင်းပေးပို့ထား ပါတယ်။
No comments:
Post a Comment