သုံးရက်ကြာ မြန်မာနိုင်ငံ ခရီးစဉ်ရဲ့ နောက်ဆုံးရက်ဖြစ်တဲ့ တနင်္ဂနွေနေ့မှာ ဂျပန်နိုင်ငံ ဝန်ကြီးချုပ်က သမ္မတဦးသိန်းစိန်နဲ့ တွေ့ဆုံမှုအပြီး ပြောလိုက်တာ ဖြစ်ပါတယ်။
သဘောတူညီမှုအရ ဂျပန်နိုင်ငံက မြန်မာနိုင်ငံအပေါ် ဒေါ်လာ သန်း ၅၀၀ နီးပါးနဲ့ ညီမျှတဲ့ ချေးငွေတွေကို ထပ်မံ ချေးဌားမှာ ဖြစ်ပါတယ်။
ဒီငွေကြေးတွေကို မြန်မာနိုင်ငံတဝှမ်းက အခြေခံအဆောက်အဦး ဖွံ့ဖြိုးရေးလုပ်ငန်းတွေအတွက် အသုံးပြုမှာဖြစ်ပြီး အဲဒီထဲမှာ လမ်းတွေဆောက်လုပ်ရေး၊ လျှပ်စစ်နဲ့ ရေဖြန့်ဝေမှု ရရှိရေးတွေပါဝင်ပြီး သီလဝါအထူးစီးပွားရေးဇုံ ဖွံ့ဖြိုးတိုးတက်အောင် ဆောင်ရွက်ရေးတွေ ပါဝင်ပါတယ်။
အဲ့ဒါအပြင် ရန်ကုန်မြို့ ရေဖြန့်ဝေရေးစနစ်တိုးတက်ဖို့အတွက် ဒေါ်လာ ၂၃ သန်း ကူညီမှာဖြစ်ပြီး လူမှုရေးနဲ့ စီးပွားရေးဖွံ့ဖြိုးရေးအတွက် ပညာသင်ဆုအစီအစဉ်တွေလည်း လုပ်ဆောင်ပေးမှာ ဖြစ်ပါတယ်။
မြန်မာနိုင်ငံ ခရီးစဉ်အတွင်း ဂျပန်နိုင်ငံ ဝန်ကြီးချုပ်က ဧက ၆၀၀၀ လောက်ကျယ်ဝန်းတဲ့ သီလဝါ အထူးစီးပွားရေးဇုံကို သွားရောက်လည်ပတ်ခဲ့ပြီး အဲဒီဇုံထဲမှာ စီးပွားရေးဇုံနဲ့ ဆိပ်ကမ်းတစ်ခု ပါဝင်ပါတယ်။
အဲ့ဒါအပြင် အရင်က မြန်မာနိုင်ငံကနေ ဂျပန်နိုင်ငံအပေါ် တင်ရှိနေတဲ့ ကြွေးမြီဒေါ်လာ သန်းပေါင်း ၁၇၆၀ ကျော်ကိုလည်း ဂျပန်က ထပ်မံ လျော်ပေးလိုက်ပါတယ်။
ရှင်ဇိုအာဘေရဲ့ လည်ပတ်မှုဟာ ၁၉၇၇ ခုနှစ်နောက်ပိုင်း ဂျပန်နိုင်ငံ ဝန်ကြီးချုပ် တစ်ဦးအနေနဲ့ မြန်မာနိုင်ငံကို ပထမဆုံးအကြိမ် လာရောက်လည်ပတ်တဲ့ ခရီးစဉ် ဖြစ်ပါတယ်။
ဒီခရီးစဉ်အတွင်း မြန်မာအစိုးရ အရာရှိတွေအပြင် ဒေါ်အောင်ဆန်းစုကြည်နဲ့လည်း တွေ့ဆုံခဲ့ပါတယ်။
မြန်မာနိုင်ငံရဲ့ ယခင် စစ်အစိုးရ လက်ထက်အတွင်း အနောက်တိုင်း နိုင်ငံတွေက မြန်မာနိုင်ငံနဲ့ အဆက်အသွယ် ဖြတ်တောက်ခဲ့ပေမယ့် ဂျပန်နိုင်ငံကတော့ မြန်မာနိုင်ငံနဲ့ အဆက်အသွယ် ဖြတ်တောက်ရင် တရုတ်နိုင်ငံလက်ထဲ တွန်းပို့သလို ဖြစ်မယ်လို့ ယူဆပြီး မြန်မာအစိုးရနဲ့ အဆက်အသွယ်မဖြတ်ပဲ ကုန်သွယ်မှု အနည်းငယ်လျော့ချလိုက်ရုံကလွဲပြီး တောက်လျောက် ကူညီထောက်ပံ့မှုတွေ၊ ကုန်သွယ်ဆွေးနွေးမှုတွေ လုပ်ခဲ့ပါတယ်။
No comments:
Post a Comment