ဆလိုင်း တင်မောင်ဦး ရဲ့အောက်မေ့ဖွယ်အခမ်းအနားကို နှစ်ပေါင်း ၃၀ ကျော်အတွင်း မြန်မာနိုင်ငံထဲမှာ ပထမဆုံးအကြိမ် ကျင်းပနိုင်ခဲ့တာဖြစ်ပါတယ်။ ကလေးမြို့မှာ ကျင်းပခဲ့တဲ့ အခမ်းအနားနဲ့ ပတ်သက်ပြီး ဦးဆောင်ကျင်းပခဲ့တဲ့ ချင်းကျောင်းသား ခေါင်းဆောင် တစ်ဦးက အခုလို ပြောပါတယ်။
“စစ်အာဏာရှင်စနစ်အောက်မှာပေါ့ ကြိုးပေးခံခဲ့ရတဲ့ အာဇာနည်တစ်ယောက်ကို ဂုဏ်ပြုတဲ့အနေနဲ့ ကျောင်းသားတွေ လူငယ်တွေကြားမှာ အာဏာရှင် အဆက်ဆက် တိုက်ပွဲဝင်ခဲ့တဲ့ အာဇာနည် တစ်ဦး ကို ဂုဏ်ပြုခြင်းအားဖြင့် ခေတ်အဆက်ဆက် အာဏာရှင်ကို လက်မခံတဲ့ ကျောင်းသားတွေအဖြစ် သိနေကြဖို့ လုပ်ခဲ့တာ ဖြစ်ပါတယ်။”
အိန္ဒိယနိုင်ငံ နယူးဒေလီမြို့မှာ ကျင်းပပြုလုပ်ခဲ့တဲ့ အခမ်းအနားနဲ့ ပတ်သက်ပြီး နယူးဒေလီ အခြေစိုက် ချင်းကျောင်းသား သမဂ္ဂခေါင်းဆောင် ကို ဆန်နှင်းလျန် က သတင်းထောက်တွေကို အခုလို ပြောပါတယ်။
“ဂုဏ်ပြုတဲ့အနေနဲ့ ဒီကျနော်တို့ မြန်မာပြည် ပြည်တွင်းမှာဖြစ်ဖြစ်၊ ဒီ ပြည်ပမှာ သူ့ရဲ့အကြောင်းကို သိပ်ပြီးတော့ မသိတဲ့လူတွေအများ ကြီးရှိတယ်၊ ဒါကို Awareness ပရိတ်စင်း ကို ဦးထိပ်ထားခြင်းနဲ့ ကျင်းပရခြင်း ဖြစ်တယ်။”
သတ္တဗေဒ ကျောင်းသားတစ်ဦးဖြစ်တဲ့ ချင်းအမျိုးသား ကျောင်းသားခေါင်းဆောင် ဆလိုင်း တင်မောင်ဦး ဟာ ၁၉၇၄ ခုနှစ် ဦးသန့်အရေးအခင်းနဲ့ မိုင်းရာပြည့်အရေးအခင်းတွေမှာ လှုပ်ရှားခဲ့တဲ့ ကျောင်းသားခေါင်းဆောင်တစ်ဦးဖြစ်ပြီး အဲ့ဒီလှုပ်ရှားမှုတွေကြောင့် ၁၉၇၆ ခုနှစ် ဇွန်လ ၂၆ ရက်နေ့ မှာ ဦးနေ၀င်း အစိုးရရဲ့ ကြိုးမိန့်ပေး ခံခဲ့ရသူတစ်ဦး ဖြစ်ပါတယ်။ ဆလိုင်း တင်မောင်ဦးဟာ အရှို (ချင်း) တိုင်းရင်းသားလူမျိုးဖြစ်ပါတယ်။
ဆလိုင်းတင်မောင်ဦးကို သူ့ရဲ့နောက်ဆုံးစကားဖြစ်တဲ့ “မင်းတို့ စစ်ဖိနပ် အောက်မှာ ငါဘယ်တော့မှ ဒူးမထောက်ဘူး။ မင်းတို့ ငါ့ခန္ဓာကို သတ်လို့ရပေမယ့် ငါ့ခံယူချက်နဲ့ စိတ်ဓာတ်ကိုတော့ ဘယ်တော့မှ သတ်လို့မရဘူး” ဆိုတဲ့ ကြိုးစင်ပေါ်မတက်ခင် ပြောခဲ့စကားနဲ့ လူသိများခဲ့တဲ့ ကျောင်းသား ခေါင်းဆောင် တဦးဖြစ်ကြောင်း ရေဒီယို သြစတေးလျ သတင်းထောက် သန်းကျော်စိုးက သတင်းပေးပို့ ထားပါ တယ်။
No comments:
Post a Comment