ဖိလိပိုင်နိုင်ငံက အခြေစိုက် ရာမွန်မက်ဆေးဆေး ဖောင်ဒေးရှင်းကနေ အာဖဂန်နစ္စတန်နိုင်ငံ ပြည်နယ်ချုပ်၊ နီပေါနိုင်ငံမှာ လူကုန်ကူးမှုတိုက်ဖျက်ရေးလုပ်ငန်း လုပ်ကိုင်တဲ့ အဖွဲ့၊ ဖိလိပိုင်နိုင်ငံက ကျန်းမာရေးလုပ်သားတစ်ဦး၊ အင်ဒိုနီးရှားနိုင်ငံက အဂတိလိုက်စားမှု တိုက်ဖျက်ရေး အဖွဲ့အပါအဝင် မြန်မာနိုင်ငံမှာ ငြိမ်းချမ်းရေးနဲ့ ဖွံ့ဖြိုးရေးလုပ်ငန်းတွေ လုပ်ကိုင်တဲ့ ကချင်အမျိုးသမီး ဒေါ်လဖိုင်ဆိုင်ရော တို့ ပါဝင်ကြပါတယ်။
ကချင်အမျိုးသမီး ဒေါ်လာဖိုင်ဆိုင်ရောဟာ လူနည်းစုကလာတဲ့ တိုင်းရင်းသားဖြစ်ပေမယ့် မြန်မာနိုင်ငံရဲ့ အကြီးမားဆုံး လူမှုအဖွဲ့တစ်ခု ဖွဲ့စည်းခဲ့ပြီး အဲဒီအဖွဲ့က ကချင်ပြည်နယ်အတွင်း ကျန်းမာရေးဝန်ဆောင်မှုတွေပေးသလို ကချင်ပြည်နယ် ငြိမ်းချမ်းရေးစီမံကိန်းအတွက် ဆောင်ရွက်တဲ့ အဖွဲ့ဖြစ်ပါတယ်။
အသက် ၆၄ နှစ်အရွယ် ဒေါ်လာဖိုင်ဆိုင်ရောဟာ ကချင်ပြည်မှာ ဖြစ်နေတဲ့ စစ်အခြေအနေတိုးတက်အောင် ဆောက်ရွက်သူဖြစ်ပြီး မြန်မာအစိုးရနဲ့ ကချင်စစ်တပ်တို့နဲ့အတူ ပူးပေါင်း အလုပ်လုပ်ကိုင်နိုင်သူ ဖြစ်တဲ့အတွက် ယုံကြည်အားကိုး ချီးကျူးခံရသူ ဖြစ်ပါတယ်။
အလားတူ အာဖဂန်နစ္စတန်နိုင်ငံ Bamyan ပြည်နယ်ချုပ် Habiba Sarabi ဆိုတဲ့ အသက် ၅၅ နှစ်အရွယ် အမျိုးသမီးဟာလည်း ဒေါ်လာဖိုင်ဆိုင်ရောလိုပဲ လူနည်းစု ဟာဇာရာ လူမျိုးဖြစ်ပြီး စစ်ကြောင့် ပျက်စီးနေတဲ့ နိုင်ငံမှာ အလုပ်လုပ်ကိုင်နေရပေမယ့် ပညာရေးမြှင့်တင်မှုလုပ်ငန်းတွေနဲ့ အမျိုးသမီးအခွင့်အရေးတွေ တိုးတက်အောင် ဆောင်ရွက်နိုင်သူ ဖြစ်ပါတယ်။
ဖိလိပိုင်နိုင်ငံက အသက် ၇၆ နှစ်အရွယ် ကျန်းမာရေးလုပ်သား Ernesto Domingo ကတော့ ဖိလိပိုင်အစိုးရက ကျန်းမာရေးသုတေသနအတွက် ရံပုံငွေ အနည်းငယ်သာ ထားပေးတဲ့ကြားက ကျန်းမာရေးဝန်ဆောင်မှု ပိုမိုကောင်းမွန်အောင် သုတေသနလုပ်နိုင်ခဲ့တဲ့အတွက် ဆုချီးမြှင့်ခံရတာဖြစ်ပါတယ်။
နီပေါနိုင်ငံက Shakti Samuha အဖွဲ့ကတော့ လူကုန်ကူးမှုခံရတဲ့ လူတွေကိုယ်တိုင် တည်ထောင်ထားတဲ့အဖွဲ့ဖြစ်ပြီး သူတို့လို ကြုံတွေ့ရသူတွေကို ကယ်တင်ပြီး အရေးပေါ် နေရာထိုင်ခင်း စီစဉ်ပေးတာတွေ၊ ပြန်လည်နေရာချထားရာမှာ ကူညီမှုတွေ လုပ်ပေးတဲ့အတွက် ဆုချီးမြှင့်ခံရတာ ဖြစ်ပါတယ်။
အင်ဒိုနီးရှားနိုင်ငံက အဂတိလိုက်စားမှု တိုက်ဖျက်ရေးအဖွဲ့ကတော့ အမှုပေါင်း ၁၇၀ နီးပါးကို ရင်ဆိုင်ပြီး အဂတိလိုက်စားသူတွေကြောင့် ပျောက်ဆုံးနေတဲ့ ပြည်သူပိုင်ငွေ ဒေါ်လာ သန်း ၈၀ ပြန်လည်တွေ့ရှိအောင် ဆောင်ရွက်နိုင်တဲ့အတွက် ဆုချီးမြှင့်ခံရတာ ဖြစ်ပါတယ်။
ရာမွန်မက်ဆေးဆေး ဆုရရှိသူတွေဟာ ခက်ခဲတဲ့ လူမှုရေးပြဿနာတွေမှာ အဖြေရှာဖွေပေးသူ၊ ကိုယ်ကျိုးမငဲ့ပဲ အလုပ်ကို ကြိုးစားလုပ်ကိုင်သူဖြစ်ပြီး စိတ်ဓာတ်ခိုင်မာမှု၊ စိတ်အားထက်သန်မှု၊ လူတွေနဲ့တွဲပြီး လုပ်ကိုင်နိုင်မှု စတဲ့ ခေါင်းဆောင်ပိုင်း စွမ်းရည်ရှိသူတွေ ဖြစ်တယ်လို့ ရာမွန်မက်ဆေးဆေး ဖောင်ဒေးရှင်း ဥက္ကဌက ပြောပါတယ်။
မက်ဆေးဆေးဆုဟာ ဖိလိပိုင်နိုင်ငံ သမ္မတဟောင်း မက်ဆေးဆေးကို ဂုဏ်ပြုတဲ့အနေနဲ့ ပေးအပ်တဲ့ဆုဖြစ်ပြီး အရင်တုန်းကလည်း ကျန်းမာရေးမြှင့်တင်မှု၊ သဘာဝပတ်ဝန်းကျင် မြှင့်တင်မှုတွေနဲ့ ကရင်လူမျိုး ဒေါက်တာစင်သီယာမောင်နဲ့ ကိုကစောဝါးတို့လည်း အဲဒီဆုကို ရရှိခဲ့ဖူးပါတယ်။
No comments:
Post a Comment