ဇူလိုင်လ ၂၉ရက်နေ့ကနေ သြဂုတ်လ ၁ ရက်နေ့အထိ ကျင်းပပြုလုပ်ခဲ့တဲ့ ညီလာခံနဲ့အတွင်း ဖွဲ့စည်းပုံအခြေခံဥပဒေအကြောင်းကို အဓိကထားဆွေးနွေးခဲ့ကြပြီးတော့ တိုင်းရင်းသားတွေရဲ့ အနာဂတ်၊ အပစ်အခတ်ရပ်စဲရေး၊ ငြိမ်းချမ်းရေးနဲ့ နိုင်ငံရေးအရတွေ့ဆုံ ဆွေးနွေးမှုတွေ ဘယ်လိုဆက်လက် လုပ်ဆောင်သွားမလဲဆိုကိုလည်း ဆွေးနွေးခဲ့ကြတယ်လို့ ညီလာခံကို ဦးဆောင်ကျင်းပတဲ့ ညီညွှတ်သောတိုင်းရင်းသား လူမျိုးများဖက်ဒရယ်ကောင်စီ UNFC က ပြောရေးဆိုခွင့်ရှိသူ ဗိုလ်မှူးကြီး ဦးခွန်ဥက္ကာက အခုလိုပြောပါတယ်။
“အထူးသဖြင့် ၂၀၀၈ ဖွဲ့စည်းပုံအခြေခံဥပဒေပေါ့ လက်ရှိသုံးနေတာ ၊ အဲဒီအပေါ်မှာတော့ ကျနော်တို့က လက်ခံခြင်းမရှိဘူးပေါ့၊ ဒီမိုကရေစီမူနဲ့လည်း မကိုက်ဘူး၊ ဖက်ဒရယ်ပြည်ထောင်စုမူနဲ့လည်း မကိုက်ဘူး၊ ဒါကြောင့် လက်ရှိသုံးနေတဲ့ ဖွဲ့စည်းပုံကိုတော့ ကျနော်တို့လက်မခံဘူး၊ ဖက်ဒရယ်မူနဲ့ ကိုက်ညီတဲ့ ဖွဲ့စည်းပုံအသစ်တစောင်ရေးဆွဲဖို့ အားလုံးကတော့ သဘောတူသွားကြတာပေါ့။”
ပြည်ထောင်စုတပ်မကတော်ဖွဲ့စည်းဖို့အကြောင်းနဲ့ပတ်သက်ပြီး ဦးခွန်ဥက္ကာက အခုလိုရှင်းပြပါတယ်။
“ဖက်ဒရယ်ပြည်ထောင်စု တပ်မတော်ကိစ္စက နှစ်ပိုင်းရှိပါတယ်။ တစ်ပိုင်းက ကျနော်တို့ဖက် ဒီဖက် ပြည်ထောင်စုနိုင်ငံတည်ထောင်ပြီးလို့ရှိရင် အဲ့ဒီနိုင်ငံတော်မှာ ပြည်ထောင်စုတပ်က ကာကွယ်ရေးကို တာဝန်တမ်းဆောင်ဖို့အတွက် ဖယ်ဒရယ်ပြည်ထောင်စုတပ်ကို ထားရှိရမှာဖြစ်တယ်။ အဲ့ဒီဟာကိုတော့ ကျနော်တို့က ကြိုပြီးတော့ရှေ့ရေးအတွက် မူဝါဒတွေချတဲ့သဘောမျိုးနဲ့ ချထားတာရှိပါတယ်။ ကျနော်တို့သဘောတူညီချက်ပဲ။”
ညီလာခံကသဘောတူညီအချက်တွေထဲမှာ ဗမာအမျိုးသားပြည်နယ် တနယ်ဖော်ဆောင်သွားရေး ဆိုတဲ့ အချက်ကိုလည်း သဘောတူညီခဲ့ကြတယ်လို့ ဦးခွန်ဥက္ကာက အခုလိုဆက်ပြောပါတယ်။
“အမျိုးသားတန်းတူရေးကို သရုပ် ဖော်နိုင်တဲ့ ဗမာအမျိုးသားပြည်နယ် တနယ်ပေါ့၊ ဖော်ထုတ်ပြီးတော့ ဖက်ဒရယ်ပြည်ထောင်စုထဲမှာ ပါဝင်သွား ဖို့ဆိုတဲ့ ဆုံးဖြတ်ချက်တရပ်ရတယ်ခင်ဗျ၊ ထူးခြားတဲ့ သမိုင်းဝင် ဆုံးဖြတ်ချက်ဖြစ်ပါတယ်။”
ညီလာခံနဲ့ပတ်သက်ပြီး UNFC အနေနဲ့ ဒီကနေ့ ချင်းမိုင်မြို့မှာ သတင်းစာရှင်းလင်းပွဲ ပြုလုပ်သွား မယ်လို့ သိရပြီး အစိုးရနဲ့ UNFC အကြား တွေ့ဆုံဆွေးနွေးဖို့ကိုတော့ လာမဲ့သြဂုတ်လ နောက်ဆုံးပတ်မှာ တွေ့ဆုံဆွေးနွေးဖို့ သဘောတူညီထားကြတယ်လို့ ဦးခွန်ဥက္ကာက ပြောတဲ့အကြောင်း ရေဒီယိုသြစတြေးလျသတင်းထောက် မြတ်မိုးက သတင်းပေးပို့ထားပါတယ်။
No comments:
Post a Comment