မြဝတီ-မဲဆောက်၊ တာချီလိတ်-မယ်ဆိုင်၊ ကော့သောင်း-ရနောင်းနှင့် ထီးခီး-နမ့်ဖုရော်စသည့် နယ်စပ်ဂိတ် ၄ ခုကို အပြည်ပြည်ဆိုင်ရာအဆင့် ဝင်ပေါက်ထွက်ပေါက်အဖြစ် နှစ်နိုင်ငံသဘောတူညီချက်အရ ဖွင့်လှစ်ခဲ့ခြင်းဖြစ်သည်။
ကရင်ပြည်နယ်ရှိ မြဝတီ-မဲဆောက် ချစ်ကြည်ရေးတံတားတွင် ပြုလုပ်သည့် အပြည်ပြည်ဆိုင်ရာနယ်စပ်ဂိတ် ဖွင့်လှစ်ပွဲအခမ်းအနားတွင် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးခင်ရီ နှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးဋ္ဌေးအောင် တို့က တက်ရောက်မိန့်ခွန်း ပြောခဲ့ကြကြောင်း သိရသည်။
အခမ်းအနားတွင် ဦးခင်ရီက “အခုလိုအပြည်ပြည်ဆိုင်ရာဝင်ထွက်ပေါက်အဖြစ်ဖွင့်လှစ်နိုင်ခဲ့ခြင်းဟာ ကရင် ပြည်နယ်အတွင်းနေထိုင်ကြတဲ့ ပြည်သူများအတွက်ဒေသအတွင်းဖွံ့ဖြိုးတိုးတက်မှု အလုပ်အကိုင်ဖန်တီးပေး နိုင်မှုစတဲ့အခွင့်အလမ်းကောင်းများကိုလည်း ပိုမိုဖေါ်ဆောင်နိုင်ဖို့ဖြစ်တယ်” ဟု ပြောသည်။
ယမန်နေ့ကဖွင့်လှစ်ထားသော မြဝတီဂိတ်တွင် ပတ်စ်ပို့ကိုင်ဆောင်ထားသူ ခရီးသည်များ စတင်သွား လာနေကြကြောင်း ဝန်ထမ်းတစ်ဦးက ပြောသည်။
သူက ” ဒီနေ့ နိုင်ငံခြားခရီးသွား ၄ ယောက် အဲဒီဂိတ်ကနေပဲဖြတ်သွားတယ်၊ ထိုင်းဘက်ကိုနှစ်ယောက် ၂ ယောက်ထွက်သွားပြီး မြန်မာနိုင်ငံထဲကို ၂ ယောက်ဝင်လာတယ် ဒီဂိတ်ကြီးဖြစ်သွားတာကလဲ နိုင်ငံခြားခရီးသွားတွေအတွက်အများကြီးအဆင်ပြေပါတယ်” ပြောသည်။
အလားတူ မြန်မာနိုင်ငံကို ပြည်ဝင်ခွင့် ဗီဇာရရှိထားသည့် ကမ္ဘာလှည့်ခရီးသွား ဧည့်သည်များနယ်စပ်ဂိတ်မှတဆင့် ဝင်ထွက်သွားလာနိုင်ရန် ရှမ်းပြည်နယ်အရှေ့ပိုင်း တာချီလိတ်-မယ်ဆိုင် ဂိတ်ဖွင့်လှစ်ပွဲအခမ်းအနားကို ထိုင်းမြန်မာချစ်ကြည်ရေးတံတားဖြစ်သည့် အမှတ် ၁ တံတားပေါ်တွင် ယမန်နေ့နံနက်က ပြုလုပ်ခဲ့သည်။
ယင်းဂိတ်မှ ဝင်ရောက်လာသောနိုင်ငံခြားသားများအနေနှင့် ယခင်က သွားလာခွင့်မပြုသည့် မိုင်းပြင်း၊ ပုံပါကျင်၊ မိုင်းယောင်၊ မိုင်းတုံ၊ မိုင်းခုတ်၊ မိုင်းပေါက်၊ မိုင်းဆတ်၊ မုန်းထော၊ မုန်းထ၊ မိုင်းယု၊ မိုင်းယန်း စသည့် ရှမ်းပြည်အရှေ့ပိုင်း မြို့နယ်များကို လွတ်လွတ်လပ်လပ်သွားလာခွင့်ရှိသည်ဟု သိရသည်။
No comments:
Post a Comment