ခိုင်မာတဲ့ အပစ်အခတ်ရပ်စဲရေး ရရှိဖို့ အစိုးရအနေနဲ့ တစ်ပြည်လုံးအပစ်အခတ်ရပ်စဲကြောင်း ကြေညာပေးရမှာဖြစ်သလို တပ်နေရာ ချထားရေး ကိစ္စတွေ၊ နှစ်ဖက် စောင့်ကြည့်ရေး အဖွဲ့တွေ ပြုလုပ်ပေးဖို့လိုအပ်တယ်လို့ UNFC ရဲ့ အထွေထွေအတွင်းရေးမှူး နိုင်ဟံသာ ကအခုလို ပြောပါတယ်။
“အစိုးရဘက်က တစ်ပြည်လုံး အပစ်အခတ်ရပ်စဲကြောင်း ကြေညာပေးပါ။ ဒါကို ကျွန်တော်တို့တောင်းဆိုတယ်။ အဲတော့ လက်မှတ်ထိုးမယ်ဆိုရင် တစ်ကယ် ခိုင်မာတဲ့ အနေအထားအရ တိုက်ပွဲ ဆက်မဖြစ်နိုင်တဲ့ အနေအထားကို ကျွန်တော်တို့ ဖန်တီးရမယ်။ တပ်တွေနဲ့ ရှုပ်ထွေးနေတယ် ရောနှောနေတဲ့ဟာတွေကို ကျွန်တော်တို့ ခွါပေးရမယ်။ တပ်တွေရဲ့ လှုပ်ရှားခွင်တွေကို သတ်မှတ်ပေးရမယ်။ တပ်တွေ လိုက်နာရမယ့် စည်းမျဉ်းစည်းကမ်းကို နှစ်ဖက်စလုံးပေါ့ဗျာ လိုက်နာဖို့ ကျွန်တော်တို့ ဖန်တီးပေးရမယ်။ အဲသလို လုပ်ထားပြီးရင်လည်း အဲဒီ အပစ်အခတ်ရပ်စဲရေး ကို စောင့်ကြည့်ဖို့ အဖွဲ့တွေကိုလည်း ကျွန်တော်တို့ ဖန်တီးပေးထားရမယ်။ ဖွဲ့စည်းထားပေးရမယ်။ ဒါမှ ခိုင်မာတဲ့ အနေအထားမျိုး ရှိမှ လက်မှတ်ထိုးမယ်ဆိုတဲ့ ရည်ရွယ်ချက်မျိုး ကျွန်တော်တို့မှာ အမြင် ရှိတယ်။”
ဒါ့အပြင် အပစ်အခတ်ရပ်စဲရေး ရရှိပြီးတာနဲ့ နိုင်ငံရေး ဆွေးနွေးပွဲကို မကြာမီ ပြုလုပ်ရမယ်ဆိုတဲ့ အာမခံချက်လည်း ပေးဖို့ လိုအပ်တယ်လို့ ဆိုပါတယ်။ တစ်ဆက်တည်းမှာပဲ တိုင်းရင်းသားလက်နက်ကိုင်တွေဘက်က တစ်နိုင်ငံလုံးအတိုင်းအတာနဲ့ အပစ်အခတ်ရပ်စဲရေး မူကြမ်းတစ်ခုကို ဒီကနေ့မှာ စတင်ရေးဆွဲမှာ ဖြစ်ပြီး မကြာမီကာလအတွင်း ပြုလုပ်မယ့် ဒုတိယအကြမ် ဆွေးနွေးမှာ အပြီးသတ် မူကြမ်းကို တင်ပြသွားမှာ ဖြစ်တယ်လို့ သိရပါတယ်။
အဲဒီမူကြမ်းမှာ ဖယ်ဒရယ် ပြည်ထောင်စု တပ်မတော် ဖွဲ့စည်းဖို့ ကိစ္စကို ထည့်သွင်းသွားမှာ ဖြစ်ပြီး အစိုးရဘက်က တင်ပြလာတဲ့ အပစ်အခတ်ရပ်စဲရေး မူကြမ်းနဲ့ ဆက်လက် ညှိနှိုင်းမှုတွေ ပြုလုပ်သွားမှာ ဖြစ်တယ်လို့လည်း UNFC ရဲ့ အထွေထွေ အတွင်းရေးမှူးက ဆက်လက် ပြောဆိုခဲ့ပါတယ်။
UNFC က ထိပ်ပိုင်း ခေါင်းဆောင်တွေ ဖြစ်တဲ့ ဒုဥက္ကဌ (၁) ခွန်းအေဘယ်လ်တွိဒ်၊ ဒုဥက္ကဋ္ဌ(၂) ပဒိုဒေးဗစ်သာကပေါနဲ့ အထွေထွေအတွင်းရေးမှူး နိုင်ဟံသာတို့ဟာ အပစ်အခတ်ရပ်စဲရေးနဲ့ ပြည်တွင်းငြိမ်းချမ်းရေး ဖော်ဆောင်နိုင်ရေး ဆွေးနွေးဖို့ ပြည်ထောင်စု ငြိမ်းချမ်းရေး ဖော်ဆောင်ရေး ကော်မတီရဲ့ ဖိတ်ကြားချက်အရ နိုဝင်ဘာလ ၂၃ ရက်နေ့ကတည်းက ရန်ကုန်မြို့ကို ရောက်ရှိနေတာဖြစ်ပြီး မနေ့က နေ့လည်ပိုင်းမှာတော့ အပစ်အခတ်ရပ်ရေး စာချုပ်နဲ့ ပက်သက်ပြီး ဝန်ကြီး ဦးအောင်မင်း ဦးဆောင်တဲ့ ငြိမ်းချမ်းရေးကော်မတီနဲ့ တွေ့ဆုံ ဆွေးနွေးခဲ့ပါတယ်။
UNFC က ကိုယ်စားလှယ်တွေဟာ ဒီကနေ့မှာတော့ ၈၈ မျိုးဆက်ကျောင်းသားများအဖွဲ့နဲ့ တွေ့ဆုံဖို့ရှိပြီး နိုဝင်ဘာလ ၂၆ ရက်နေ့မှာတော့ ထိုင်းနိုင်ငံကို ပြန်လည်ထွက်ခွါမှာ ဖြစ်ကြောင်း ရေဒီယို သြစတြေးလျ သတင်းထောက် စူးရှက သတင်းပေးပို့ထားပါတယ်။
No comments:
Post a Comment