မြစ်ဆုံစီမံကိန်းနဲ့ ပတ်သက်ပြီး မြန်မာအစိုးရအနေနဲ့ မှန်ကန်တဲ့ ဆုံးဖြတ်ချက် ချနိုင်ဖို့ မျော်လင့်ကြောင်း၊ အဲဒီအတွက် ပြည်သူတွေကို ချပြသွားမှာဖြစ်ပြီး အစိုးရရဲ့ ဆုံးဖြတ်ချက်အတိုင်း ပြုလုပ်သွားမယ်လို့လည်း မြစ်ဆုံစီမံကိန်းမှာ ပါဝင်ခဲ့တဲ့ ACHC ကုမ္ပဏီက ပြောပါတယ်။
ACHC ကုမ္ပဏီအနေနဲ့ မြစ်ဆုံဒေသအတွင်းမှာ လူမှုရေးလုပ်ငန်းတွေ၊ လျှပ်စစ်ဖြန့်ဖြူးရေးလုပ်ငန်းတွေ၊ လမ်းပန်းဆက်သွယ်ရေးလုပ်ငန်းတွေ၊ ပညာရေး၊ ကျန်းမာရေး အကူအညီတွေ ပေးထားတယ်လို့လည်း ACHC ရဲ့ မန်နေဂျာချုပ် လီကွမ်းဟွာက မနေ့က ပြုလုပ်တဲ့ သတင်းစာ ရှင်းလင်းပွဲမှာ ပြောသွားခဲ့ပါတယ်။
“ဒီကနေ့ ကျွန်တော်တို့ ကုမ္ပဏီအနေနဲ့ လူမှုရေးဆိုင်ရာ တာဝန်ယူဆောင်ရွက်မှု အစီရင်ခံစာကို ထုတ်ပြန်ရတာဟာ ကျွန်တော်တို့ စီမံကိန်းကို ယုံကြည်မှုရှိလာဖို့နဲ့ ကျွန်တော်တို့အနေနဲ့ မြန်မာနိုင်ငံအတွင်းမှာ လူမှုရေးဆိုင်ရာ တာဝန်ယူဆောင်ရွက်မှု ဘယ်လောက်ထိ လုပ်ခဲ့ပြီးပြီး ဆိုတာ ထုတ်ပြန်တာပါ။ ဒါ့ကြောင့် ဒီစီမံကိန်းအပေါ်မှာ အမြင်ဆိုးတွေ ရှိခဲ့တာကို ဒီကနေ့မှာတော့ ပြည်သူတွေအနေနဲ့ အမှန်ကို သိလာမယ်လို့ ထင်ပါတယ်။”
အဲဒါ့အပြင် မြန်မာနိုင်ငံမှာ အလုပ်အကိုင် အခွင့်အလမ်းဖွင့်ပေးတဲ့အနေနဲ့ မြန်မာလုပ်သားပေါင်း ၆၀၀၀ လောက်ကို ACHC ရဲ့ စီမံကိန်းအတွင်း တိုက်ရိုက်အလုပ်အကိုင် အခွင့်အလမ်း ရရှိစေခဲ့ပြီး နောက်ထပ် လူဦးရေ တစ်သောင်းလောက်ကို သွယ်ဝိုက်ပြီး အခွင့်အလမ်းတွေ ရရှိစေခဲ့တယ်လို့ ဆိုထားပါတယ်။
ACHC ကုမ္ပဏီက သူတို့ရဲ့ လူမှုရေးဆောင်ရွက်ချက်ကို ထုတ်ပြန်ပြောဆိုနေတာဟာ သူတို့အပေါ် ပြည်သူတွေ ယုံကြည်လာဖို့နဲ့ မြစ်ဆုံစီမံကိန်း ပြန်လည်လုပ်ကိုင်ဖို့အတွက် ဖြစ်နိုင်တယ်လို့ သုံးသပ်နေကြတာနဲ့ ပတ်သက်ပြီး သတင်းစာရှင်းလင်းပွဲကို တက်ရောက်ခဲ့တဲ့ အမျိုးသားဒီမိုကရေစီအဖွဲ့ချုပ် NLD ပါတီက ဗဟို အလုပ်အမှုဆောင် အဖွဲ့ဝင် ဦးဟန်သာမြင့်ရဲ့ အမြင်ကို မေးခဲ့ရာမှာ သူက ခုလို ပြောပါတယ်။
“နိုင်ငံရေးသမား တစ်ယောက်အနေနဲ့ ပြောရရင် ဒါ အန်ကယ်တို့ ထက်ကို အဲဒီမှာ တကယ် တိုက်ရိုက် သက်ဆိုင်နေတဲ့ ကချင်လူထုက ဆုံးဖြတ်ခွင့်ရဖို့ အရေးကြီးတယ်လို့ ထင်တယ်။”
တရုတ်ကုမ္ပဏီကြီးတွေဟာ ဧရာဝတီ မြစ်ဆုံ စီမံကိန်း အကောင်အထည် ဖော်တုန်းမှာပဲ ပြည်တွင်းက သဘာဝပါက်ဝန်းကျင်ဆိုင်ရာ ပညာရှင်တွေ၊ တက်ကြွလှုပ်ရှားသူတွေနဲ့ ပြည်သူအများစုက ကန့်ကွက်ခဲ့တာကြောင့် သမ္မတဦးသိန်းစိန်က သူ့ရဲ့ လက်ထက်အတွင်း စီမံကိန်းကို ရပ်တန့်ထားဖို့ ပြောလိုက်ပါတယ်။
ACHC ကုမ္ပဏီဟာ ၂၀၁၀ ဇွန်လတုန်းက ဖွဲ့စည်းခဲ့တဲ့ ကုမ္ပဏီ ဖြစ်ပြီး တရုတ်ဓါတ်အား ရင်းနှီးမြုပ်နှံမှု CPI ကုမ္ပဏီက ရှယ်ယာ ၈၀ ရာခိုင်နှုန်း၊ မြန်မာနိုင်ငံသားပိုင် အေးရှားဝေါ ကုမ္ပဏီက ၁၅ ရာခိုင်နှုန်းနဲ့ မြန်မာ့ လျှပ်စစ်စွမ်းအား ဝန်ကြီးဌာနက ၅ ရာခိုင်နှုန်း ပါဝင်ဖွဲ့စည်းထားတဲ့ အဖွဲ့ ဖြစ်ပါတယ်။
ဧရာဝတီ မြစ်ဆုံ ရေအားလျှပ်စစ် စီမံကိန်းအတွက် စုစုပေါင်း ရင်းနှီးမြုပ်နှံမှုဟာ အမေရိကန် ဒေါ်လာ ၂၅ ဘီလီယံရှိပြီး မြန်မာနဲ့ တရုတ်ကုမ္ပဏီတို့ရဲ့ သဘောတူညီချက်အရ တည်ဆောက်မှု ကာလ ၁၅ နှစ်ရရှိပြီး တရုတ်ကုမ္ပဏီတွေက အဲဒီစီမံကိန်းမှာ နှစ်ပေါင်း ၅၀ လုပ်ကိုင်ခွင့်ရရှိမှာ ဖြစ်ခဲ့အကြောင်း ရေဒီယိုသြစတြေးလျ သတင်းထောက် စူးရှက သတင်းပေးပို့ထားပါတယ်။
No comments:
Post a Comment