တရုတ်အစိုးရအနေနဲ့ အမျိုးသားဒီမိုကရေစီ အဖွဲ့ချုပ်ခေါင်းဆောင် ဒေါ်အောင်ဆန်းစုကြည်ကို တရုတ်နိုင်ငံကို လာရောက်လည်ပတ်ဖို့ တရားဝင် ဖိတ်ကြားထားတာမျိုး မကြာခင် ကာလမှာပဲ ပြုလုပ်သွားနိုင်တယ်လို့ တရုတ်သံအမတ်က ပြောလိုက်ပါတယ်။
တရုတ်အစိုးရအနေနဲ့ မြန်မာနိုင်ငံက နိုင်ငံရေးပါတီအားလုံးနဲ့ ဆက်ဆံမှုတွေလုပ်နေပြီး ခုချိန်အထိ ဒေါ်အောင်ဆန်းစုကြည်ကို တရုတ်နိုင်ငံကို လာရောက်လည်ပတ်ဖို့ တရားဝင်ဖိတ်ကြားထားတာမျိုး မလုပ်ရသေးပေမယ့် မကြာခင် အတောအတွင်းမှာပဲ ပြုလုပ်နိုင်တယ်လို့ မြန်မာနိုင်ငံမှာ အမှုထမ်းဆောင်နေတဲ့ တရုတ်သံအမတ် Yang Houlan က Sunday Morning Post ကို ပြောပါတယ်။
တရုတ်အစိုးရနဲ့ NLD ပါတီတို့ကြား ဆက်ဆံရေးဟာ မကြာသေးခင်ပဲ ပိုမို ကောင်းမွန်လာခဲ့ပြီး ပြီးခဲ့တဲ့ နှစ်ကပဲ NLD ပါတီက ကိုယ်စားလှယ်လေးဦး တရုတ်နိုင်ငံကို သွားရောက်လည်ပတ်ခဲ့ပါတယ်။
ဒေါ်အောင်ဆန်းစုကြည်ကလည်း ပြီးခဲ့တဲ့နှစ်တုန်းက တောင်ကိုးရီးယားနိုင်ငံ ခရီးစဉ်အတွင်းမှာပဲ မကြာခင်မှာ တရုတ်နိုင်ငံကို လည်ပတ်ဖို့ မျော်လင့်ကြောင်း ပြောဆိုခဲ့ဖူးပါတယ်။
တရုတ်အစိုးရကို တချို့ တဝက်သာ ကိုယ်စားပြုတဲ့ အဖွဲ့တွေက တရုတ်နိုင်ငံကို လာရောက်လည်ပတ်ဖို့ ဒေါ်အောင်ဆန်းစုကြည်ကို ဖိတ်ခေါ်တာမျိုးတွေ လက်ခံရရှိခဲ့ပေမယ့် ဒေါ်အောင်ဆန်းစုကြည်က ငြင်းဆိုမှုတွေ လုပ်ခဲ့တယ်လို့လည်း သိရပါတယ်။
No comments:
Post a Comment