ဖြိုးဝေလင်း
ပြည်သူ့ရင်ပြင်နှင့် ရန်ကုန်တိုင်းလွှတ်တော်ရုံးအရှေ့ ရန်ကုန်မြို့ ပြည်လမ်းမပေါ်ရှိ ဆူးလေးဘက်သို့ သွားသည့်ယာဉ်ကြော၌ ယာဉ်ရှစ်စီး ဆင့်တိုက်မှု ဇွန်လ ၂၇ရက် နံနက် ၁ဝနာရီခွဲက ဖြစ်ပွားခဲ့သော်လည်း မွန်းလွဲ တစ်နာရီခွဲသည်အထိ အမှုဖွင့်နိုင်ခြင်း မရှိသေးဟု ဒဂုံမြို့မ ရဲစခန်းက တာဝန်ကျရဲတပ်သား တစ်ဦးက မဇ္ဈိမကို ပြောသည်။
"ကျွန်တော်တို့ဆီက စခန်းမှူးနဲ့တာဝန်မှူး ဖြစ်တဲ့နေရာကို သွားပြီးစစ်ဆေးနေပါတယ်။ သူတို့ ပြန်မရောက်သေးတော့ အမှုမဖွင့်ရသေးပါဘူး။ ယာဉ်တိုက်မှုကြောင့် လူသေတာတော့ မရှိပါဘူး"ဟု ဒဂုံမြို့မရဲစခန်းက တာဝန်ကျရဲတပ်သားတစ်ဦးကပြောသည်။
ယာဉ်တိုက်မှုဖြစ်ပွားပုံမှာ လင်ခရူဆာဆိုက်ကနက်စ် ကိုယ်ပိုင်ယာဉ်တစ်စီးသည် အရှိန်လွန်ကာ ရှင်စောပုမီးပွိုင့်တွင် မီးပွိုင့်မိ၍ ရပ်ထားသည့် ယာဉ်ရှစ်စီးကို ဆင့်တိုက်ခဲ့ခြင်း ဖြစ်သည်။
ယာဉ်တိုက်မှုကြောင့် မီးပွိုင့်တွင်ရပ်ထားသည့် ကိုယ်ပိုင်ယာဉ်ခြောက်စီးနှင့် အငှားယာဉ်နှစ်စီး ပျက်ဆီးသွားခဲ့ပြီး အမျိုးသမီးတစ်ဦး ဒဏ်ရာရရှိခဲ့သည်။
အဆိုပါဖြစ်စဉ်နှင့် ပတ်သက်ပြီး ဒဂုံမြို့မရဲစခန်းက ယာဉ်မဆင်ခြင်မောင်းနှင်သူ လင်ခရူဆာ ဆိုက်ကနက်စ် ကိုယ်ပိုင်ယာဉ်မောင်းကို စစ်ဆေးလျှက်ရှိသည်ဟု အထက်ပါရဲစခန်းက သိရသည်။
No comments:
Post a Comment