ကျော်စိုးမိုး
ဒဂုံတက္ကသိုလ် ကျောင်းဝင်းအတွင်း ကျောင်းသားတစ်ဦး ယာဉ်တိုက်ခံကာ သေဆုံးသွားသည့် အမှုတွင် ဘီအမ်ယာဉ် မောင်းနှင်သည့် ယာဉ်မောင်းကို ဒုတိယရမန် ထပ်ယူ၍ စွဲချက်တင်သွားမည်ဟု မြောက်ဒဂုံမြို့နယ်၊ အမှတ်(၃၉) ယာဉ်ထိန်း တပ်ဖွဲ့စုမှူးရုံးမှ ရဲအုပ်တစ်ဦးက ပြောသည်။
“ဒီနေ့ တရားမစွဲဖြစ်တဲ့အတွက် ဒုတိယ ရမန်ထပ်ယူမှာပါ။ အတိုက်ခံရတဲ့ ကျောင်းသား မိဘက ကျေအေး ပေးမယ် ဆိုပေမယ့် ကျွန်တော်တို့ဘက်ကတော့ ဥပဒေနဲ့အညီ ဆက်လက်ဆောင်ရွက်သွားမှာပါ”ဟု အဆို ပါ ရဲအုပ်က ဇွန်လ ၂၆ ရက်တွင် ပြောသည်။
ပြီးခဲ့သည့် ဇွန်လ ၁၂ ရက်၊ ညနေ ၃ နာရီကျာ်ခန့်တွင် ဒဂုံတက္ကသိုလ်မှ အသက် ၂၀ ၀န်းကျင်ရှိ ဒုတိယနှစ် ဥပဒေကျောင်းသားတစ်ဦးသည် ချစ်သူနှင့်စကားများရန်ဖြစ်ပြီး ကျောင်းပရ၀ဏ်အတွင်းရှိ အ၀ိုင်း မှတ်တိုင် အနီးတွင် အနောက်မှအရှေ့သို့ မောင်းနှင်လာသော ဘီအမ်ကားရှေ့သို့ ဖြတ်ပြေးကာ မိမိကိုယ်မိမိ အဆုံး စီရင်ခဲ့သည်။
“သေဆုံးသူကောင်လေးရဲ့ ချစ်သူအပါအ၀င် မျက်မြင်သက်သေခြောက်ဦးရဲ့ ထွက်ဆိုချက်အရတော့ ယာဉ် မောင်းမှာ အပြစ်မရှိဘူးလို့ တွက်ဆိုထားပါတယ်။ လက်ရှိစွဲချက်တင်ထားတဲ့ ပုဒ်မပြောင်း သွားနိုင်ပါတယ်” ဟု အဆိုပါရဲအုပ်က ဆိုသည်။
လက်ရှိအချိန်တွင် ဘီအမ်ယာဉ်မောင်း ကိုညီညီအောင်ကို ဒဂုံမြောက်မြို့မရဲစခန်းမှ ပြစ်မှုပုဒ်မ ၃၀၄(က) ဖြင့် အမှုဖွင့်ထားခြင်း ဖြစ်သည်။
ဒဂုံတက္ကသိုလ်ကျောင်းသားများ သမဂ္ဂမှ ဒု-ဥက္ကဋ္ဌဖြစ်သူ ကိုထွန်းမင်းခန့်က “ယာဉ်မောင်းအပြစ်က လွတ်ဖို့ အတွက် ကျွန်တော်တို့အဖွဲ့က အစွမ်းကုန် ကူညီပေးသွားမှာပါ။ သေဆုံးသူရဲ့ မိဘတွေကလည်း ကျေအေး ပေးမယ် ပြောပါတယ်” ဟု ပြောသည်။
အမှုကို ကိုင်တွယ်စစ်ဆေးမည့် တရားသူကြီးအနေဖြင့် သေကြောင်းကြံစည်ခြင်း ဖြစ်သည်ဟု သက်သေ အထောက်အထား ခိုင်လုံအောင် တင်ပြနိုင်ပါက အမှုကိုကျေအေးပေးစေလိုသည်ဟု ကိုထွန်းမင်းခန့်က ဆိုသည်။
အသက် ၂၆နှစ်အရွယ် ကလေးနှစ်ယောက်ဖခင်ဖြစ်သူ ဘီအမ်ယာဉ်မောင်း ကိုညီညီအောင်က“ကျွန်တော် က ကားကို ဖြေးဖြေးချင်းပဲ မောင်းလာတာပါ။ ကားနဲ့ နှစ်ပေအကွာလောက်ကျမှ အဲ့ဒီကောင်လေးက ပြေး ထွက်လာတာပါ။ ဘရိတ်ကို အမြန်ဆုံးအုပ်လိုက်ပေမယ့် သူ့ကို တိုက်မိ သွားခဲ့ပါတယ်” ဟု ပြောသည်။
မိမိတွင် အပြစ်မရှိ၍ အမှုကိုအမြန်ဆုံးနှင့် အမှန်ကန်ဆုံးဖြစ်အောင် ဆောင်ရွက်ပေးစေလိုပြီး ကျောင်းမှ တာဝန်ရှိသူများနှင့် ကျောင်းသား၊ ကျောင်းသူများကလည်း ၀ိုင်းဝန်းကူညီအားပေးကြသည်ဟု ကိုညီညီ အောင်က ဆိုသည်။
No comments:
Post a Comment