ယင်းအသိပညာပွဲများကို မတ်လ ၂၀ ရက်နေ့မှ စတင်ကာ ဆက်တိုက် လုပ်ဆောင်လျက်ရှိပြီး သင်္ကြန်အတွက် စည်းကမ်းချက်များကို လည်း ထုတ်ပြန်အသိပေးလျက်ရှိကြောင်း သိရသည်။
မတ်လ ၂၆ ရက်နေ့က စစ်တွေမြို့ အထက (၄) ရှိ မဟာပညာကျော်ခန်းမတွင် ပြုလုပ်ခဲ့သော အခမ်းအနားသို့ ခရိုင်အုပ်ချုပ်ရေးမှူး၊ ခရိုင်ရဲတပ်ဖွဲ့မှူး၊ မြို့နယ်ရပ်တပ်ဖွဲ့မှူးအပါအ၀င် လူပေါင်း ၆၀ ခန့် တက်ရောက်ခဲ့ပြီး ထုတ်ပြန်ထားသော သင်္ကြန်အတွက် စည်းကမ်းချက်များကို ဖြန့်ဝေခဲ့သည်ဟု သိရသည်။
သင်္ကြန်ကာလ မှုခင်း ကျဆင်းစေရန် အဖျက်အမှောင့် ပြုလုပ်သူများ မ၀င်ရောက်နိုင်ရေး အတွက် လူစည်ကားရာနေရာများအား ၀င်ရောက် ရှာဖွေ စစ်ဆေးမှုများ ဆောင်ရွက်ခြင်းနှင့် တည်းခိုခန်းများကို ဧည့်စာရင်းများ စစ်ဆေးခြင်းများကို ပြုလုပ်သွားမည်ဖြစ်သလို မူးယစ်ဆေးဝါးနှင့် စိတ်ကြွဆေးများ ရောင်းချမှုမရှိစေရန် သက်ဆိုင်ရာ မူးယစ်တပ်ဖွဲ့ဝင်များနှင့် ပူးပေါင်း၍ ရှောင်တခင် ၀င်ရောက်စစ်ဆေး ဖမ်းဆီးမှုများ ပြုလုပ်သွားမည်ဟု သိရသည်။
ယင်းအပြင် အရက်ပုန်းများအား ရှာဖွေဖေါ်ထုတ်ဖမ်းဆီးပြီး၊ လိုင်စင်ရ အရက်ဆိုင်များအားလည်း စည်းကမ်းနှင့် ညီ/မညီစစ်ဆေးပြီး မညီညွတ်ပါက ဥပဒေနှင့်အညီ အရေးယူ ဆောင်ရွက်မည်ဟု သိရသည်။
“ကျွန်တော်တို့ ညမထွက်ရ အမိန့်တွေ ရုပ်သိမ်းပြီးတဲ့ နောက်ပိုင်းမှာ စစ်တွေမြို့ ရှု့ခင်းသာလမ်းတစ်လျှောက် ညဘက်ဆိုရင် အရက်ဝိုင်း ဖဲဝိုင်းတွေကို တွေ့လာရပါတယ်။ အသံချဲ့စက်နဲ့ သတိပေးကျေညာမှုတွေ လုပ်ပြီးပါပြီ။ နောက်တွေ့ရင် ဖမ်းဆီးအရေးယူမှုတွေ လုပ်သွားမှာပါ”ဟု စစ်တွေခရိုင် ရဲတပ်ဖွဲ့မှူး ဒုတိယရဲမှူးကြီး သစ်ဆန်းက ပြောသည်။
သင်္ကြန်ကာလအတွင်း မှုခင်းများကျဆင်းအောင် ရဲအင်အားကိုလည်း တိုးချဲ့ချထားမည်ဟု ရဲမှူးကြီးက ပြောဆိုသည်။
ယခုနှစ် သင်္ကြန်အတွက် ထုတ်ပြန်ထားသော စည်းကမ်းများမှာ မြန်မာ့ရိုးရာ ယဉ်ကျေးမှုနှင့်အညီ ၀တ်ဆင်ပြီး ယဉ်ကျေးသိမ်မွေ့စွာ ရေကစားရမည်၊ မီးသတ်ပိုက်များဖြင့် ရေပက်ကစားခြင်း မပြုရ၊ မသန့်ရှင်းသော ရေများဖြင့် ရေပက်ကစားခြင်းမပြုရ၊ ဆိုင်ကယ်များအား အိုင်ဇောဖြုတ်၍ စီးနင်းခြင်း မပြုရ၊ ရေပက်ခံ ကားများ/ဆိုင်ကယ်များကို အရက်သေစား သောက်စားမောင်းနှင်ခြင်း မပြုရ၊ ရေပက်ခံကားများပေါ်တွင် တုတ်၊ ဓါး၊ လက်နက်များ ကိုင်ဆောင်ခြင်း၊ လျှို့ဝှက်ယူဆောင်ခြင်း မပြုရ၊ ကား ဆိုင်ကယ်များ အရှိန်ပြင်းစွာ မောင်းနှင်ခြင်း မပြုရ၊ ရေပက်ခံမဏ္ဍပ်များ ယာဉ်အန္တရာယ် ကင်းရှင်းစေရေး လမ်းပေါ်တွင် ရောက်ရှိမနေစေရ၊ သရုပ်ပျက် ၀တ်စားဆင်ယင်မှုများ ၀တ်ဆင်ခြင်း မပြုရ စသည်တို့ ဖြစ်သည်။
သင်္ကြန်ပွဲကျင်းပချိန်တွင် ဗဟိုမဏ္ဍပ်၊ ရေကစားမဏ္ဍပ်၊ စတိတ်ရှိုး၊ အများအပန်းဖြေနေရာ၊ နံသာသွေးပွဲ ပြိုင်ပွဲကျင်းပရာ နေရာ၊ သက်ကြီးပူဇော်ပွဲ နှင့် နိုင်ငံခြားသားများ လုံခြုံရေးအတွက် အဓိကထား ဆောင်ရွက်သွားမည်ဟု သိရသည်။
ယခုလာမည့်သင်္ကြန်တွင် စစ်တွေမြို့၌ ဗဟိုမဏ္ဍပါတစ်ခု၊ မိဇံရပ်ကွက်တွင် ရခိုင်ရိုးရာ ရေကစားမဏ္ဍပ် ၄ ခု နှင့် စိတ်ရှိုးတစ်ခု ပါဝင်မည်ဖြစ်ကြောင်း သိရသည်။
“အယင်နှစ်တွေကဆိုရင် ညမထွက်ရအမိန့်ထုတ်ထားတော့ ညဆယ်နာရီဆိုရင် ပွဲကသိမ်းပြီးဆိုတော့ ညဘက် လုံခြုံရေး ဆောင်ရွက်ရတာ သိပ်အခက်အခဲမရှိဘူး။ ဒီနှစ်မှာ ညမထွက်ရအမိန့်လည်း ရုပ်သိမ်းထားပြီးဆိုတော့ လုံခြုံရေးကို အထူးသတိထား ဆောင်ရွက်ရမှာဖြစ်ပါတယ်” ဟု စစ်တွေမြို့နယ် ရဲတပ်ဖွဲ့မှူး ရဲမှူး လှဌေးက ပြောသည်။
၂၀၁၄ ခုနှစ်က ရခိုင်ပြည်နယ် စစ်တွေမြို့တွင် ယာဉ်မတော် တဆမှု ၄ မှုဖြစ်ပွားခဲ့ရာ ယခုနှစ်တွင် ယင်းထက်လျော့ကျအောင် ယာဉ်ထိန်း ရဲအုပ်နှစ်ဦးနှင့် ဒုရဲအုပ်နှစ်ဦးက ဦးဆောင်ပြီး ၄ နေရာခွဲ၍ နေရာသတ်မှတ် ဆောင်ရွက်သွားမည်ဟု သိရသည်။
ယင်းသို့ ဆောင်ရွက်ရာတွင် ရဲအုပ် ထွန်းလှအောင် ဦးစီးအဖွဲ့က အဝေးပြေးကာဂိတ်မှ လောကနန္ဒာလမ်းဆုံထိ၊ ရဲအုပ်ကျော်ဇေလင်း ဦးစီးအဖွဲ့က လောနန္ဒာလမ်းဆုံမှ လမ်းမကြီးတစ်လျှောက်၊ ဒုရဲအုပ် အောင်ကျော်မိုး ဦးစီးအဖွဲ့က ပွိုင့်ကမ်းခြေမှ ကမ်းနားလမ်းတစ်လျှောက်၊ ဒုရဲအုပ် ဇော်လင်းအောင် ဦးစီးအဖွဲ့က စစ်တွေဟိုတယ် ကမ်းခြေနှင့် ၀န်ကြီးအိမ်ယာ လမ်းဆုံအထိ တာဝန်ယူဆောင်ရွက်သွားမည်ဟု သိရှိရသည်။
ရဲဦးစီးများ အပါဝင် စုစုပေါင်း ယာဉ်ထိန်းရဲတပ်ဖွဲ့ဝင် ၃၂ ဦးဖြင့် ဆောင်ရွက်သွားမည်ဟု သိရသည်။
No comments:
Post a Comment