တိုက်ပွဲဖြစ်ပွားနေသည့်နေရာနှင့် အနီးဝန်းကျင်ကျေးရွာအချို့မှ ဒေသခံများသည် မြို့နယ်တွင်းရှိ စပါးဆိပ်ကျေးရွာသို့ ပြောင်းရွှေ့တိမ်းရှောင်မှုများပြုလုပ်နေရာ ဧပြီလ ၂၄ ရက်အထိ တိမ်းရှောင်သူ ဦးရေ ၄ဝဝ ကျော်သာရှိခဲ့သော်လည်း ဧပြီ ၂၅ ရက်မှစတင်ကာ တိမ်းရှောင်သူစုစုပေါင်း ၅ဝဝ ကျော်ရှိလာနေပြီဟု တိမ်းရှောင်သူများထံသွားရောက်ကူညီပေးခဲ့သူ ကျောက်တော်မြို့ခံ ကိုဇော်ဝင်းက ပြောသည်။
“ကျနော်တို့ရထားတဲ့စာရင်းအရရော အာဏာပိုင်တွေရဲ့စာရင်းအရရော အရင်ရောက်ရှိနေတဲ့ စစ်ရှောင်လူဦးရေက ၄ဝ၇ ယောက်ပဲရှိတာ။ အဲဒါ ဒီနေ့မနက်က အာဏာပိုင်တွေက ကျနော်တို့ကို လှမ်းပြောတယ်။ ၅၇၄ ယောက်ဖြစ်သွားပြီတဲ့”ဟု ယင်းက နိရဉ္စရာသို့ပြောသည်။
စပါးဆိပ်ကျေးရွာအတွင်း ယခင်ရောက်ရှိနေသည့် စစ်တိမ်းရှောင်သူ ၄ဝဝ ကျော်မှာ ကျောက်တော် မြို့နယ် အောင်လံချောင်း၊ ကုလားကျ၊ ပင်လုံကျေးရွာတို့မှဖြစ်ပြီး ဧပြီလ ၂၅ ရက်နေ့မှ စတင်ကာ ပြောင်းရွှေ့တိမ်းရှောင်လာကြသူများမှာ ဘင်ချောင်းကျေးရွာမှ ဒေသခံများ ဖြစ်ကြသည်ဟု သိရသည်။
ယခုကဲ့သို့ စစ်တိမ်းရှောင်သူဦးရေ ထပ်မံတိုးလာသည်မှာ မှန်ကန်သည်ဟုလည်း စပါးဆိပ်ကျေးရွာ အုပ်ချုပ်ရေးမှူး ဦးမောင်ဇံဦးက နိရဉ္စရာသို့အတည်ပြုပြောသည်။
“မနေ့ကနေ စတိုးလာတာပါ။ ယောက်ျားတွေကတော့ သူတို့ရွာနဲ့ ဒီကို သွားလိုက် လာလိုက် လုပ်နေကြတယ်။ ဒါကြောင့် စာရင်းအရ လူဦးရေ ၅ဝဝ တော့ မကျော်သေးဘူးပေါ့လေ”ဟု ယင်းက ဧပြီ ၂၆ ရက်နေ့တွင်ပြောသည်။
ယခုအခါ အဆိုပါစစ်တိမ်းရှောင်ပြည်သူများမှာ စပါးဆိပ်ကျေးရွာရှိ မူလတန်းကျောင်းတွင် နေရာချပေးထားပြီး စားဝတ်နေရေး အခက်အခဲရှိနေသည်ဟု ဆိုသည်။
“သူတို့တွေရဲ့စားဝတ်နေရေးက ကျနော်တို့ထောက်ပံ့တာလေးနဲ့ဆို တစ်နပ်၊ နှစ်နပ်လောက်ပဲ အဆင်ပြေနိုင်ဦးမယ်။ ဒေသခံတွေရဲ့သွားရေးလာရေးကလည်း အရင်ကလို လွတ်လွတ်လပ်လပ် မဟုတ်တော့ ထောက်ပံ့ပေးမှုတွေ အများကြီးလိုနေသေးတယ်”ဟု တိမ်းရှောင်သူများ ထံသွားရောက် ကူညီပေးခဲ့သူ ကိုဇော်ဝင်းက ဆိုသည်။
စစ်ဘေးရှောင်ပြည်သူများ၏ စားဝတ်နေရေးနှင့် ကျန်းမာရေးကို တပ်မတော်၊ ရခိုင်ပြည်နယ် အစိုးရ၊ လူမှု အဖွဲ့အစည်းများနှင့် ကျန်းမာရေးဌာနတို့က ပူးပေါင်းဆောင်ရွက်နေသည်ဟု စပါးဆိပ်ကျေးရွာအုပ်ချုပ်ရေးမှူးက ဆိုသည်။
ကျောက်တော်နယ်စပ်နှင့် ပလက်ဝနယ်စပ်အကြားတွင် တပ်မတော်နှင့် ရက္ခိုင့်တပ်မတော်(AA)တို့မှာ မတ်လနောက်ဆုံးပတ်မှ စတင်ကာ တိုက်ပွဲများဖြစ်ပွားနေပြီး နှစ်ဘက် စစ်ရေးလှုပ်ရှားမှုများ ဆက်လက် ရှိနေဆဲ ဖြစ်ကြောင်း သိရသည်။
No comments:
Post a Comment