ထိုင်းနိုင်ငံတောင်ပိုင်း လိပ်ကျွန်းလူသတ်မှုနှင့် ပတ်သက်သည့် တရားလိုပြ သက်သေ ၁၅ ဦး မြောက်အထိ စစ်ဆေးပြီးသည့်တိုင် ၎င်းတို့၏ ထွက်ဆိုချက်များသည် အထောက်အထား ခိုင်လုံမှု ပိုမိုအားနည်လာကြောင်း သိရသည်။
တရားလိုပြ သက်သေများအား ဇူလိုင် ၈ ရက်နေ့က စတင်၍ စစ်ဆေးလျှက်ရှိရာ ယနေ့အထိ ၁၅ ဦး ထွက်ဆိုပြီး ဖြစ်ကြောင်း၊ ယနေ့ နံနက်ပိုင်းတွင် ဖမ်းဆီးခံ ၀င်းဇော်ထွန်းနှင့် ဇော်လင်းတို့ နှစ်ဦး၏ တံတွေးများကို ရယူခဲ့သည့် ရဲတပ်ကြပ်ကြီး တဦးနှင့် ရဲမှူး တဦးတို့က ထွက်ဆိုကြရာ ၎င်းတို့၏ ထွက်ဆိုချက်များသည်လည်း ခိုင်လုံမှု မရှိကြောင်း အမှုအား ကူညီဆောင်ရွက်ပေးနေသူ ရှေ့နေ ဦးအောင်မျိုးသန့်က ဧရာဝတီကို ပြောသည်။
၎င်းက“တရားလိုဘက်က အခု ထွက်ဆိုနေသူတွေဟာ အရေးကြီးတဲ့ သက်သေတွေပါ၊ သူတို့ ပြောချင်တာက ဒီအမှုဟာ မှန်ကန်ပါတယ်၊ အထောက်အထား ခိုင်လုံပါတယ်ဆိုတာ ပြောချင်တာပါ၊ ဒါပေမယ့် အခု အဲဒီ အရေးကြီးတဲ့ သက်သေ ၁၅ ဦးရဲ့ ထွက်ဆိုချက် အားလုံးနီးပါးဟာ မှတ်တမ်းနဲ့ ကွဲလွဲနေသလို ဥပဒေကြောင်းအရ ခိုင်လုံမှု အားနည်းလာတာကို တွေ့နေရပါတယ်” ဟု ပြောသည်။
လိပ်ကျွန်း ခေါ် ကော့တောင်ကျွန်း လူသတ်မှုနှင့် ပတ်သက်၍ တရားလိုပြ သက်သေ ၆၅ ဦး ထွက်ဆိုရန် တင်ပြထားပြီး၊ ယင်း အထဲမှ အဓိကကျသည့် သက်သေများအား ဦးစားပေး စစ်ဆေးနေခြင်းဖြစ်သည်။
တရားလိုပြ သက်သေ ၆၅ ဦးတွင် ၁၅ ဦး ထွက်ဆိုထားပြီး ဖြစ်ကာ ကျန်ရှိသူများထဲက အများစုကို ပယ်ဖျက်နိုင်ဖွယ်ရှိကြောင်း၊ နောက်ထပ် ထွက်ဆိုမည့် သက်သေများသည် လက်ရှိ ထွက်ဆိုပြီးသူများထက်ပင် သက်သေ ခိုင်မာမှု အားနည်းသွားနိုင်ကြောင်း ရှေ့နေ ဦးအောင်မျိုးသန့်က ပြောသည်။
သက်သေ ၁၅ ဦး၏ ထွက်ဆိုမှုများသည် ရဲမှတ်တမ်းပါ အချက်အလက်များနှင့် ကွဲလွဲနေခြင်း၊ ဥပဒေကြောင်းအရ ခိုင်လုံမှု မရှိခြင်း စသည့် အနေအထားများကြောင့် စွပ်စွဲ ဖမ်းဆီးခံ ၀င်းဇော်ထွန်းနှင့် ဇော်လင်းတို့သည် ကွင်းလုံးကျွတ် လွတ်မြောက်နိုင်ဖွယ် ရှိကြောင်း သုံးသပ်မှုများ ရှိနေသည်။ သက်သေထွက်ဆိုမှုများနှင့် ပတ်သက်၍ တရားခံဘက်မှ ရှေ့နေများက ပြန်လှန် မေးခွန်းထုတ်မှုများကိုလည်း တိကျစွာ ပြန်လည် တုံ့ပြန် ဖြေဆိုနိုင်ခြင်း မရှိကြဟု သိရသည်။
ဦးအောင်မျိုးသန့်က “ဒီနေ့ထွက်ဆိုတဲ့ ရဲနှစ်ဦးရဲ့ ထွက်ဆိုချက်ဟာ မှတ်တမ်းနဲ့ မကိုက်ညီသလိုဘဲ၊ တံတွေးကို ရယူတာကလည်းပဲ ဖမ်းပြီးမှ ရယူတာကို တွေ့ရတယ်၊ ဒါဟာ ဥပဒေအရ ဆိုရင် အကျုံးမ၀င်ပါဘူး၊ တကယ်တော့ DNA ဆိုတာ အမှုနဲ့ပတ်သက်ပြီး သံသယရှိ တယ်ဆိုရင် မဖမ်းခင် စစ်ရတာပါ၊ စစ်ဆေးလို့ DNA တူပါတယ်ဆိုမှ ဖမ်းလို့ရတာပါ” ဟု ဆိုသည်။
လိပ်ကျွန်း လူသတ်မှုအား ထိုင်းနိုင်ငံ ရှေ့နေများကောင်စီမှ ရှေ့နေကြီးများက လိုက်ပါ ဆောင်ရွက်ပေးနေကြပြီး ဘန်ကောက်ရှိ မြန်မာသံရုံးက ဖွဲ့စည်းပေးထားသည့် သံရုံး အထူးအဖွဲ့တို့က ကူညီ ဆောင်ရွက်ပေးနေကြခြင်း ဖြစ်သည်။
ထို့အတူ ထိုင်းနိုင်ငံ၏ မှုခင်း ဆရာဝန်မကြီး ဒေါက်တာ ဖွန်ထစ်ကလည်း တရားခံများဘက်က သက်သေထွက်ဆိုခွင့် ပေးရန် တောင်းဆိုထားရာ စင်တင်ဘာလ ၁၁ ရက်နေ့တွင် ခွင့်ပြုထားကြောင်း၊ ၀င်းဇော်ထွန်းနှင့် ဇော်လင်းတို့၏ DNA ကိုလည်း ပြန်လည် ရယူ၍ နှစ်ဘက် သက်သေများရှေ့တွင် ကျွမ်းကျင်သည့် မှုခင်းဆရာဝန်ကြီးများက ပြန်လည် စစ်ဆေး သွားရန် ရှိကြောင်း ဦးအောင်မျိုးသန့်က ပြောသည်။
တရားခံဘက်မှ ထွက်ဆိုမည့် သက်သေ ၃၁ ဦးကို လာမည့် စက်တင်ဘာလ ၁ ရက်နေ့တွင် စတင်စစ်ဆေး မည်ဖြစ်ပြီး စက်တင်ဘာလ အတွင်း စီရင်ချက် ချမှတ်ပေးမည်ဟု ကော့စမွေခရိုင် တရားရုံးက ပြောဆိုထားသည်။ လိပ်ကျွန်း လူသတ်မှုသည် ၂၀၁၄ ခုနှစ် စက်တင်ဘာလ ၁၅ ရက်တွင် ဖြစ်ပွားခဲ့သည်။
No comments:
Post a Comment