မြန်မာရွှေ့ပြောင်းအလုပ်သမား ၂ ဦးကို သေဒဏ်ချမှတ်လိုက်တဲ့ လိပ်ကျွန်းအမှုမှာ ထိုင်းတရားရုံးရဲ့ လုပ်ထုံးလုပ်နည်းတွေ၊ တရားစီရင်ချက်တွေနဲ့ ဆောင်ရွက်ခဲ့တာကြောင့် ပြန်လည်သုံးသပ် ပြင်ဆင်ဖို့ မရှိဘူးလို့ ထိုင်းဝန်ကြီးချုပ် ပရာယုဒ် ကျန် အိုးချားက ပြောပါတယ်။
ဒီဇင်ဘာလ ၂၈ ရက် မနက်မှာ ထိုင်းတောင်ပိုင်းကို လုပ်ငန်းစစ်ဆေးရေးထွက်ဖို့ ဘန်ကောက်ကနေ မထွက်ခွာခင် သတင်းထောက်တွေရဲ့ အမေးကို ဖြေကြား တာဖြစ်ပါတယ်။
မြန်မာနိုင်ငံ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က လိပ်ကျွန်းအမှု သက်သေ အထောက်အထားခိုင်လုံမှု ရှိမရှိ ပြန်လည်ဆန်းစစ်ပေးဖို့ ထိုင်းဒုဝန်ကြီးချုပ်၊ ကာကွယ်ရေး ၀န်ကြီးနဲ့ စစ်ဦးစီးချုပ် တို့ဆီ တောင်းဆိုခဲ့တဲ့အပေါ် ထိုင်းဝန်ကြီးချုပ်က အောက်ခြေတရားရုံးကနေ စီရင်ချက်ချပြီးဖြစ်တဲ့အတွက် အဲဒီအမှုကို ပြန်လည်သုံးသပ်ပြင်ဆင်ဖို့ မရှိကြောင်း၊ ဒါပေမယ့် အမှုဟာ ပြီးဆုံးသွားတာ မဟုတ်ဘဲ နောက်ထပ် အယူခံတရားရုံး၊ တရားလွှတ်တော်တရားရုံးနဲ့ နောက်ဆုံး လွတ်ငြိမ်းချမ်းသာခွင့် အသနားခံခွင့် အဆင့်ဆင့်တောင်းဆိုနိုင်သေးတယ်လို့ ပြောသွားပါတယ်။
ဒါ့အပြင် မြန်မာပြည်သူတွေ အန်အယ်လ်ဒီခေါင်းဆောင် ဒေါ်အောင်ဆန်းစုကြည်အိမ်ရှေ့မှာ သွားရောက်ပြီး လိပ်ကျွန်းအမှုမှာ ထိုင်းအစိုးရနဲ့ ညှိနှိုင်းဆောင်ရွက်ပေးဖို့ သွားရောက်တောင်းဆို ဆန္ဒပြခဲ့တဲ့အပေါ်ဝန်ကြီးချုပ်ရဲ့ အမြင်ကိုမေးမြန်းရာမှာတော့ အဲဒီကိစ္စဟာ နှစ်နိုင်ငံက သက်ဆို င်ရာ ရဲတပ်ဖွဲ့အချင်းချင်း ညှိနှိုင်းဆောင်ရွက်ရမယ့် တာဝန်ဖြစ်ကြောင်း၊ တရားဥပဒေအရ အယူခံ ၀င်လို့ရကြောင်း ပြန်လည်ဖြေကြားခဲ့ပါတယ်။
ထိုင်းတောင်ပိုင်း လိပ်ကျွန်းခေါ် ခိုတောင်ကျွန်းမှာ ဗြိတိသျှလူငယ်နှစ်ဦး မနှစ်နှစ်ကုန်းပိုင်းက သတ်ဖြတ်ခံရမှုမှာ မြန်မာလူငယ်နှစ်ဦး တရားစွဲခဲ့ပြီး ဒီဇင်ဘာ ၂၄ ရက်နေ့က ကော့စမွီခရိုင် တရားရုံးမှု လူသတ်မှု မုဒိမ်းမှုနဲ့ သေဒဏ်ချမှတ်ခဲ့ပါတယ်။ ဒီနောက် မြန်မာနိုင်ငံတွင်းနိုင်ငံပမှာ တရားမျှတစွာ စစ်ဆေးဖို့ တောင်းဆိုဆန္ဒပြနေကြပါတယ်။
လိပ်ကျွန်းအရေးနဲ့ပတ်သက်လို့ ထိုင်းဒုဝန်ကြီးချုပ် ဗိုလ်ချုပ်ကြီး ပရ၀စ် ၀ုန်းဆုဝမ်းကလည်း လိပ်ကျွန်းတရားစီရင်မှုအပေါ်မှာ လတ်တလော ဆန္ဒပြမှုတွေ ပိုမိုပြန့်နှံ့လာပြီး နောက်ကွယ်က ကြိုးဆွဲသူရှိနေတယ်လို့ ထိုင်းရဲဝန်ထမ်းကော်မတီအစည်းအဝေးအပြီး ပြောဆိုခဲ့ပါတယ်။ လိပ်ကျွန်းတရားစီရင်မှုကြောင့် ၂ နိုင်ငံဆက်ဆံရေး မထိခိုက်ဘူးလို့ သူက ပြောပါတယ်။
ဆန္ဒပြမှုတွေကို ကြိုးဆွဲသူတွေဟာ လက်ရှိထိုင်းအစိုးရနဲ့ ထိုင်းအမျိုးသား ငြိမ်းချမ်းရေး ကောင်စီပေါ်မှာ အကောင်းမမြင်တဲ့ အဖွဲ့၊ အစိုးရကို တော်လှန်နေတဲ့အဖွဲ့၊ ထိုင်းအစိုးရရဲ့ လုပ်ငန်းတွေပြိုလဲစေလိုတဲ့ အဖွဲ့ဖြစ်တယ်လို့လည်း ဒုဝန်ကြီးချုပ်က ဆက်ပြောပါတယ်။
ဒါကြောင့် အဆိုပါအဖွဲ့နဲ့ နိုင်ငံရေးနဲ့ ပတ်သက်မှုရှိမရှိ စုံစမ်းစစ်ဆေးဖို့၊ ဖမ်းဆီးအရေးယူဖို့ ရဲတပ်ဖွဲ့နဲ့ စစ်တပ်ကို ညွှန်ကြားထားကြောင်း၊ ရန်ကုန်ရှိ ထိုင်းသံရုံးရှေ့မှာ မြန်မာတွေ ဆန္ဒပြနေကြတဲ့အပေါ်မှာတော့ ဘာမှစိုးရိမ်မှုမရှိဘူးလို့ ထိုင်းဒုဝန်ကြီးချုပ်က ပြောပါတယ်။
အလားတူ ထိုင်းနိုင်ငံခြားရေးဝန်ကြီးကလည်း လိပ်ကျွန်းဆန္ဒပြမှုတွေနဲ့ပတ်သက်လို့ စိုးရိမ်ပူပန်မှု ကို ထုတ်ဖော်ပြောဆိုခဲ့ပါတယ်။
လိပ်ကျွန်းဆန္ဒပြမှုမှာ တတိယအုပ်စု ၀င်ရောက်စွက်ဖက်သောင်းကျန်းလာမှာ စိုးရိမ်တဲ့အတွက် အဲဒီကိစ္စနဲ့ ပတ်သက်ပြီး မြန်မာသံရုံးနဲ့ တိုင်ပင်ဆွေးနွေးပြီးပြီလို့ ထိုင်းနိုင်ငံခြားရေးဝန်ကြီး နိုင်းဒွန်းပရမတ် ၀ိနိုင်းက သတင်းထောက်တွေကို ပြောပါတယ်။
လိပ်ကျွန်းတရားစီရင်မှုနဲ့ ပတ်သက်တဲ့အကြောင်း ရှင်းလင်းပြောဆိုခဲ့သလို ဆန္ဒပြမှုတွေ ဒီထက် ပိုပြီးပြန့်ပွားလာခြင်းမရှိဖို့၊ တည်ငြိမ်အေးချမ်းဖို့အတွက် ၂ ဘက်နိုင်ငံ ၀န်ကြီးတွေ ပူးပေါင်း အဖြေရှာရမယ်လို့ သူက ဆက်ပြောပါတယ်။
ဆန္ဒပြမှုတွေမှာ နောက်ဆက်တွဲရှုတ်ထွေးမှုတွေ ၀င်ရောက်လာနိုင်ပြီး တတိယအုပ်စုပါ ၀င်ရောက်စွက်ဖက်သောင်းကျန်းလာနိုင်ကြောင်း၊ အခြေအနေတွေဟာ ခန့်မှန်းလို့မရနိုင်တဲ့ အတွက် နှစ်နိုင်ငံ ပူးပေါင်းပြီး ကြိုတင်ကာကွယ်ကြရမယ်လို့ ဆိုပါတယ်။
လက်ရှိမြန်မာနိုင်ငံက ထိုင်းလူမျိုးတွေနဲ့ မြန်မာနိုင်ငံကို ခရီးသွားဖို့ပြင်နေတဲ့ ထိုင်းလူမျိုးတွေ အနေနဲ့ အခြေအနေတည်ငြိမ်မှုမရှိသေးရင် သူ့အနေနဲ့ ခရီးသွားလာခြင်းမပြုစေချင်ကြောင်း၊ ဒါပေမယ့် ပြင်ဆင်ပြီးရင်တော့ တားမြစ်မှုမရှိဘူးလို့ ဆိုပါတယ်။
ဒါပေမယ့် ရန်ကုန်ရှိထိုင်းသံရုံးကတော့ ဆန္ဒပြမှုတွေကြောင့် သံရုံးအ၀င်အထွက်ခက်ခဲမှုရှိလို့ ဒီဇင်ဘာလ ၂၈ ရက်ကနေ ၃၀ ရက်နေ့အထိ ၀န်ဆောင်မှုလုပ်ငန်းတွေ ယာယီပိတ်ထားတယ်လို့ ထိုင်းနိုင်ငံခြားရေးဝန်ကြီးက ပြောသွားပါတယ်။
No comments:
Post a Comment