လွန်ခဲ့တဲ့အပတ် သောကြာနေ့ (၁၅.၇.၂၀၁၆) က တူရကီနိုင်ငံမှာ စစ်တပ်က အာဏာသိမ်းဖို့ ကြိုးစားမှုတခု ဖြစ်ပွားခဲ့ပေမယ့် မအောင်မြင်ခဲ့ပါဘူး။ အဲဒီ မအောင်မြင်တဲ့ အာဏာသိမ်းမှုအတွင်း ပစ်ခတ်တိုက်ခိုက်မှုတွေကြောင့် အာဏာသိမ်းမှုကို ထောက်ခံအားပေးသူ ၁၀၄ ယောက် အပါအ၀င် အနည်းဆုံး လူ ၂၉၄ ယောက် သေဆုံးပြီး ၁၅၀၀ ကျော် ဒဏ်ရာရရှိခဲ့တယ်လို့ နယူးယောက်တိုင်းမ်သတင်းအရ သိရပါတယ်။ အာဏာသိမ်းဖို့ ကြိုးစားခဲ့မှုအတွက် အနည်းဆုံး လူပေါင်း ၆၀၀၀ လောက် ဖမ်းဆီးခံခဲ့ရပြီး တရားရေးဝန်ကြီး ဘက်ခီယာ ဘော့ဇဒက်ကတော့ ရှင်းလင်းဖယ်ရှားရေးဟာ ဆက်လုပ်နေဆဲဖြစ်ပြီး အဖမ်းခံရသူဦးရေဟာ ၆၀၀၀ ထက် ပိုနိုင်တယ်လို့ ပြောကြားခဲ့ပါတယ်။
ဘီဘီစီ သတင်းဌာနရဲ့ သတင်းအရ အဆင့်မြင့်စစ်အရာရှိတွေ ပါဝင်ပြီး တရားသူကြီး ၂၀၀၀ ကျော်လည်း ပါဝင်တယ်လို့ ဆိုပါတယ်။ အောက်ခြေစစ်သားတွေ၊ စစ်သားသစ်တွေ အများကြီးကိုလည်း မြို့တော် အင်ကာရာက ကျောင်းတွေနဲ့ အားကစားရုံတွေမှာ ပိတ်လှောင် ချုပ်နှောင်ထားလိုက်ပါတယ်။
ဒီအာဏာသိမ်းမှုနဲ့ပတ်သက်ပြီး တူရကီသမ္မတ အာဒိုဂန်က နိုင်ငံကို သစ္စာဖောက်တဲ့သူတွေအနေနဲ့ တန်ဖိုးကြီးကြီး ပြန်ပေးဆပ်ရလိမ့်မယ်လို့ ပြောကြားခဲ့ပြီး ဥရောပသမဂ္ဂ ၀င်ရောက်နိုင်ရေးအတွက် ၂၀၀၄ ခုနှစ်မှာ ဖျက်သ်ိမ်းပေးခဲ့ရတဲ့ သေဒဏ် အပြစ်ပေးမှုကို ပြန်ပြီး ကျင့်သုံးဖို့ကိုတောင် အရိပ်အမြွက် ပြောကြားခဲ့ပါတယ်။ ဗုဒ္ဓဟူးနေ့မှာတော့ သမ္မတ အာဒိုဂန်ဟာ သူ့ရဲ့ လုံခြုံရေးကောင်စီနဲ့ ၀န်ကြီးများကောင်စီနဲ့ တွေ့ဆုံဆွေးနွေးခဲ့ပြီး သူတို့ရဲ့ သဘောတူ ထောက်ခံမှုနဲ့ နိုင်ငံမှာ ၃ လတာ အရေးပေါ်အခြေအနေ ကြေညာခဲ့ပါတယ်။ အရေးပေါ်အခြေအနေ ကြေညာခဲ့တာနဲ့ ပတ်သက်ပြီး အာဒိုဂန်က “နိုင်ငံကို အရေးပေါ်အခြေအနေ ကြေညာရတဲ့ ရည်ရွယ်ချက်က ဒီမိုကရေစီ၊ တရားဥပဒေစိုးမိုးရေးနဲ့ နိုင်ငံသားတွေရဲ့ လွတ်လပ်ခွင့်တွေကို ခြိမ်းခြောက်လာတဲ့ ခြိမ်းခြောက်မှုတွေကို ဖြစ်နိုင်သမျှ အမြန်ဆုံး ဖယ်ရှားရှင်းလင်းပစ်နိုင်ဖို့ အဆင်ပြေ အကောင်းမွန်ဆုံးခြေလှမ်းတွေ လှမ်းနိုင်ဖို့ ဖြစ်ပါတယ်” လို့ ပြောဆိုခဲ့တယ်လို့ အစိုးရထုတ်ပြန်ချက်တခုက ဆိုပါတယ်။ သမ္မတ အာဒိုဂန်က အမျိုးသား တီဗွီပရိသတ်တွေကိုလည်း အရေးပေါ်အခြေအနေ ကြေညာတာဟာ ဒီမိုကရေစီကို ခြိမ်းခြောက်တာ မဟုတ်ဘဲ အုပ်ချုပ်ရေးမှူးတွေက သူတို့ရဲ့အာဏာကို တိုးချဲ့အသုံးပြုလို့ ရလာအောင်နဲ့ စစ်တပ်ဟာလည်း အုပ်ချုပ်ရေးမှူးတွေရဲ့ ထိန်းချုပ်မှုအောက်မှာ ရောက်လာအောင် လုပ်လိုက်တာပါလို့ ပြောကြားခဲ့ပါတယ်။
သူက လက်နက်ကိုင်တပ်တွေထဲမှာရှိနေတဲ့ အဖျက်သမားတွေ အားလုံးကိုလည်း ဖယ်ရှားရှင်းလင်းပစ်ဖို့ အာမခံ ပြောကြားလိုက်ပါတယ်။ သူက “အဲဒါဟာ ကင်ဆာရောဂါလိုပါပဲ၊ တူရကီခန္ဓာကိုယ်ထဲ ဖြစ်ပွားနေတဲ့ ကင်ဆာဆဲလ် ပြန့်ပွားမှုလိုပါပဲ” လို့ ပြောကြားခဲ့ပြီး အာဏာသိမ်းဖို့ ကြိုးစားတာကို တုံ့ပြန်လှုပ်ရှားမှုတွေကိုလည်း ချီးကျူးပြောဆိုခဲ့ပါတယ်။ သူက “ကျနော်တို့နိုင်ငံသားတိုင်းဟာ အင်အားတရပ်တည်းအဖြစ် ပေါင်းစည်းခဲ့တာပါပဲ” လို့ ပြောကြားခဲ့ပါတယ်။
ခုချိန်မှာတော့ သီတင်းပတ်ကုန်အတွင်းမှာ လူ ၅၀၀၀၀ ကျော်လောက် အလုပ်ကထုတ်တာ ဒါမှမဟုတ် အလုပ်ရပ်ဆိုင်းတာကို ခံခဲ့ရပြီး ဖြစ်ပါတယ်။ အစိုးရရဲ့ သန့်စင်ဖယ်ရှားရေးမှာ အနည်းဆုံး ဗိုလ်ချုပ်ကြီးနဲ့ ရေတပ်ဗိုလ်ချုပ်ကြီး ၁၁၈ ယောက် ထိန်းသိမ်းခံခဲ့ရ၊ ရာထူးဖြုတ်ခံခဲ့ရတယ်လို့ တူရကီအစိုးရ အသံလွှင့်ဌာနရဲ့ သတင်းအရ သိရပါတယ်။ အစိုးရပိုင် အင်နာဒူလူ သတင်းဌာနကတော့ ပြည်ထဲရေးဝန်ကြီးဌာန တပ်ဖွဲ့ဝင် ၈၇၇၇ ယောက်လည်း တာဝန်က ရပ်ဆိုင်းထားခံခဲ့ရပြီး သူတို့ထဲက အများစုဟာ ပုလိပ်တွေဖြစ်ကြတယ်လို့ ဆိုပါတယ်။ နောက် တူရကီ ထောက်လှမ်းရေးတပ်ဖွဲ့ဝင် ၁၀၀ လောက်လည်း အလားတူ တာဝန်က ရပ်ဆိုင်းခံခဲ့ရပါတယ်။
အင်နာဒိုလူ သတင်းဌာနရဲ့ အဆိုအရ ပုဂ္ဂလိက ကျောင်းတွေက ဆရာ ၂၁၇၃၈ ယောက် လိုင်စင်ရုပ်သိမ်းခံခဲ့ရပြီး တရားသူကြီးနဲ့ တရားစွဲဆိုရေးမှူး ၂၇၄၅ ယောက်ဟာလည်း ဖမ်းမိန့်ထုတ်ထားခံခဲ့ရတယ်လို့ သိရပါတယ်။ သူတို့အားလုံး ထိန်းသိမ်းခံခဲ့ရပြီး ဟုတ်မဟုတ်ကတော့ မသေချာသေးပါဘူး။ အဲဒီအပြင်မှာ တက္ကသိုလ် အုပ်ချုပ်ရေးမှူး ၁၅၇၇ ယောက်ကိုလည်း ရာထူးက နုတ်ထွက်ပေးဖို့ ပြောတာကို ခံခဲ့ရပြီး ဖြစ်ပါတယ်။ ဒါတင်မကသေးဘဲ တူရကီရဲ့ ထိပ်ဆုံး သတင်းထုတ်ပြန် ကြေညာရေး အာဏာပိုင်တွေက သမ္မတ အာဒိုဂန်က အာဏာသိမ်းမှုကို နောက်ကွယ်က ကိုင်တွယ်ခဲ့တယ်လို့ အပြစ်ဖို့ထားတဲ့ အစ္စလမ် ဘာသာရေးခေါင်းဆောင် ဖက်သူလာဂူလန်နဲ့ ဆက်စပ်မှုရှိနေတယ်လို့ သံသယရှိခံခဲ့ရတဲ့ ရေဒီယိုနဲ့ တီဗွီသတင်းဌာန ၂၄ ခုကို လိုင်စင်ပြန်ပြီး ရုပ်သိမ်းလိုက်တယ်လို့ ဆိုပါတယ်။
မအောင်မြင်တဲ့ အာဏာသိမ်းမှုနောက်ပိုင်း အစိုးရရဲ့ သန့်စင်ရှင်းလင်းရေး စီမံချက်တွေမှာ အာဏာသိမ်းမှုကို အားပေးထောက်ခံခဲ့သူ ပါဝင်ပတ်သက်ခဲ့သူတွေလို့ အစိုးရက ယူဆတဲ့ စစ်တပ် အရာရှိကြီးတွေနဲ့ တပ်ဗိုလ်တပ်သားတွေ အပါအ၀င် ပုလိပ်အဖွဲ့၊ ထောက်လှမ်းရေး တပ်ဖွဲ့ဝင်တွေနဲ့ ပညာရေးပိုင်းဆိုင်ရာ တာဝန်ရှိပုဂ္ဂိုလ်ပေါင်း ၅ သောင်းကျော်ကို ထိန်းသိမ်းဖမ်းဆီး၊ တာဝန်က ရပ်စဲထားခဲ့ပြီးဖြစ်သလို အစိုးရရဲ့ သန့်စင်ရှင်းလင်းရေး စီမံချက်ကိုလည်း ဆက်လက်လုပ်ကိုင် ဆောင်ရွက်သွားမယ်လို့ တာဝန်ရှိသူတွေက ဆိုပါတယ်။ သမ္မတ အာဒိုဂန်နဲ့ သဘောထား ကွဲလွဲ ဆန့်ကျင်နေကြသူတွေကို ဆန့်ကျင်တိုက်ဖျက်ဖို့ လုပ်ဆောင်နေမှုတွေ အများကြီး တိုးများလာတော့မယ်လို့ မျှော်လင့်မှုတွေ ရှိနေတဲ့ အချိန်အတွင်းမှာပဲ ဥရောပ နိုင်ငံရေးသမားတွေက အာဏာသိမ်းဖို့ ကြိုးစားတဲ့ကိစ္စက တရားဥပဒေ စိုးမိုးရေးကို ဂရုမစိုက်ဘဲ လွတ်လွတ်လပ်လပ် ကြိုက်သလို ဖြည့်သွင်းခွင့်ရှိတဲ့ ကွက်လပ်ချန်ထားပေးတဲ့ ချက်လက်မှတ်တခု ပေးခဲ့တာ မဟုတ်တဲ့အကြောင်း သတိပေး ပြောကြားခဲ့ပါတယ်။
အမေရိကန်သမ္မတ ဘားရက် အိုဘားမားကလည်း ဖမ်းဆီးခံ အာဏာသိမ်းဖို့ ကြံစည်သူတွေကို ကြမ်းကြမ်းတမ်းတမ်း ကိုင်တွယ်တာတွေ၊ အပေါ်ပိုင်း ကိုယ်လုံးတီး အောက်ခံဘောင်းဘီတွေနဲ့ပဲ လက်ထိပ်နောက်ပြန်ခတ်ခံထားရတဲ့ ဖမ်းဆီးခံထားရသူတွေရဲ့ ဓာတ်ပုံတွေကိုကြည့်ပြီး သူ့အနေနဲ့ စိုးရိမ်ပူပန်မှု ရှိခဲ့တဲ့အကြောင်း ပြောကြားခဲ့ပါတယ်။
တူရကီသမ္မတ အင်ဒိုဂန်ကတော့ သောကြာနေ့က သေဆုံးသွားခဲ့တဲ့ ဂူလန်ရဲ့ သစ္စာခံတယောက်ရဲ့ အသုဘအခမ်းအနားမှာ အစိုးရ ယန္တရားထဲက အဖျက်သမားတွေကို ဖယ်ရှားရှင်းလင်းပစ်မယ်လို့ ခပ်မာမာပဲ တုံ့ပြန်ပြောကြားခဲ့ပါတယ်။ တူရကီသမ္မတက သူ့ရဲ့ရန်ဘက်ဟောင်းကြီးဖြစ်တဲ့၊ သူ့ဘာသာ အမေရိကန်ပြည်ထောင်စုမှာ ပြည်ပြေးအဖြစ် ခံယူနေထိုင်နေတဲ့ အစ္စလမ် ဘာသာရေးခေါင်းဆောင် ဖက်သူလာဂူလန်ကို အမေရိကန်ပြည်ထောင်စုကနေ နှင်ထုတ်ပေးဖို့ အမေရိကန်ပြည်ထောင်စုကို တောင်းဆိုထားခဲ့ပါတယ်။ မစ္စတာဂူလန်ကတော့ သူ့အနေနဲ့ အမေရိကန်ပြည်ထောင်စုက နယ်နှင်ဒဏ်ပေးရင်လည်း နာခံသွားမှာဖြစ်တယ်လို့ ပြောကြားပြီး ဒီအုံကြွမှုမှာ သူဘာမှ ပါဝင်ပတ်သက်မှု မရှိခဲ့ဘဲ တူရကီသမ္မတ အာဒိုဂန် ကိုယ်တိုင်က တရားစီရင်ရေးကဏ္ဍနဲ့ စစ်တပ်ကို တရားဝင်နှိပ်ကွပ်ဖို့ ဒီတိုက်ခိုက်မှုကို သူကိုယ်တိုင် ဖန်တီးခဲ့တာလည်း ဖြစ်နိုင်တယ်လို့ တုံ့ပြန်ပြောဆိုခဲ့ပါတယ်။
ထောင်သောင်းချီတဲ့ သမ္မတ ထောက်ခံသူတွေကလည်း အသုဘအခမ်းအနားမှာ လက်စားချေဖို့ စုဝေးရောက်ရှိလာခဲ့ကြပြီး ဂူလန်ထောက်ခံသူ အာဏာသိမ်းဖို့ ကြံစည်သူတွေကို အပြစ်ပေးဖို့ သေဒဏ်အပြစ်ဒဏ် ပြန်လည်သတ်မှတ်ဖို့ တောင်းဆိုခဲ့ကြတာကိုလည်း တွေ့ရပါတယ်။
ဒေသ သတင်းစာ ခမ်းဟယူရီဗစ်ရဲ့ သတင်းပေးပို့ချက်တခု အရတော့ ၃၀၀ လောက်ရှိတဲ့ အခု အာဏာသိမ်းဖို့ ကြိုးစားသူတွေက တူရကီအစိုးရဟာ မစ္စတာဂူလန်ကို ထောက်ခံအားပေးတယ်လို့ စွပ်စွဲခံရသူ စစ်သားတွေကို ဖမ်းဝရမ်း ထုတ်ပေးတော့မယ်လို့ သတင်းကြားခဲ့ရတဲ့အတွက် သမ္မတ အာဒိုဂန် အားလပ်ရက်ထွက်နေတဲ့အချိန် သောကြာနေ့မှာ သူတို့ရဲ့ အစီအမံကို စောပြီး လုပ်ဆောင်ခဲ့ရတာဖြစ်တယ်လို့ ဖော်ပြထားခဲ့ပါတယ်။
တကယ်တော့ ကမ်းရိုးတန်း အပန်းဖြေစခန်းက အင်စတန်ဘူလ်ကို ပြန်လာတဲ့ သမ္မတရဲ့ လေယာဉ်ကို အနည်းဆုံး F-16 တိုက်လေယာဉ် ၂ စီးက အနှောင့်အယှက် ပေးခဲ့တယ်လို့ ဆိုပါတယ်။ ဖြစ်စဉ်ကိုသိထားတဲ့ စစ်အရာရှိဟောင်း တယောက်ကတော့ “သူတို့ ဘာဖြစ်လို့ သမ္မတလေယာဉ်ကို ပစ်မချခဲ့သလဲ ဆိုတာကတော့ နားမလည်နိုင်ဘူး” လို့ ပြောခဲ့တယ်လို့လည်း ဆိုပါတယ်။
တကယ်တော့ သမ္မတ အာဒိုဂန်ကို ပြည်သူတ၀က်လောက်က ထောက်ခံပြီး တ၀က်လောက်က ဆန့်ကျင်ကြတယ်လို့ တူရကီအရေး ကျွမ်းကျင်သူတွေက ဆိုပါတယ်။ ခု စစ်အုပ်စုတခုက အာဏာသိမ်းဖို့ ကြိုးစားခဲ့တဲ့ကိစ္စမှာ စစ်အာဏာရှင်စနစ်နဲ့ အုပ်ချုပ်မှာကို တကယ်တန်း မလိုလားကြတဲ့ ပြည်သူတွေက အင်နဲ့အားနဲ့ ဆန့်ကျင် အနိုင်ယူခဲ့တာဆိုရင်တော့ ကျနော်တို့ မြန်မာနိုင်ငံ အပါအ၀င် ကမ္ဘာ့နိုင်ငံတွေ အားလုံးအတွက် နမူနာကောင်းတခု ဖြစ်ပါတယ်။ စစ်တပ်က အာဏာသိမ်းချင်တိုင်း သိမ်းလို့မရဘူး။ တို့ပြည်သူတွေ လက်မခံဘူးဆိုပြီး ညီညီညွတ်ညွတ် ၀ိုင်းဝန်းဆန့်ကျင်ကြရင် လက်နက်နဲ့ အာဏာသိမ်းတာမျိုးတွေကို အနိုင်ယူနိုင်တယ်ဆိုတဲ့ နမူနာ ဖြစ်ပါတယ်။
ခု တူရကီအစိုးရကို စစ်တပ်က အာဏာသိမ်းတာကို ပြည်သူတွေ လက်မခံလို့ ရှုံးနိမ့်သွားခဲ့တယ်ဆိုတဲ့ အချက်တခုတည်းကတော့ အလွန်ကောင်းမွန်တဲ့ နမူနာတခုပဲ ဖြစ်ပါတယ်။ ဒါပေမယ့် တူရကီနိုင်ငံရဲ့ ကြက်ဥအရောင်နဲ့ တိမ်တောင်တွေကိုတော့ ကျနော်တို့ ဆက်ပြီး လေ့လာစောင့်ကြည့်ရအုံးမှာပဲ ဖြစ်ပါတယ်။
No comments:
Post a Comment