“တိုင်းရင်းသား လက်နက်ကိုင် ၁၀ ဖွဲ့နှင့် အပစ်အခတ် ရပ်စဲနိုင်ခဲ့ပြီး KIA တဖွဲ့နှင့်သာ ဆွေးနွေး နေဆဲအဖြစ် ကျန်ရှိနေ ကြောင်း၊ ယခုနှစ် ဖေဖော်ဝါရီ ၄ ရက်က ကျင်းပခဲ့သည့် ရွှေလီ ဆွေးနွေးပွဲတွင် ရလဒ်ကောင်းများ ရရှိ ခဲ့သည့်အတွက် မကြာမီ ကချင်ပြည် နယ်၌ ငြိမ်းချမ်းရေး ရောင်ခြည်သန်းလာတော့မည် ဖြစ်ကြောင်း၊ KIA နှင့် ငြိမ်းချမ်းရေး ရရှိပါက ၁၉၄၈ ခုနှစ် နောက်ပိုင်း မြန်မာ တနိုင်ငံလုံး၌ ပထမဆုံးအကြိမ် သေနတ်သံများ ရပ်စဲပြီး ငြိမ်းချမ်းရေး ရရှိပြီဟု သမိုင်းမှတ်တမ်း တင်နိုင်တော့မည် ဖြစ်ကြောင်း”ဟု ဦးသိန်းစိန် က ပြောသည်။
ပြည်ထောင်စုနေ့ အခမ်းအနားသို့ တက်ရောက်လာကြသည့် တိုင်းဒေသကြီးနှင့် ပြည်နယ်များမှ တိုင်းရင်းသား လူမျိုးရေးရာ ၀န်ကြီးများ နှင့် တွေ့ဆုံပွဲတွင် ထိုသို့ ပြောဆိုလိုက်ခြင်း ဖြစ်သည်။
နှစ်ဘက်တိုက်ပွဲများဖြစ်ပွားနေသည့်ကြားက ယခုလ ၄ ရက်နေ့တွင် ကချင်လွတ်လပ်ရေးအဖွဲ့ (KIO) နှင့် အစိုးရ ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့တို့ တရုတ်-မြန်မာ နယ်စပ် ရွှေလီမြို့ရှိ Jin Cheng Hotel တွင် အလွတ်သဘော တွေ့ဆုံ ဆွေးနွေးခဲ့ကြပြီး နှစ်ဘက်ခိုင်မာသည့် စစ်ပြေငြိမ်းရေးကို အလျှင်အမြန် အကောင်အထည် ဖော်နိုင်ရန် သဘောတူညီကြကြောင်း တွေ့ဆုံပွဲအပြီးတွင် ပူးတွဲကြေညာချက် ထုတ်ပြန်ခဲ့ကြသည်။
ထို့အပြင် နှစ်ဦးနှစ်ဖက် ဆက်သွယ်ရေးလမ်းကြောင်းများ ထားရှိရေး၊ စစ်ရေးတင်းမာမှုများ လျှော့ချနိုင်ရေးနှင့် နောက်တကြိမ် ဆွေးနွေးပွဲ တွင် လေ့လာသူများနှင့် သက်သေများအဖြစ် ပါဝင်နိုင်သည့် အဖွဲ့အစည်းများအား ဖိတ်ခေါ်ရေး စသည်တို့ကိုလည်း သဘောတူညီခဲ့ကြသည်။
KIO နှင့် အစိုးရတို့ ယခုလကုန်ပိုင်းတွင် ထပ်မံဆွေးနွေးကြမည်ဖြစ်ကြောင်း တွေ့ဆုံမည့်နေရာ၊ ဆွေးနွေးမည့် အကြောင်း အရာများကို အတိအကျ ထုတ်ပြန်နိုင်ခြင်းမရှိသေးသော်လည်း ယင်းတွေ့ဆုံမည့်ဆွေးနွေးပွဲတွင် အစိုးရဘက်က စစ်ဘက်ဆိုင်ရာ အကြီး အကဲ တချို့ တက်ရောက်မည်ဖြစ်ကြောင်း အစိုးရ ငြိမ်းချမ်းရေး အကျိုးဆောင် ဦးလှမောင်ရွှေ က ဧရာဝတီသို့ ပြောသည်။
“မနက်က ဝန်ကြီးဦးအောင်မင်း ရှင်းပြတာကတော့ နောက်တခေါက် KIO နဲ့ဆွေးနွေးတဲ့အခါ တပ်က အရာရှိကြီး တချို့ပါမယ် လို့ ပြောတယ်၊ KIO ဘက်ကတော့ မသိသေးဘူး”ဟု က ဆိုသည်။
ယခုလ ၄ ရက်နေ့က ရွှေလီ ဆွေးနွေးပွဲသည် မျှော်လင့်ထားသည်ထက် အဆင်ပြေခဲ့ကြောင်း ယင်းနောက် တိုက်ပွဲများလည်း သိသိသာသာ လျော့ကျသွားကြောင်း ဦးလှမောင်ရွှေက ဆက်ပြောသည်။
KIO ၏ ယနေ့ ရက်စွဲဖြင့် ထုတ်ပြန်သည့် အချက် ၉ ချက်ပါ ပြည်သူလူထုသို့ အသိပေး ကြေညာချက်တွင်လည်း စစ်မှန်သော ငြိမ်းချမ်းရေး ရရှိနိုင်ရန် နှင့် တိုင်းရင်းသားများ အားလုံးအတွက် တန်းတူ ညီမျှမှု၊ ကိုယ်ပိုင် ပြဌာန်းခွင့်များကို စားပွဲဝိုင်းတွင် တွေ့ဆုံဆွေးနွေး၍ အဖြေရှာမည် ဖြစ်သည်ဟု ပါရှိသည်။
ကချင်ပြည်နယ်အတွင်း ငြိမ်းချမ်းရေး အမြန်ရရှိရန် ရည်ရွယ်၍ တပ်မတော်သည် နိုင်ငံတော် သမ္မတရုံး၏ ၂၀၁၁ ခုနှစ် ဒီဇင်ဘာ ၁၁ ရက် ရက်စွဲပါ ညွှန်ကြားချက်နှင့် ပြည်ထောင်စု အစိုးရအဖွဲ့၏ သတင်းထုတ်ပြန်ကြေညာချက် (၃/၂၀၁၃) ပါအတိုင်း မိမိကို ကာကွယ်ခြင်းမှ အပ ပစ်ခတ်တိုက်ခိုက်မှု မပြုရန် အလေးထားလိုက်နာဆောင်ရွက်လျက်ရှိကြောင်း ကာကွယ်ရေး ဝန်ကြီးဌာန ကို ကိုးကား၍ ယနေ့ထုတ် မြန်မာ့အလင်း သတင်းစာကလည်း ဖော်ပြထားသည်။
တနင်္လာနေ့မွန်းလွဲပိုင်းက ဖားကန့်မြို့နယ်၊ ဂျာရားယန် ကျေးရွာအနီး KIA တပ်ရင်း ၆ မှ ဗိုလ်ကြီး လဒွဲဦးဆောင်သည့် ၁၀ ဦးပါအဖွဲ့နှင့် နယ်မြေစိုးမိုးရေး ဆောင်ရွက်နေသည့် တပ်မတော်စစ်ကြောင်းတို့ တွေ့ဆုံခဲ့ရာ ဗိုလ်ကြီးလဒွဲ အဖွဲ့မှ အစိုးရ စစ်ကြောင်းအား လာရောက်နှုတ်ဆက်ခဲ့ပြီး ထွက်ခွာသွားကြောင်း၊ တပ်မတော် အနေဖြင့် ယခုလ ရွှေလီဆွေးနွေးပွဲအပြီး နှစ်ဘက် ပစ်ခတ်မှုများ မဖြစ်ပွားစေရေး ထိန်းသိမ်း လုပ်ဆောင်လျက်ရှိကြောင်းလည်း မြန်မာ့အလင်းက ဆိုသည်။
ယင်းသို့ တွေ့ဆုံမှုများ အပါအဝင် နှစ်ဘက် နောက်ထပ်တွေ့ဆုံဆွေးနွေးရေး အခြေအနေများ၊ နယ်မြေအတွင်း နှစ်ဘက် ဆက်ဆံ ရေး အခြေအနေများ သိနိုင်ရန် ဧရာဝတီက KIO/KIA အဖွဲ့ တာဝန်ရှိသူများကို ဆက်သွယ်ခဲ့သော်လည်း မရရှိခဲ့ပေ။
သို့သော် ကချင်ပြည်နယ်အတွင်း နှစ်ဘက်တိုက်ပွဲများသိသိသာသာ ကျဆင်းသွားပြီး ပစ်ခတ်မှုများ မဖြစ်စေရန် ထိန်းသိမ်းမှုများပင် ရှိကြောင်း ဒေသတွင်း အခြေအနေများကို စောင့်ကြည့်နေသည့် ကချင်ငြိမ်း ချမ်းရေး ဆွေးနွေးရေး အကျိုးဆောင် အဖွဲ့ (PCG) မှ ဦးဆန်းအောင်က ဧရာဝတီသို့ ပြောသည်။
“ဒီတခါကတော့ တိုက်ပွဲတွေ တကယ်လျော့ကျ သွားတာတွေ့ရတယ်၊ သွားရင်းလာရင်း ထိပ်တိုက်တွေ့တာတွေ ရှောင်ပေးတာမျိုးတို့ ပြီးတော့ အမြဲတမ်းနီးကပ်နေတဲ့ ဟာမျိုးမှာ မင်းတို့လည်း မပစ်နဲ့ ငါတို့လည်း မပစ်ဘူးဆိုပြီး ဟိုဘက် ဒီဘက် လှမ်းအော်ပြောကြ တာတို့ အဲဒါမျိုးလေးတွေတော့ ရှိကြတယ်လို့ပြောတယ်”ဟု ဦးဆန်းအောင် က ပြောဆိုသည်။
No comments:
Post a Comment