ယင်းမီးမှာ ယနေ့ နံနက် ၂ နာရီ ၂၀ မိနစ် မှ ၃ နာရီကျော်ထိ လောင်ကျွမ်းခဲ့သည်ဟု ဒေသခံ တစ်ဦးဖြစ်သူ ကိုထွန်းထွန်းနိုင်က ပြောသည်။
“ ဒိုင် (၉) ဒိုင် အပါအ၀င် ဆိုင်ခန်း (၁၅) ခန်း မီးထဲပါသွားပါတယ်။ ဒိုင်ဆိုတာက အဲဒီဆိပ်ကမ်းမှာရှိတဲ့ ဆိုင်ကြီးတွေကို ပြောတာပါ။ အနီးအနားက ကုန်စုံဆိုင်အချို့လည်း လောင်သွားတဲ့ အထဲပါသွားပါတယ်” ဟု ကိုထွန်းထွန်းနိူင်က ဆိုသည်။
ယင်းမီးမှာ ကျောက်ဖြူမြို့၊ မြစ်နားတန်းရပ်ကွက် ဂျပန် ဆိပ်ကမ်းနေ ဒေါ်ရီရီဝင်း၏(၃၁ နှစ်)၏ ကုန်ခြောက်ဆိုင်တွင် ယနေ့ နံနက် ၂ နာရီ ၂ဝ မိနစ်ခန့်က ဝါယာလျှော့ဖြစ်ရာမှ မီးလောင်ခဲ့ခြင်းဖြစ်ကြောင်း၊ ယင်းမှတဆင့် အနီးရှိ ဓနိမိုး၊ ဝါးထရံထားသည့် ကုန်ခြောက်ဆိုင်ခန်း ၁ဝ ကျော်ကို ကူးစက်လောင်ကျွမ်းခဲ့ခြင်း ဖြစ်ကြောင်း ကျောက်ဖြူရဲစခန်းမှ ဒုရဲမှူး သန်းလှိုင်က အတည်ပြု ပြောကြားသည်။
“ အားလုံး ဆိုင်ခန်းပေါင်း ၁၅ ခန်းလောင်သွားတာပါ။ ဝါယာလျှော့ဖြစ်ပြီးလောင်တာပါ။ ဆုံးရှုံးမှုတန်ဖိုး ကတော့ အားလုံးပေါင်း ကျပ် ၁၅ သိန်းဖိုးလာက်ရှိတယ်”ဟု ပြောဆိုသည်။
ဒေသခံများကမူ ဆုံးရှုံးမူ တန်ဖိုးမှာ သိန်း (၂၀၀) ကျော်ဖိုးရှိနိုင်သည်ဟု ဆိုသည်။
မီးစလောင်ကျွမ်းခဲ့သော ဆိုင်ခန်းပိုင်ရှင် ဒေါ်ရီရီဝင်းကို ကျောက်ဖြူမြို့မရဲစခန်းမှ (ပ) ၂၁၃/၂ဝ၁၄၊ ပြစ်မှု ပုဒ်မ ၂၈၅ ဖြင့် အမှုဖွင့်အရေးယူထားကြောင်း သိရသည်။
No comments:
Post a Comment