တိုက်ပွဲများကြောင့် ဆွမ်ပရာဘွမ် မြို့နယ်အတွင်းရှိ ဒေသခံများသည် တောထဲတွင် ခိုလှုံနေရပြီး လမ်းပိုင်း လုံခြုံရေးကိုလည်း စိုးရိမ်ရသဖြင့် ဒုက္ခသည်များကို သွားရောက် ကူညီမှု ဆိုင်းငံ့ထားရကြောင်း ယင်း ဒုက္ခသည်များကို ကူညီနေသော မြစ်ကြီးနားမြို့ ကချင် နှစ်ခြင်း အသင်းတော် အဖွဲ့အစည်း (KBC)မှ ပြောရေးဆိုခွင့်ရှိသူ ဦးလမာရော်က ယနေ့ ဧရာဝတီသို့ ပြောသည်။
ဦးလမာရော်က“တောထဲမှာ သူတို့ ယာယီ တဲလေးတွေ ရှာကြံပြီးမှ မိုးတောထဲမှာ ဒုက္ခ ခံနေရတုန်းပါပဲ။ မူလတန်းလွန် ကျောင်း ၅ ကျောင်းနဲ့ မူကြိုကျောင်း ၅ကျောင်းက ကလေးတွေ တောထဲ ရောက်နေတယ်။ စားနပ်ရိက္ခာ ပြတ်လပ်လာ တယ်။ ကျန်းမာရေး ချို့တဲ့ လာတယ်။ အဲဒါကြောင့် နည်းလမ်းရှာပြီး လာရောက် ကူညီကြပါ”ဟု ပြောသည်။
ဒုက္ခသည် ၁၀၀၀ ကျော်ကို ကူညီရန် ဆန်အိတ် ၂၀၀၊ ဆီ ၁၀ ပုံး၊ ကုလားပဲ ၁၀ အိတ်နှင့် မိုးကာများ စီစဉ်ထားသော်လည်း သက် ဆိုင်ရာ အာဏာပိုင်များက ကုန်းလမ်းဖြင့်သာ ခွင့်ပြုသဖြင့် လမ်းခရီး မပေါက်သည့်အတွက် ဆိုင်းငံ့လိုက်ရကြောင်း KBC က ပြော သည်။
တိုက်ပွဲများကြောင့် ဆွမ်ပရာဘွမ်မြို့နယ် အတွင်းရှိ မလိယန်၊ ဂျာရာယန်၊ အင်ထန်းဇွပ်၊ ဖုန်းအိုက်ယန် စသည့်ကျေးရွာများမှ ဒေသခံ ၁၀၀၀ ကျော် တောထဲသို့ ထွက်ပြေး တိမ်းရှောင်နေရကြောင်း သိရသည်။
KIA ပဋိပက္ခ ညှိနှိုင်းရေးအဖွဲ့ ခေါင်းဆောင် ဗိုလ်မှူးကြီး ဇော်တောင်က “လက်ရှိ ဒုက္ခသည်တွေကို အကူအညီပေးဖို့ အခက်အခဲ ဖြစ် နေတယ်။ အဲဒီနေရာက ရေကြောင်းလမ်းနဲ့ဆို ၅ ရက်လောက် သွားရတယ်။ ကုန်လမ်းနဲ့ကတော့ မိုးတွင်းမို့ မစဉ်းစားနဲ့။ အဲဒီနေရာ က ဆွမ်ပရာဘွမ် နဲ့ ၁၂ ကီလိုမီတာလောက်ပဲ ဝေးတယ်”ဟု ပြောသည်။
အစိုးရ တပ်မတော်သည် မြစ်ကြီးနား-ဆွမ်ပရာဘွမ်-ပူတာအို လမ်းမတွင် တပ်အင်အားဖြည့် လုံခြုံရေး တင်းကျပ်ထားပြီး ဇူလိုင် ၁၁ ရက် နောက်ပိုင်းဖြစ်သည့် တိုက်ပွဲများတွင် KIA က ၄ ဦး ဒဏ်ရာ ရရှိပြီး တဦးမှာ ပျောက်ဆုံးနေကြောင်း ဗိုလ်မှူးကြီး ဇော်တောင်က ပြောပြသည်။
ကချင် ငြိမ်းချမ်းရေး ဖော်ဆောင်ရေး အကျိုးတော်ဆောင် ဦးလမိုင်ဂွမ်ဂျာက“ဒီလ ၁၃ရက်နေ့က KIO ပဋိပက္ခ ညှိနှိုင်းရေး အဖွဲ့ဘက် ကတော့ စာရေးပြီး ကမ်းလှမ်းထားတာ ရှိပါတယ်။ ဒါပေမယ့် အစိုးရဘက် ပဋိပက္ခမှာ ပါဝင်တဲ့သူတွေ မစုံလို့ဆိုပြီး ဆွေးနွေးပွဲ မစနိုင် သေးဘူး။ ဆွေးနွေးပွဲ စနိုင်ရင်တော့၊ ဘာကြောင့် ဖြစ်တယ်ဆိုတာ ညှိနှိုင်းရင်တော့ အဆင်ပြေ သွားနိုင်ပါတယ်”ဟု ဧရာဝတီသို့ ပြောသည်။
အစိုးရ တပ်မတော်နှင့် KIAတို့ကြား ၂၀၁၁ ခုနှစ် ဇွန်လ ၉ ရက်မှစတင်ပြီး တိုက်ပွဲများ ယနေ့အချိန်ထိ ဆက်တိုက်ဖြစ်ပွားခဲ့ရာ တိုက်ပွဲများကြောင့် ကချင်ပြည်နယ်အတွင်းရှိ ဆက်သွယ်ရေး လမ်းများ ပျက်စီးခဲ့ရပြီး ဒုက္ခသည်ဦးရေ သိန်းချီ ရှိနေကြောင်း သိရ သည်။
No comments:
Post a Comment