မင်းမင်း
တပ်မတော်သားအရာရှိ အငြိမ်းစားများအား တရားစီရင်ရေး ကဏ္ဍတွင် ခန့်အပ်လိုက်မှုအပေါ် ကန့်ကွက်သည့် ရှေ့နေများက နေပြည်တော်တွင် ဆက်လက် ကန့်ကွက်နေကြပြီး နေပြည်တော်ရှိ တရားရုံးအားလုံးတွင် ဆက်လုပ်သွားမည်ဟု ကန့်ကွက်သူများက ပြောသည်။
အဆိုပါ ကန့်ကွက်မှုကို စက်တင်ဘာ ၉ရက်က ဒက္ခိဏခရိုင်တရားရုံးရှေ့တွင် စတင် ခဲ့ခြင်းဖြစ်ပြီး စက်တင်ဘာ ၁၄ရက်တွင် ပုဗ္ဗသီရိမြို့နယ် တရားရုံးရှေ့တွင် ဆက်လုပ်ခဲ့သည်။
"အမိန့်ပေးတဲ့စနစ်ကို အသွေးအသားဖြစ်နေတဲ့ပုဂ္ဂိုလ်တွေက တရားစီရင်ရေးစနစ်ကို ဝင်လာတာဟာ အဖတ်ဆယ်လို့မရအောင် တရားစီရင်ရေး ပျက်ပြီလို့ ကျွန်တော်တို့ ယူဆပါတယ်" ဟု ဦးဆောင်လှုပ်ရှားသူ ပျဉ်းမနားမြို့နယ်၊ ရှေ့နေအသင်းဥက္ကဌဖြစ်သူ တရားလွှတ်တော်ရှေ့နေ ဦးခင်မောင်ဇော်က မဇ္ဈိမကို ပြောသည်။
Yellow Ribbon ဟု အမည်ပေးထားသည့် အဆိုပါ လှုပ်ရှားမှု၏ လက်ကမ်းစာစောင်များတွင်လည်း "၂၀၁၅ အလွန်ကာလအတွက် ကြိုတင်ပြင်ဆင်ပြီး Militarization of Judiciary လုပ်ဖို့ ရည်ရွယ်ချက်ရှိရှိနဲ့ အင်အားထပ်ဖြည့်လာတယ်လို့ သိမြင်တွေ့ရှိ ရတဲ့အတွက် ဟန့်တားဖို့ ကြိုးစားကြတာဖြစ်ပါတယ်။ တရားရုံး၊ တရားစီရင်ရေးနဲ့ပတ်သက်သူ အားလုံးဟာ တရားရေးကို စစ်ဩဇာအောက် သွင်းမယ့် ခြေလှမ်းကို ဆန့်ကျင် ရပါမယ်" ဟု ရေးသားထားသည်။
အဆိုပါ ကန့်ကွက်လှုပ်ရှားမှုကို နေပြည်တော်အပြင် ရန်ကုန်နှင့် မန္တလေးရှိ ရှေ့နေအချို့ကလည်း စတင်လှုပ်ရှားနေပြီဖြစ်သည်။
တပ်မတော်သားများကို အစိုးရဝန်ကြီးဌာနများတွင် အလုပ်ခန့်ထားမှုသည် ၂၀၁၅ခုနှစ်အလွန် မြန်မာနိုင်ငံ၏ ကဏ္ဍကြီးသုံးရပ်လုံးတွင် စစ်တပ်က အုပ်စီးဖို့အတွက်လောဟု သံသယဖြစ်ရသည်ဟု ဦးခင်မောင်ဇော်က ပြောသည်။
ပြီးခဲ့သည့်လကလည်း ကျန်းမာရေးဝန်ကြီးဌာနတွင် တပ်မတော်သားများကို ခန့်အပ်ထားမှုကြောင့် ဆရာဝန်များက အနက်ရောင်ဖဲကြိုးများကိုတပ်ဆင်ကာ ကန့်ကွက်ခဲ့ကြသေးသည်။
No comments:
Post a Comment