စက်တင်ဘာလ ၄ ရက်က ထိုင်းနိုင်ငံ မဟာချိုင်ဒေသ၌ နေထိုင်နေသည့် မြန်မာနိုင်ငံသားဖြစ်သူ ဦးခင်မောင် (အသက် ၆၁ နှစ်) ၏ နေအိမ်သို့ ထိုင်းရဲတပ်ဖွဲ့ ရောက်ရှိလာပြီး ရှာဖွေစစ်ဆေးစဉ် ငါးဖမ်းပိုက်တွင် အသုံးပြုသည့် ခဲသီးအား ရှာဖွေတွေ့ရှိကြောင်း၊ ထို ခဲသီး ကို ဗုံးဟုယူဆပြီး ဖမ်းဆီး ခေါ်ဆောင်သွားပြီးနောက် စက်တင်ဘာ ၁၆ ရက်၌ သေဆုံးသွားသည်ဟု အကြောင်းကြားလာကြောင်း ဦးခင်မောင် ၏ သမီးဖြစ်သူ မလဲ့လဲ့က ဧရာဝတီကို ပြောပြသည်။
“ဖမ်းသွားတာက ၄ ရက် ကတည်းကပါ။ ၁၆ ရက်မှ အဖေဆုံးသွားပြီလို့ ရဲစခန်းက အကြောင်းကြားတယ်။ အဖေဘာကြောင့် သေ ဆုံး သွားရတာလဲလို့ မေးတော့ နှလုံး၊ အဆုတ် မကောင်းလို့ အသက်ရူ ကြပ်ပြီး ဆုံးသွားတာလို့ ပြောပါတယ်။ အဖေ့ကို ဖမ်းသွားတဲ့ ရက်က ဘတ်ငွေ ၁၄,၆၀၀ နဲ့ တယ်လီဖုန်း တလုံးပါ ရဲတွေက သိမ်းယူသွားတယ်”ဟုလည်း မလဲ့လဲ့က ပြောသည်။
ဦးခင်မောင်သည် နောက်ကျောကုန်း ခွဲစိပ်ခံထားရသူဖြစ်ပြီး၊ ကျန်းမာရေး မကောင်းသည့်အတွက် ဆေးဝါးကုသရန် ထိုင်းနိုင်ငံသို့ ၂၀၁၅ ခုနှစ် မတ်လကတည်းက ရောက်ရှိကာ သမီးဖြစ်သူနှင့် နေထိုင်ကြောင်း၊ ပန်းရောင် အလုပ်သမားကတ်ဖြင့် တရားဝင် နေထိုင် နေခြင်း ဖြစ်ကြောင်းနှင့် ဦးခင်မောင်အား ဖမ်းဆီးသည့်ရက်က ၎င်းတို့၏ အိမ်နီးချင်း မြန်မာတချို့ကိုလည်း တရားမ၀င် နေထိုင်မှုဖြင့် ဖမ်းဆီးသွားကြောင်း မလဲ့လဲ့က ဆက်ပြောသည်။
ဘန်ကောက်မြို့၌ ဖြစ်ပွားခဲ့သည့် ဗုံးပေါက်ကွဲမှုနှင့် ပတ်သက်ပြီး ထိုင်းအာဏာပိုင်များက မသင်္ကာသူများအား နိုင်ငံတ၀န်း ရှာဖွေနေ ကြောင်း၊ ထို့အတူ တရားမ၀င် နေထိုင်သူများ၊ မူးယစ်ဆေးဝါး သုံးစွဲသူများအား ထိုင်းရဲက ရှာဖွေဖမ်းဆီးစဉ် ဦးခင်မောင်၏ အိမ်ကို လည်း လာရောက်ရှာဖွေခံရခြင်းဖြစ်ကာ ယခုကဲ့သို့ လူသေဆုံးမှု ဖြစ်ပေါ်လာရသည်ဟု ထိုင်းနိုင်ငံရောက် မြန်မာနိုင်ငံသားများအဖွဲ့ (MAT)၏ မဟာချိုင်ဒေသ တာဝန်ခံ ဦးခိုင်ကြီးက ဧရာဝတီကို ပြောပြသည်။
“ဦးခင်မောင်ကို ဖမ်းတုန်းက ယူသွားတဲ့ ဘတ်တသောင်းကျော်နဲ့ တယ်လီဖုန်းကို ပြန်ရချင်တယ်လို့ ကျနော်တို့က ရဲစခန်းမှာ တင်ပြ တော့ အထောက်အထား ရှိလား။ CCTV မှတ်တမ်းရှိလား ဆိုပြီးတော့ ပြောတယ်။ ပြီးတော့ကာယကံရှင် ကိုယ်တိုင်က တင်ပြမှရမယ် တဲ့။ ကာယကံရှင်က သေဆုံးသွားပြီဆိုတော့ ကျနော်တို့က လုပ်ရတာ အခက်အခဲ ဖြစ်နေတယ်”ဟုလည်း ၎င်းက ပြောသည်။
ဦးခင်မောင် သေဆုံးရခြင်းနှင့် ပတ်သက်ပြီး ညှဉ်းပန်းနှိပ်စက် ခံရခြင်းရှိမရှိ ဆိုသည်ကို အတိအကျ မသိရသော်လည်း နှိပ်စက်ခံရ သည့် ဒဏ်ရာ လက္ခဏာများကို မတွေ့ရှိရကြောင်း ဦးခိုင်ကြီးက ပြောဆိုသည်။
သေဆုံးသူ ဦးခင်မောင်သည် လှေသမားတဦးဖြစ်ပြီး တနင်္သာရီတိုင်း ထားဝယ်မှလာရောက်ခြင်း ဖြစ်ကြောင်းနှင့် တရားဝင်လက်မှတ် ဖြင့် ထိုင်းနိုင်ငံ၌ နေထိုင်စဉ် သေဆုံးသောကြောင့် ထိုင်းနိုင်ငံ၏ ဥပဒေအရ အကာအကွယ်ပေးနိုင်ရန် ဆောင်ရွက်သွားမည် ဖြစ်ကြောင်း၊ သေဆုံးသူသည် မတရားစွပ်စွဲ ဖမ်းဆီးခံရပြီး သေဆုံးသွားရသည့်အတွက် နစ်နာဆုံးရှုံးမှု အပြည့်အ၀ ရရှိရန် ကူညီပေးသွားမည်ဟု ဦးခိုင်ကြီးက ပြောသည်။
ထိုင်းအာဏာပိုင်များက ခဲသီးသည် ဖောက်ခွဲရေးပစ္စည်းများ ပြုလုပ်ရာတွင် အသုံးပြုနိုင်သည့် ပစ္စည်းတခုဟုဆိုကာ ဖမ်းဆီးခြင်းဖြစ်ကြောင်း ပြောသည်ဟုလည်း ဆိုသည်။
လက်သီးဆုပ်ခန့်ရှိ ထိုခဲသီးသည် ကလေးများကစားရာတွင် အသုံးပြုလေ့ရှိသည့်အတွက် ကလေးများဆီက တောင်းယူထားခြင်း ဖြစ် ကြောင်း၊ မလဲ့လဲ့ ၏ အမျိုးသားသည် တံငါအလုပ် လုပ်ကိုင်သည့်အတွက် ငါးဖမ်းပိုက်တွင် အသုံးပြု၍ ရသည်ဟုဆိုပြီး အိမ်၌ သိမ်းဆည်းထားခြင်း ဖြစ်ကြောင်း မလဲ့လဲ့က ပြောဆိုသည်။
သေဆုံးသူ ဦးခင်မောင်၏ ရုပ်အလောင်းကို လာမည့် စက်တင်ဘာ ၂၀ ရက်တွင် သင်္ဂြိုဟ်မည် ဖြစ်ကြောင်း သိရသည်။
No comments:
Post a Comment