ရခိုင်ပြည်နယ်၊ အမ်းမြို့နယ်၊ တောင်ဖလာ ကျေးရွာ အုပ်စုတွင် တရုတ်ကုမ္ပဏီ China National Petroleum Corporation (CNPC) ၏ ဂတ်စ် ပိုက်လိုင်းနှင့် ရေနံပိုက်လိုင်းကြောင့် ဒေသခံများ လုပ်ကိုင်စားသောက်နေသော ပုဇွန်ကာရီ (တာတမံ) ပျက်စီး သွားသော်လည် ပြန်လည် မပြုပြင်ပေးသည့် အတွက် စက်တင်ဘာ ၁၆ ရက်နေ့၌ ဆန္ဒဖော်ထုတ် ကန့်ကွက်သွားမည်ဟု သတင်းရရှိသည်။
ဆန္ဒဖော်ထုတ်ခွင့် ရရှိရန် အတွက် စက်တင်ဘာလ ၁၀ ရက်နေ့က မြို့နယ် ရဲတပ်ဖွဲ့မှူးရုံးသို့ ခွင့်ပြုချက် တင်လိုက်ပြီ ဖြစ်ကြောင်း သတင်းရရှိသည်။
“ ပျက်စီးသွားတဲ့ ကာရီတွေကို ပြန်လည်ပြုပြင်ပေးဖို့ စာနဲ့ အကြိမ်ကြိမ် တိုင်ကြားတယ်။ ဒေသခံတွေကို သူတို့က ဘာမှ ဂရု မစိုက်ဘူး။ ဒီစီမံကိန်းကြောင့် ဒေသခံတွေ အကျိုးမခံစားရတဲ့ အပြင် ရှိနေတဲ့ အခွင့်အရေးတွေပါ ဆုံးရှုံးနေတယ်။ ဒါကြောင့် စက်တင်ဘာ ၁၆ရက်နေ့မှာ ဆန္ဒဖော်ထုတ်ဖို့ အတွက် သက်ဆိုင်ရာမှာ ခွင့်ပြုချက် တင်လိုက်ပါပြီ” ဟု အမ်းမြို့နယ် ဘက်စုံဖွံ့ဖြိုးတိုးတက်ရေး အသင်းဥက္ကဌ ကိုမျိုးလွင်က နိရဉ္စရာသို့ ပြောသည်။
ဆန္ဒဖော်ထုတ်ပွဲကို အမ်းမြို့ မြေစာရင်းရုံးမှ အထွေထွေအုပ်ချုပ်ရေးဦးစီးဌာနရုံရှေ့ကို ဖြတ်၍ အမှတ်(၃)ရပ်ကွက် အားကစားကွင်းတွင် ဟောပြောပွဲပြုလုပ်သွားမည်ဟုသိရသည်။
ရေနံပိုက်လိုင်းနှင့် ဂတ်စ်ပိုက်လိုင်းကြောင့် ဒေသခံ ၈၉ဦးလုပ်ကိုင်စားသောက်နေသော ပုဇွန်ကာရီသည် ပြန်လည်ပြုပြင်၍ မရတော့ဘဲ အခက်အခဲရှိနေကြောင်းသိရသည်။ ၎င်းကာရီသည် ၂၀၁၁ခုနှစ် ရေနံပိုက်လိုင်းနှင့် ဂတ်စ်ပိုက်လိုင်း ဖြတ်သန်းခံရပြီး နောက်ပိုင်းမှစ၍ လုပ်ကိုင်၍မရတာ သုံးနှစ်ရှိပြီဟု ကိုမျိုးလွင်ကပြောသည်။
ဒေသခံလူပေါင်း၈၉ဦးပိုင်ဆိုင်သော ကာရီ ၅လုံး၏ အကျယ်အ၀န်းမှာ ၃၄၅ဧကရှိသည်။
ယခုအခါ ပုဇွန်လုပ်၍ မရတော့သဖြင့် ယခုနှစ် မိုးရာသီမှစ၍ စပါးစိုက်ရန် ကိုယ်ထူကိုယ်ထဖြင့် နေ့တိုင်းလူ၁၅၀ခန့်ဖြင့် ပြန်လည်ပြုပြင်နေသော်လည်း လတိုင်း ၎င်းကာရီကျိုးပေါက်နေသောကြောင့် အခက်အခဲ ဖြစ်နေကြောင်း သိရသည်။
No comments:
Post a Comment