ရှမ်းပြည်မြောက်ပိုင်း ကျောက်မဲခရိုင် ကျောက်မဲမြို့နယ်တွင်းမှာ အစိုးရတပ်နဲ့ တီအန်အယ်လ်အေ တအာင်းတပ်ဖွဲ့ကြား ထိတွေ့ပစ်ခတ်မှု ဖြစ်ပွားပြီး ပြည်သူတွေ ထိခိုက်ဒဏ်ရာရခဲ့ပါတယ်။
စက်တင်ဘာလ ၂၉ ရက်နေ့က ပစ်ခတ်မှုကြောင့် လက်နက်စ ထိမှန်တဲ့ ရွာသူတဦး ဆေးရုံ ရောက်လာတယ်လို့ ကျောက်မဲပြည်သူ့ဆေးရုံ တာဝန်ကျဝန်ထမ်းတဦးက ဒီဗွီဘီကို ပြောပါတယ်။
“စက်တင်ဘာ ၂၉ ရက် ည ၁၁ နာရီ ၄၀ အချိန်မှာ လက်နက်ထိ ဒဏ်ရာနဲ့ အမျိုးသမီးတဦး ဆေးရုံကို ရောက်လာပါတယ်။ ခေါင်းမှာ တချက်၊ ဘယ်ဘက် နောက်ကျောမှာ တချက်နဲ့ ပေါင်မှာ တချက် စုစုပေါင်း ၃ နေရာပါ။ မနေ့ညက ခွဲစိပ်ကုသဆောင်မှာ ထားပြီး ဒီဆေးရုံမှာ ဦးခေါင်းနဲ့ပတ်သက်ပြီး ကုသတဲ့ ဆရာဝန်မရှိတဲ့အတွက် ဒီနေ့မနက်တော့ မန္တလေးဆေးရုံကြီးကို လွှဲပေးလိုက်ပါတယ်။”
ဒဏ်ရာရ အမျိုးသမီးအမည်မှာ ဒေါ်အေးဥ၊ အသက်က ၅၅ နှစ်ဖြစ်ပြီး ကျောက်မဲမြို့နယ် တော့ဆန်ကျေးရွာအုပ်စု ကလောဝိုင်းရွာမှာ နေထိုင်တယ်လို့ ဆေးရုံက ပြောပါတယ်။
ကျောက်မဲဒေသခံ တဦးကတော့ မနေ့က ပစ်ခတ်မှုမှာ ရွာသား ၃ ဦး ဒဏ်ရာရ သွားတယ်လို့ ပြောပါတယ်။
ဒဏ်ရာရသူ အရေအတွက်နဲ့ ပတ်သက်ပြီး ဒီဗွီဘီက သီးခြားအတည်ပြုချက်မရသေးပါဘူး။
ကျောက်မဲမြို့နယ် ရဲစခန်းကို ဆက်သွယ်မေးမြန်းရာမှာတော့ ပစ်ခတ်မှုဖြစ်ပြီး ဒဏ်ရာရသူတွေ ရှိတယ်လို့ ကြားမိပေမယ့် အစီရင်ခံစာတက်မလာတာကြောင့် အချက်အလက် ဘာမှမသိရဘူးလို့ ဖြေကြားသွားပါတယ်။
တီအန်အယ်လ်အေ တအာင်းအမျိုးသားလွတ်မြောက်ရေးတပ်မတော်ရဲ့ ထုတ်ပြန်ချက်မှာတော့ စက်တင်ဘာ ၂၉ ရက် ညနေပိုင်းက ကျောက်မဲမြို့နယ် တော့ဆန်ကျေးရွာနားမှာ တအာင်းတပ်ရင်း ၇၁၇/ ၉၈၇ နဲ့ မြန်မာ့တပ်မတော် တပ်မ ၇၇ တို့ကြား ရင်ဆိုင်တိုက်ပွဲ ဖြစ်ပွားပြီး အစိုးရတပ်ဘက်က ၂ ဦး ကျဆုံးတယ်လို့ ဖော်ပြသွားပါတယ်။ ရွာသားများ ထိခိုက်ဒဏ်ရာရမှုမှာတော့ တာဝန်ခံပြောကြားမယ့်သူ မရှိပါဘူး။
အစိုးရတပ်နဲ့ အမြဲလို ပစ်ခတ်မှုဖြစ်ပွားနေတဲ့ တီအန်အယ်လ်အေဟာ တနိုင်ငံလုံးဆိုင်ရာ အပစ်ခတ်ရပ် လက်မှတ်ရေးထိုးပွဲမှာ ပါဝင်လိုပေမယ့် တိုင်းရင်းသားလက်နက်ကိုင် အဖွဲ့အားလုံး ပါဝင်မှသာ လက်မှတ်ရေးထိုးမယ်လို့ ထုတ်ပြန်ကြေညာထားပါတယ်။
No comments:
Post a Comment