မျိုးသူအောင်
တိုက်ပွဲများရပ်တန့်ရေး တရားဝင် အကြောင်းကြားလာပါက ရှမ်းပြည်ပြန်လည် ထူထောင်ရေးကောင်စီ ရှမ်းပြည်တပ်မတော် (RCSS/SSA) အား လက်ခံတွေ့ဆုံ သွားမည်ဟု တအာင်းအမျိုး သားလွတ်မြောက်ရေး တပ်မတော်(TNLA) ပြန်ကြားရေးတာဝန်ခံ ဗိုလ်မှူးမိုင်းအိုက်ကျော်က ပြောသည်။
ထိုင်းနိုင်ငံ ချင်းမိုင်မြို့တွင် ဒီဇင်ဘာ ၁၅ ရက်နေ့က ညီညွှတ်သော တိုင်းရင်းသားလူမျိုးများ ဖက်ဒရယ် ကောင်စီ (UNFC)နှင့် (RCSS/SSA) ခေါင်းဆောင်များနှင့် တွေ့ဆုံညှိနှိုင်းမှုအပြီး ဒုတိယဗိုလ်ချုပ်ကြီး ရွက်ဆစ်က တွေ့ဆုံဆွေးနွေးလိုကြောင်း ပြောကြားခဲ့မှုအပေါ် ယခုကဲ့သို့ ပြန်လည်ပြောဆိုခဲ့ခြင်း ဖြစ်သည်။
" သူတို့ဘက်က ကမ်းလှမ်းတာက ဘယ်လိုဟာမျိုးလည်း မသိသေးဘူး။ မီဒီယာပေါ်မှာ ပြောတာလောက်နဲ့ တော့ ဘယ်လိုလုပ်မလည်းမပြောနိုင်သေးဘူး။ သူတို့ဘက်က တရားဝင်ကမ်းလှမ်းလာရင်တော့ ကျွန်တော်တို့ အဖွဲ့အနေနဲ့ ဗဟိုကော်မတီအစည်းဝေးထိုင်ပြီးတော့ လက်ခံတွေ့ဆုံဖို့ စဉ်းစားသွားမယ်"ဟုဗိုလ်မှူးမိုင်းအိုက် ကျော် က ပြောသည်။
ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော်(RCSS/SSA)နှင့် တအာင်းအမျိုးသား လွတ် မြောက်ရေး တပ်မတော်တို့သည် နယ်မြေအငြင်းပွားမှု ဖြစ်ပွားရာမှ ရှမ်းပြည်နယ်မြောက်ပိုင်း နန့်ခမ်းမြို့နယ် အတွင်း၌ အောက်တိုဘာလအတွင်းက စတင်ကာ တိုက်ပွဲများ ဖြစ်ပွားခဲ့ခြင်းပြီး ယင်း ပဋိပက္ခများ ပြေလည် မှုရရှိ စေရန် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ(UNFC) က ကြားဝင်ညှိနှိုင်းပေးသည့် အနေဖြင့် RCSS ထပ်ပိုင်းခေါင်းဆောင်များနှင့် ဒီဇင်ဘာလ (၁၅)ရက်နေ့က ထိုင်းနိုင်ငံ ချင်းမိုင်မြို့တွင် တွေ့ ဆုံညှိနှိုင်းခဲ့ခြင်း ဖြစ်သည်။
“အမြန်ဆုံး ဆွေးနွေးနိုင်ကြရင်တော့ အကောင်းဆုံးပါ။ ဘာကြောင့်လဲဆိုတော့ ကျနော်တို့ ဆွေးနွေးပွဲတွေ မြန်မြန်စပြီးတော့ မဆွေးနွေးနိုင်ဘူး။ မဖြေရှင်းနိုင်ဘူးဆိုရင် စစ်ပြေပြင်မှာ ကျနော်တို့၊ သူတို့ မျက်နှာချင်းဆိုင် နေတဲ့သူတွေအတွက် အခက်အခဲဖြစ်ပါတယ်။ ပြည်သူတွေအနေနဲ့ရော ထိတ်လန့်နေရတာပေါ့”ဟု ဒုတိယ ဗိုလ်ချုပ်ကြီး ရွက်ဆစ်က အစည်းအဝေးအပြီး သတင်းစာ ရှင်းလင်းပွဲတွင် ပြောကြားခဲ့သည်။
တအာင်းအမျိုးသားလွတ်မြောက်ရေးတပ်မတော်(TNLA)က လတ်တလောဖြစ်ပွားနေသော တိုက်ပွဲများမှာ လက်နှစ်ကိုင်အဖွဲ့ နှစ်ခုကြား ဖြစ်ပွားသော ပဋိပက္ခသာဖြစ်ပြီး လူမျိုးရေး ပဋိပက္ခမဟုတ်ကြောင်း ထုတ်ပြန် ကြေညာခဲ့သည်။
နန့်ခမ်းမြို့နယ်အတွင်းရှိ မိုင်းဝီးနှင့် ဟိုပန်ကျေးရွာ အနီးဖြစ်ပွားခဲ့သော တအာင်းလွတ်မြောက်ရေးတပ်ဖွဲ့ (TNLA) နှင့် ရှမ်းပြည်တပ်မတော် (RCSS/SSA) တို့၏ တိုက်ပွဲအတွင်း TNLA က ပြည်သူ ၂၀ကျော်ကို ဖမ်းစီး ထားကြောင်း ဒေသခံများက ပြောဆိုနေကြပြီး TNLA တပ်ဖွဲ့ဖက်ကမူ ဖမ်းဆီးထား ခြင်းမရှိကြောင်း ပြန်လည်ပြောကြားထားသည်။
No comments:
Post a Comment